ސިފައިންނަށް އިތުރު 17 އުޅަނދެއް ހޯދައިދެނީ، 12 ސީއެމްބިއުލާންސް ބަންނަނީ
ސިފައިންގެ ކަނޑުމަތީ އޮޕަރޭޝަންތަކާއި ޕެޓްރޯލް ކުރުމުގެ މަސައްކަތަށް އިތުރު އުޅަނދުތަކެއް ހޯދައިދިނުމުގެ މަސައްކަތް ހިނގަމުންދާ ކަމަށް ޑިފެންސް މިނިސްޓަރު ހަސަން ރަޝީދު މިރޭ ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ މިރޭ އޮތް "އަހާ" ފޯރަމްގައި ވާހަކަފުޅު ދައްކަވަމުންނެވެ. މިނިސްޓަރު ވިދާޅުވީ ސިފައިންގެ އަސްކަރީ ގާބިލްކަން އިތުރުކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ސިފައިންގެ އެއާ ވިންގުގެ ހިދުމަތް ފަށައި އެ ހިދުމަތަށް ޑްރޯން ހޯދައިދީފައިވާކަން މިނިސްޓަރު ފާހަގަ ކުރެއްވި އެވެ.
މީގެ އިތުރުން ދެ ގައުމެއްގެ ހިލޭ އެހީގައި ދެ މަނަވަރު ލިބިފައިވާ ކަން ފާހަގަ ކުރެއްވި އެވެ. އެއީ އޮސްޓްރޭލިއާ ސަރުކާރުން ހަދިޔާ ކުރި މަނަވަރަކާއި ތުރުކީ ސަރުކާރުން ހަދިޔާކުރި މަނަވަރެކެވެ.
މިނިސްޓަރު ވިދާޅުވީ ސިފައިންގެ ކަނޑުމަތީ އޮޕަރޭޝަންތަކާއި ޕެޓްރޯލް ކުރުމުގެ މަސައްކަތަށް އިތުރު 17 އުޅަނދު ވަަރަށް އަވަހަށް ހޯދައިދޭނެ ކަމަށެވެ. ބައެއް އުޅަނދުތައް އަންނަ ނޮވެންބަރު މަހުގެ ތެރޭގައި ލިބޭނެ ކަމަށް މިނިސްޓަރު ވިދާޅުވި އެވެ.
ބާރަ ސީއެމްބިއުލާންސް ބަނުމުގެ މަސައްކަތް ކުރިއަށް
މީގެ އިތުރުން މިނިސްޓަރު ވަނީ ސީއެމްބިއުލާންސްގެ ހިދުމަތް ދެމުން ދަނީ ސިފައިން ކަން ފާހަގަ ކުރައްވާ އެ ހިދުމަތް ފުޅާކުރުމަށްވެސް ގިނަ މަސައްކަތްތަކެއް ކުރަމުންދާކަން ފާހަަގަ ކުރައްވާފަ އެވެ.
އެގޮތުން މިނިސްޓަރު ވިދާޅުވީ އިތުރު ސީއެމްބިއުލާންސްތަކެއް ބަނުމުގެ މަސައްކަތް މިހާރު ކުރަމުންދާ ކަމަށެވެ. އެގޮތުން މިވަގުތު 12 އެމްބިއުލާންސްއެއް ބަނުމުގެ މަސައްކަތް ކުރަމުންދާ ކަމަށް ވިދާޅުވި އެވެ.
ސަރުކާރުން ވަނީ އެއާ އެމްބިއުލާންސްގެ ހިދުމަތް ވެސް ފަށާފަ އެވެ. އެ ހިދުމަތުން މިހާތަނަށް 3,000 ވުރެ ގިނަ މީހުން އުފުލާފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
