މޮނިއުމަންޓާ ގުޅޭގޮތުން ހުރާ ކައުންސިލްގެ ފަރާތުން ދެއްކި ވާހަކަތަކަށް ފާޑުކިޔުން އަމާޒުވެއްޖެ

ދިރޭތަކެތީގެ ސޫރަ ސިފަވާގޮތަށް މޮނިއުމަންޓްފަދަ ތަކެތި ހެދުމާއި ބެހެއްޓުމަކީ ޙަރާމް ކަމެއްކަން ބަޔާންކޮށް ފަތުވާ މަޖިލިސް އިން ނެރުނު ފަތުވާއާ ދެކޮޅަށް ވާހަކަދެއްކި ކަމަށް ބުނެ ހުރާ ކައުންސިލްގެ ރައީސް އީސާ އަހުމަދު އާއި ނާއިބުރައީސް އަބްދުالله އިބްރާހީމް ދެއްކި ވާހަކަތަކާއި ގުޅިގެން އެ ދެ މީހުންނަށް ވަރަށް ބޮޑަށް ފާޑުކިޔުން އަމާޒުވެއްޖެ އެވެ.

ޢިލްމުވެރިންގެ އިޖުމާޢުން ބުދު ހެދުމާއި ބެހެއްޓުން ޙަރާމްވެގެންވާކަން ކަނޑައެޅިގެން އެނގޭ ކަމަށާ، މިކަން މަނާކުރެވިފައިވާ ސަބަބުތަކުގެ ތެރޭގައި މަލާއިކަތުން، ބުދު ނުވަތަ ސޫރަ ބަހައްޓައިފައި ހުންނަ ތަންތަނަށް ނުވެންނެވުމާއި، އެފަދަ ތަކެތީގެ ސަބަބުން ޝިރުކަށް މަގުފަހިވުން ހިމެނޭކަން ފާހަގަކޮށް ދިރޭތަކެތީގެ ސޫރަ ސިފަވާގޮތަށް މޮނިއުމަންޓްފަދަ ތަކެތި ހެދުމާއި ބެހެއްޓުމަކީ ޙަރާމް ކަމެއްކަން ބަޔާންކޮށް ފަތުވާ ނެރެފައިވަނީ މިިދިޔަ ހަފްތާގަ އެވެ.

ހުރާގައި ބޮޑު މާކަނައެއް މޮނިއުމަންޓަކަށް ހަދާފައި ބަހައްޓާފަ ވެ އެވެ. އެ ފަތުވާއާ ގުޅިގެން ހުރާ ކައުންސިލްގެ ރައީސް އީސާ އަހުމަދު އާއި ނާއިބުރައީސް އަބްދުالله އިބްރާހީމް މީޑިއާއާ ދެއްކި ވާހަކަތަކާ ގުޅިގެން ބައެއް ފަރާތްތަކުގެ ކަންބޮޑުވުންވަނީ ސޯޝަލް މީޑިއާގައި ފާހަގަކޮށްފައެވެ.

އެ ދެ ބޭފުޅުން ވިދާޅުވެފައިވާކަމަށް ބައެއް މީޑިއާތަކުގައި ބުނެފައިވަނީ ދިރޭތަކެތީގެ ސޫރަ ސިފަވާގޮތަށް މޮނިއުމެންޓް ހެދުމާއި ތަންތަނުގައި ބެހެއްޓުމަކީ "ބުދު ހެދުން" ކަމަށާއި އެއީ ހަރާމް ކަމެއް ކަމަށް ދިވެހިރާއްޖޭގެ ފަތުވާ މަޖިލީހުން ނިންމިޔަސް ކ. ހުރާގެ ބަނދަރުމަތީގައި ހުރި "މާކަނާ" މޮނިއުމަންޓް ނުނަގާނެ ކަމަށެވެ. އެގޮތުން ބަޔަކު އަދި ހަރާމް ކަމަށް ނިންމި ނަމަވެސް މޮނިއުމަންޓް ނެގުމަށް ކައުންސިލުން ވިސްނާފަ ނުވާކަމަށް ވަނީ ބުނެފައެވެ.

އެކަމާއި ގުޅިގެން ވަރަށް ގިނަ ބަޔަކު ވަނީ އެދެ މީހުންނަށް ފާޑުކިޔާފަ އެވެ.