ކުޑަކުދިންނަށް އެންމެ ފުރަތަމަ ދަސްކޮށްދޭންވީ ދިވެހިބަސް: ރައީސް މައުމޫން
ލިޔުންތެރިޔާ
އަބްދުﷲ ހުސައިން
ކުޑަކުދިންނަށް އެންމެ ފުރަތަމަ ދަސްކޮށްދޭންވީ ދިވެހިބަސް ކަމަށް ކުރީގެ ރައީސް އަލްއުސްތާޛް މައުމޫން އަބްދުލް ޤައްޔޫމް ވިދާޅުވެއްޖެއެވެ.
ޑރ. ޙަސަން ޙަމީދު ލިޔުއްވާފައިވާ ފޮތެއް ނެރުމަށް ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ރައީސް މައުމޫން ވިދާޅުވީ، ކުޑަކުދިންނަށް އެންމެ ފުރަތަމަ ދަސްކޮށްދޭން ޖެހޭ ބަހަކީ މާދަރީ ބަސް ނުވަތަ ދިވެހިބަސް ކަމަށާއި، ކުދިންނާ އެންމެ ފުރަތަމަ ވާހަކަދައްކަން ވާނީ ވެސް ދިވެހިބަހުން ކަމަށެވެ. މިއަދުގެ ދިރިއުޅުމުގައި އިނގިރޭސި ބަހަށް ދޭންޖެހޭ އަހައްމިއްޔަތުކަން ބޮޑުވެފައިވާ ދަނޑިވަޅެއްގައި، ޑރ. ޙަސަން ޙަމީދުގެ މި ފޮތަކީ އިނގިރޭސި ބަހުގެ މުއްސަނދިކަން ދިވެހިބަހުން ދެނެގަތުމަށް އެޅުނު ވަރަށް މުހިންމު ފާލަމެއްކަމަށް ރައީސް މައުމޫން ވިދާޅުވިއެވެ. އަދި މިއީ ދިވެހި ދަރިވަރުންނަށާއި، ލިޔުންތެރިންނަށާއި، ތަރުޖަމާނުންނަށް ލިބުނު ވަރަށް އަގުހުރި، ބޭނުންތެރި ޢިލްމީ ޚަޒާނާއެއް ކަމުގައި އެމަނިކުފާނު ފާހަގަކުރެއްވިއެވެ.
ރައީސް މައުމޫންގެ ވާހަކަފުޅުގައި، ދުނިޔެ ބަދަލުވަމުންދާ ގޮތުންނާއި ޒަމާނީ ޓެކްނޮލޮޖީގެ ސަބަބުން ކުޑަކުދިންގެ އަތްމައްޗަށް ސްމާޓް ވަސީލަތްތައް އައިސްފައިވާ މިންވަރު ބަޔާންކުރެއްވިއެވެ. އަދި މިފަދަ ވަސީލަތްތަކުގެ ސަބަބުން އިނގިރޭސި ބަހަށް ކުދިން ހުށަހެޅޭ މިންވަރު އިތުރުވެ، ދިވެހިބަހުގެ އަސްލު ގެއްލިގެން ހިނގައިދާނެ ކަމުގެ ބިރު އެބައޮތް ކަމަށް ވިދާޅުވިއެވެ. އެހެންކަމުން މިއީ މުޅި މުޖުތަމަޢު ފުންކޮށް ވިސްނަންޖެހިފައިވާ ކަމެއް ކަމަށާއި، ބަހުގެ އަސްލު ނުގެއްލޭނެހެން މާދަރީ ބަސް ޙިމާޔަތްކުރުމަށް ޚާއްޞަ ފިޔަވަޅުތަކެއް އަޅަންޖެހޭ ކަމަށް ވިދާޅުވިއެވެ.
އަޅުގަނޑުމެން ކުޑަކުދިންނާ ވާހަކަދައްކާއިރު އެންމެ ފުރަތަމަ އިސްކަންދޭން ވާނީ ދިވެހިބަހަށް. ދިވެހިބަސް ދަސްވާނީ ދިވެހިބަހުން ވާހަކަދައްކައިގެން. ގޭތެރޭގައްޔާއި މަދަރުސާތަކުގައިވެސް މިކަމަށް އިސްކަންދޭންޖެހޭ
ރައީސް މައުމޫން
މީގެއިތުރުން، ދިވެހިބަސް ކުރިއެރުވުމުގެ ދާއިރާއިން ޑރ. ޙަސަން ޙަމީދު ފަދަ ޢިލްމީ ބޭފުޅުންގެ ކިބައިން ނަމޫނާ ލިބިގަންނަންޖެހޭ ކަމަށް ރައީސް މައުމޫން ވިދާޅުވިއެވެ. އަދި ޒުވާނުންނާއި ލިޔުންތެރިން ބަހުގެ ދިރާސާތައް އިތުރުކުރުމަށް ބާރުއަޅުއްވައި، ދިވެހި އަދަބިއްޔާތާއި ބަހުގެ ޢިލްމު ދިރުވައި އާލާކުރުމަށް ހުރިހާ ފަރާތްތަކަކުން ގުޅިގެން މަސައްކަތްކުރުމަށް އެމަނިކުފާނު ވަނީ ގޮވާލައްވާފައެވެ.
ކުރީގެ ރައީސް މައުމޫނު ފާހަގަ ކުރެވިފައިވަނީ އެމަނިކްފާނުގެ ވެރިކަމުގައި ހާއްސަ ގޮތެއްގައި ތައުލީމަށް ވަރަށްބޮޑު އަހަމިއްޔަތުކަމެއް ދެއްވި ރައީސެއްގެ ގޮތުގައެވެ. އެގޮތުން އެމަނިކްފާނުގެ ވެރިކަމުގައި ލިޔެކިޔަން ނުދަތުން ފިލުވާލުމަށް 1980 ވަނަ އަހަރު ކުރިއަށްގެންދިޔަ "އަސާސީ ތަޢުލީމުގެ މަޝްރޫޢު" އަކީ ރާއްޖޭގައި މިހާތަނަށް ހިންގުނު އެންމެ ކާމިޔާބު ޤައުމީ މަޝްރޫޢުކަމަށް ގިނަ ބަޔަކު އިއްތިފާގުވެއެވެ. މި މަޝްރޫޢުއާއެކު ދިވެހިރާއްޖެ ވެގެން ގޮސްފައިވަނީ، މުޅި ދެކުނު އޭޝިއާގައިވެސް ލިޔެކިޔަން ދަންނަ މީހުންގެ ނިސްބަތް އެންމެ މަތީ ޤައުމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
