ހިޔާ ޓަވަރު 5 ގައި ހިނގި އަލިފާނުގެ ހާދިސާ؛ 37 މީހަކަށް ވަގުތީ ބޯހިޔާވަހިކަން
ލިޔުންތެރިޔާ
އަބްދުﷲ ހުސައިން
ރޭ އިރު އޮއްސުނުފަހުން ހިޔާ ޓަވަރު 5 ގައި ހިނގި އަލިފާނުގެ ހާދިސާ އާ ގުޅިގެން ގިނަ އަދަދެއްގެ މީހުންނަށް ވަގުތީ ބޯހިޔާވަހިކަން ހަމަޖައްސައި ދީފިއެވެ.
ނެޝަނަލް ޑިޒާސްޓާ މެނޭޖްމަންޓް އޮތޯރިޓީން މިއަދު އެކްސްގައި ކުރި ޕޯސްޓެއްގައި ބުނެފައިވަނީ، ހިޔާ ޓަވަރު 5 ގައި ހިނގާ ދިޔަ އަލިފާނުގެ ހާދިސާއާއި ގުޅިގެން އެ ޓަވަރުގެ 7 އެޕާޓްމަންޓެއްގެ 37 ފަރާތަކަށް ވަގުތީ ބޯހިޔާވަހިކަން ފޯރުކޮށްދީފައިވާކަމަށެވެ. އެންޑީއެމްއޭއިން ބުނި އަލިފާނުގެ ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗް.ޑީ.ސީ.އިން ދަނީ ކުރަމުންނެވެ.
އަދި އަލިފާނުގެ ހާދިސާއާއި ގުޅިގެން އިތުރަށް ބަލަން ޖެހޭ ކަންކަން އެޗް.ޑީ.ސީ އާއި އިތޯރިޓީން ބަލަމުންދާކަން ފާހަގަކުރަމުން އެންޑީއެމްއޭއިން ބުނީ މި ހާދިސާއާއި ގުޅިގެން އެހީތެރިކަމެއް ބޭނުންވާ ނަމަ އެން.ޑީ.އެމް.އޭގެ އެމެޖެންސީ ހޮޓްލައިން 115 އަށް ގުޅުމަށް އެދޭކަމަށެވެ.
ވޮއިސްއަށް މައުލޫމާތު ލިބިފައިވާ ގޮތުގައި އަލިފާނުގެ ހާދިސާގައި ބޯހިޔާވަހިކަމަށް ގިނަ ބަޔަކު އެދިފައިވަނީ ބައެއް އެޕާޓްމަންޓްތަކުގެ ފާހާނާ ހޮޅިތަކާއި ޑްރެއިން ހޮޅިތައް ހަލާކުވުމުގެ ސަބަބުން އެޕާޓްމަންޓްތަކުގެ ފާހާނާ ބޭނުންނުކުރެވޭ ހާލަތަށް ދިއުމުންނެވެ. މީގެ އިތުރުން އެޕާޓްމަންޓްތަކުގެ އޭސީ އައުޓްޑޯ ޔުނިޓްތަކަށް އަލިފާނުގެ އަސަރުކޮށް ބޭނުންނުކުރެވޭ ވަރަށް ވަނީ ހަލާކުވެފައެވެ.
ހިޔާގައި ހިނގި އަލިފާނުގެ މި ހާދިސާއަކީ މިފަހަކުން ހިޔާޓަވަރުގައި ހިނގާދިޔަ މި ބާވަތުގެ އެންމެ ނުރައްކާތެރި ހާދިސާއެވެ. އަލިފާނުގެ ހާދިސާ ހިނގުމާއެކު ރޭ ވަނީ ޓަވަރުން މީހުން ހުސްކުރުމުގެ މަސައްކަތްވެސް ކުރިއަށްގެންގޮސްފައެވެ. މި ހާދިސާ ހިނގި ސަބަބު ސީދާ އަދި ނޭނގުނު ނަމަވެސް މިއީ އިހުމާލުން ހިނގާފައިވާ ހާދިސާއެއްކަމަށް ގިނަ ބަޔަކު ދަނީ ބުނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
