ޣައްޒާއަށް އެހީވުމަށް ސުމޫދު ފްލޮޓިލާއިން ބޮޑު ހަރަކާތެއް ފަށަނީ

ފަލަސްތީނުގެ ހައްގުގައި މަސައްކަތްކުރާ ބައިނަލްއަގުވާމީ އެކްޓިވިސްޓުންގެ ގުރޫޕަކުން، މިއަހަރުގެ މާރިޗު މަހުގެ ފަހުކޮޅު ޣައްޒާއަށް އިންސާނީ އެހީ ފޯރުކޮށްދިނުމުގެ ބޮޑު ހަރަކާތެއް ފަށަން ތައްޔާރުވަމުންދާކަން އިއުލާނުކޮށްފިއެވެ.

މި ހަރަކާތުގެ މައިގަނޑު މަގުސަދަކީ ޣައްޒާގެ އާންމުންނަށް ބޭނުންވާ ޒަރޫރީ އެހީތެރިކަން ފޯރުކޮށްދިނުމާއި، އިސްރާއީލުން ކުރިމަތިކޮށްފައިވާ ހިސޯރުކުރުމާއި ދެކޮޅަށް އަޑުއުފުލުމެވެ.

"ގްލޯބަލް ސުމޫދު ފްލޮޓިލާ" އިން އިންތިޒާމުކުރާ މި ހަރަކާތް މާރިޗު މަހުގެ 29 ހިސާބުގައި ފެށުމަށް ތާވަލުކޮށްފައިވާއިރު، މިކަމުގައި 100 އަށްވުރެ ގިނަ ބޯޓާއި 100 އަށްވުރެ ގިނަ ގައުމުން އެތައް ހާސް ބަޔަކު ބައިވެރިވާނެކަމަށް ރިޕޯޓުކޮށްފައިވެއެވެ. މިއީ މިހާތަނަށް ޣައްޒާއަށް އަމާޒުކޮށްގެން ހިންގާ މި ފަދަ އެންމެ ބޮޑު ކަނޑުގެ ހަރަކާތް ކަމަށް އެ ފަރާތުން ސިފަކުރެއެވެ.

ބައިނަލްއަގުވާމީ މީޑިއާތަކުން ރިޕޯޓުކޮށްފައިވާ ގޮތުގައި، މި ބޯޓުތަކުގައި ކާބޯތަކެއްޗާއި ބޭސްފަރުވާގެ ސާމާނު ފަދަ އިންސާނީ އެހީގެ ތަކެތި އުފުލުމަށް ވަނީ ހަމަޖެހިފައެވެ. މީގެ އިތުރުން، ގައްޒާގެ އެތެރޭގައި އިންސާނީ ހާލަތު އިންތިހާއަށް ގޯސްވަމުންދާ ދިއުމަށް ދުނިޔޭގެ ސަމާލުކަން ހޯދުމަކީވެސް މި ހަރަކާތުގެ މުހިންމު އަމާޒެކެވެ. މި ދަތުރުގައި ސިއްހީ މުވައްޒަފުންނާއި، އިންޖިނިއަރުންނާއި އާންމު ވޮލަންޓިއަރުން ބައިވެރިވާއިރު، މި މަސައްކަތުގެ ބައެއްގެ ގޮތުގައި އެއްގަމު މަގުންވެސް އެހީގެ އުޅަނދުތައް ފުރުވުމަށް ވަނީ ރޭވިފައެވެ.

މި ބޯޓުފަހަރުތައް ފުރުމަށް ހަމަޖެހިފައިވަނީ މެޑިޓެރޭނިއަން ކަނޑުގެ އެކި ބަނދަރުތަކުންނެވެ. އޭގެ ތެރޭގައި ބާސެލޯނާ، ޓިއުނިސް އަދި އިޓަލީގެ ބައެއް ސަރަހައްދުތައް ހިމެނެއެވެ. އެކްޓިވިސްޓުން ބުނާ ގޮތުގައި މިއީ އެއްވެސް އަނިޔާވެރިކަމެއް ނެތް، ސުލްހަވެރި ގޮތެއްގައި އެހީ ފޯރުކޮށްދިނުމަށާއި، އިސްރާއީލުގެ ހިސާރުގެ ސަބަބުންނާއި ކުރިއަށްދާ ހަނގުރާމައިގެ ސަބަބުން ޣައްޒާގެ ރައްޔިތުން އުފުލަމުންދާ ބޮޑެތި ތަކުލީފުތައް ދުނިޔެއަށް ހާމަކުރުމަށް ހިންގާ އިންސާނީ ހަރަކާތެކެވެ.

މީގެ ކުރިންވެސް މިފަދަ އެތައް އެހީގެ ބޯޓުފަހަރު ޣައްޒާއަށް ދިއުމަށް މަސައްކަތްކޮށްފައިވާއިރު، އޭގެ ތެރެއިން ގިނަ ދަތުރުތައް އިސްރާއީލުގެ ސިފައިން ވަނީ ހުއްޓުވާފައެވެ. ޣައްޒާގެ ބޯޑަރުތައް ހަރުކަށިކޮށް ކޮންޓްރޯލް ކުރަމުންދާ އިސްރާއީލުން ބުނާ ގޮތުގައި މި ހިސާރަކީ ސަލާމަތީ ފިޔަވަޅެކެވެ. ނަމަވެސް، މީގެ ސަބަބުން އަސާސީ އެހީތެރިކަން ފޯރުކޮށްދިނުމަށް ބޮޑެތި ހުރަސްތަކެއް ދަނީ ކުރިމަތިވަމުންނެވެ. މީގެ ކުރިން ކުރި ދަތުރުތަކުގައި ބައިވެރިވި މީހުން ކަނޑުމަތިން ހިފަހައްޓައި، ހައްޔަރުކޮށް، ފަހުން ޑީޕޯޓްކޮށްފައިވާތީ، މާރިޗު މަހަށް ރާވާފައިވާ މި ދަތުރުގައިވެސް ބޮޑެތި ނުރައްކާތަކެއް ހުރިކަން ފާހަގަކުރޭކަމަށް ކަމާބެހޭ ފަރާތްތަކުން ބުނެއެވެ.