ދައުލަތުގެ ވަކީލުން ބަލިވެ އުޅޭތީވެ، ރައީސް ޔާމީނުގެ ޝަރީއަތުގެ އަޑުއެހުން ފަސްކޮށްފި
ރ. ފުއްގިރި މައްސަލައިގައި ކުރީގެ ރައީސް ޢަބްދުﷲ ޔާމީނާ ދެކޮޅަށް ކުރާ ދައުވާގެ މާދަމާގެ އަޑުއެހުން ދައުލަތުގެ ވަކީލުން ބަލިވެ އުޅޭތީ ފަސްކޮށްފިއެވެ.
އެ އަޑުއެހުން ކެންސަލް ކުރީ ދައުލަތުގެ ފަރާތުން މައްސަލައިގައި ހާޒިރުވާ ވަކީލުން ބަލިވެ އުޅޭ ކަމަށް ބުނެ ދައުލަތުން އެދުމުންނެވެ. ފުއްގިރި ކުއްޔަށް ދިނުމާ ގުޅޭ މި މައްސަލައިގައި ރައީސް ޔާމީންގެ މައްޗަށް އުފުލާފައި ވަނީ އެއް މިލިއަން ޑޮލަރުގެ ރިޝްވަތު ގަބޫލު ކުރެއްވުމާއި ފައިސާ ލޯންޑާ ކުރެއްވުމުގެ ދައުވާއެވެ.
މި ދައުވާގައި ހެކިބަސް ނެގުމުގެ މަރުހަލާ މިހާރު ނިމިފައިވާ އިރު ދެން އޮތީ ހެއްކާ ބެހޭ ގޮތުން ދެ ފަރާތުން ވާހަކަ ދެއްކުމުގެ މަރުހަލާއެވެ. ނަމަވެސް އެ ހިސާބުގައި މައްސަލަ ހުއްޓިފައި އޮންނަތާ ގިނަ ދުވަސްތަކެއް ވެފައިވެއެވެ.
ޔާމީންގެ މައްޗަށް ދައުލަތުން ވަކިން ކުރާ އާރަށް މައްސަލައިގެ އަޑުއެހުމެއް އަންނަ ހަފުތާއަށް ތާވަލުކޮށްފައިވެއެވެ. އެ މައްސަލައިގައި ކްރިމިނަލް ކޯޓުން ކުރިން އިއްވި 11 އަހަރުގެ ޖަލު ޙުކުމް ހައި ކޯޓުން ބާޠިލުކޮށް އަލުން ބެލުމަށް އެ މައްސަލަ ވަނީ ތިރީ ކޯޓަށް ފޮނުވައިފައެވެ.
އާރަށް މައްސަލައާ ގުޅޭ ގޮތުން ދައުލަތުން ހުށަހެޅި އައު ހެކިތައް ބަލައިނުގަނެވޭނެ ކަމަށް ސުޕްރީމް ކޯޓުން ނިންމައިފައިވާ އިރު އެ ކޯޓުން ވަކި ގޮތެއް ކަނޑައެޅެންދެން ކްރިމިނަލް ކޯޓުގައި އެ މައްސަލައިގެ ޝަރީޢަތް ވަނީ މެދުކަނޑައިލައިފައެވެ.
ޔާމީންގެ ދެ މައްސަލައިގެ ޝަރީޢަތް ވެސް ކުރިއަށް ގެންދެވޭ ގޮތް ނުވެ ލަސްވަމުންދާ ކަން ފާހަގަކުރެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
