ޝަމްޢާން ކުރަނީ ސާބިތު ނުހިފޭ ދޮގު ތުހުމަތުތަކެއް؛ ކަން ހިނގިގޮތް ސާފުކޮށްދޭން ފުލުހުންނަށް އަންގައިފިން: އިޙްސާން

ކުރީގެ އިމިގްރޭޝަން ކޮންޓްރޯލާ މުޙައްމަދު ޝަމްޢާން ވަޙީދު ސަރުކާރުގެ އިސްވެރިންނަށް އަމާޒުކޮށް ކުރައްވަމުން ގެންދަވާ ތުހުމަތުތަކަކީ އެއްވެސް އަސާސެއް ނެތް، ސާބިތު ނުހިފޭ ދޮގު ވާހަކަތަކެއް ކަމަށް ދާޚިލީ ސަލާމަތާއި ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ޝަމްޢާން ފޭސްބުކްގައި ކުރެއްވި ޕޯސްޓެއްގައި ތުހުމަތު ކުރައްވާފައިވަނީ ރާއްޖޭގެ ބޯޑަރ ކޮންޓްރޯލް ސިސްޓަމް މިނިސްޓަރު އިޙްސާން ބޭނުންވާ ވަކި ބަޔަކަށް ވިއްކާލާފައިވާ ކަމަށެވެ.

އަދި މިކަމާ ދެކޮޅު ހެދުމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އޭނާއަށް ގުޅުއްވައި އިންޒާރު ދެއްވި ކަމަށާއި، މި ޖަރީމާ ހިންގުމުގައި އެޓަރނީ ޖެނެރަލް އަޙްމަދު އުޝާމް ވެސް ބައިވެރިވެވަޑައިގަންނަވާ ކަމަށް ޝަމްޢާން ވަނީ ވިދާޅުވެފައެވެ.

މީގެ އިތުރުން، ބިދޭސީންގެ ކޯޓާ އާއި ވޯކް ޕާމިޓް ދޫކުރުމުގައި ރިޝްވަތު ނަގާ ކަމުގެ ބޮޑެތި ތުހުމަތުތަކެއް ވެސް އޭނާ ވަނީ ކުރައްވާފައެވެ.

މި ތުހުމަތުތަކާ ގުޅިގެން މިނިސްޓަރު އިޙްސާން އެކްސްގައި ކުރެއްވި ޕޯސްޓެއްގައި ވިދާޅުވީ، ޝަމްޢާން ތަކުރާރުކޮށް ކުރަމުންދާ އެއްވެސް ތުހުމަތަކާ ގުޅޭ ހެއްކެއް ނުވަތަ ޤަރީނާއެއް ނެތް ކަމަށެވެ. އަދި އޭނާ އެ ހަދަނީ ދޮގުކަން މީގެ ކުރިންވެސް މީޑިއާގައި ހާމަކޮށްފައިވާނެ ކަމަށް މިނިސްޓަރު ވިދާޅުވިއެވެ.

"ޝަމްޢާން ފްރޭމްކޮށްފައިވާ ކަމަށް ބުނާ ވާހަކައަކީ ވެސް އެއްވެސް ޙަޤީޤަތެއް އޮތް ވާހަކައެއް ނޫންކަން މި މައްސަލާގައި ފުލުހުން ހޯދާފައިވާ ހެކިތަކުން ސާފުވޭ،" މިނިސްޓަރު އިޙްސާން ވިދާޅުވިއެވެ.

މި މައްސަލާގައި ކަން ހިނގާފައިވާ ގޮތުގެ ތަފްސީލު ރައްޔިތުންނަށް ސާފުކޮށްދިނުމަށް ފުލުހުންގެ މުއައްސަސާގައި އެދިވަޑައިގެންފައިވާނެ ކަމަށް ވެސް ވަޒީރު ވިދާޅުވިއެވެ.

ޝަމްޢާންގެ ޕޯސްޓްގައި އިތުރަށް ބުނެފައިވަނީ، މިދިޔަ ޖެނުއަރީ މަހުގެ 16 ވަނަ ދުވަހު މިކަންކަން ރައީސްގެ ސަމާލުކަމަށް ގެނައުމުން، ރައީސް އެސްޓޯނިއާގައި ހުންނަވައި ދެއްވި ޖަވާބަކީ މިނިސްޓަރު އިޙްސާން ޤާނޫނާ ޚިލާފު އެއްވެސް ކަމެއް ނުކުރައްވާނެ ކަމަށާއި، ޝަމްޢާންގެ ޢަމަލުތަކަކީ ޒާތީ ކަންތައްތަކެއް ކަމަށް ބެލެވޭ ކަމަށެވެ.