ދެން ވެސް ދިވެހިންނަށް ހެޔޮގޮތް ހޯދައިދޭނީ އެމްޑީޕީން: ރައީސް ނަޝީދު

ދެން ވެސް ދިވެހިންނަށް ހެޔޮގޮތް ހޯދައިދޭނީ އެމްޑީޕީން ކަމަށް ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.

އެމްޑީޕީގެ ޗެއާޕާސަންގެ މަގާމުގައިވެސް ހުންނެވި ރައީސް ނަޝީދު މިހެން ވިދާޅުވީ މިރޭ ފެށި އެ ޕާޓީގެ ކޮންގްރެސްގައި ވާހަކަފުޅު ދައްކަވަމުންނެވެ.

މާލެ ސިޓީ ކައުންސިލްގެ ހޯލްގައި ކުރިއަށްދާ އެމްޑީޕީގެ ފަސްވަނަ ކޮންގްރެސް ފެށުމުގެ ރަސްމިއްޔާތުގައި ނަޝީދު ވަނީ އެމްޑީޕީގެ ސަރުކާރުން ރާއްޖެއަށް ގެނައި ހެޔޮ ބަދަލުތައް ފާހަގަ ކުރައްވާފަ އެވެ.

ވިދާޅުވީ އެހީތެރިކަން ދޭން ޖެހޭ އެކި ފަރާތްތަކަށް އިނާޔަތްދޭން ފެށުމާއި ފޮތް ފަންސޫރު ހިލޭ ކުރުމާއި ބޭސްފަރުވާއަށް ސަލާން ޖެހުން ނައްތާލި ޕާޓީއަކީ އެމްޑީޕީ ކަމަށެވެ. އަދި ދަތުރުފަތުރުން ގުޅާލާ ރަށު ބަންދުން ރައްޔިތުން ވީއްލަދިން ޕާޓީއަކީ އެމްޑީޕީ ކަމަށެވެ.

ދެން ވެސް ދިވެހިންނަށް ހެޔޮގޮތް ހޯދައިދޭނީ އެމްޑީޕީން ކަމަށް ވިދާޅުވެ ދެން އުފެދޭނީ އެމްޑީޕީގެ ސަރުކާރެއް ކަމަަށް ވެސް ވިދާޅުވި އެވެ.

ނަޝީދުގެ ވާހަކަފުޅުގައި ރައީސް މުޢިއްޒުގެ ވެރިކަމަށް ވަރަށް ބޮޑަށް ފާޑުވިދާޅުވި އެވެ. މިއީ ތަނެއް ދޮރެއް ނޭންގޭ ގަމާރުން ތިބި ސަރުކާރެއް ކަމަށް ވިދާޅުވެ މިވެރިކަން ބަދަލު ކުރާނެ ކަމަށް ވެސް ވިދާޅުވި އެވެ.

"އަޅުގަނޑުމެންގެ އިސްތިގުލާލު، އަޅުގަނޑުމެންގެ މިނިވަންކަން ގެއްލި ބުރޫއަރާ ދާނީ އަޅުގަނޑުމެންގެ ވެރިންނަށް ތަނެއް ދޮރެއް ނޭނގުނީމާ. މިތިބަ ގަމާރުން އަޅުގަނޑުމެންގެ ތެރޭގައި ވެރިކަމުގައި ބަހައްޓަން ޖެހުނީމާ،" ރައީސް ސޯލިހްގެ ހާރިޖީ ސިޔާސަތަށް ފާޑުވިދާޅުވަމުން ނަޝީދު ވިދާޅުވި އެވެ.