ތިން ރަށެއްގައި އާ ހޮސްޕިޓަލް އެޅުމުގެ މަސައްކަތް ފެށުމަށް އެމްޓީސީސީއާ ހަވާލުކޮށްފި

ތިން ރަށެއްގައި އާ ހޮސްޕިޓަލް އެޅުމުގެ މަސައްކަތް ފެށުމަށް އެމްޓީސީސީއާ މިއަދު ހަވާލުކޮށްފި އެވެ.

އެގޮތުން ހޮސްޕިޓަލް އެޅުމަށް ހަވާލުކޮށްފައިވަނީ ނ.މަނަދޫ، ރ.އަލިފުށި އަދި މ.މުލީގައެވެ.

ސިއްޙީ ވުޒާރާއިން ހާމަކުރެއްވި ގޮތުގައި ނ.މަނަދޫ އަދި މ.މުލީގައި އަޅަން ހަވާލުކޮށްފައި ވަނީ 50 އެނދުގެ ހޮސްޕިޓަލު ތަކެކެވެ. މިއިން ހޮސްޕިޓަލަކަށް 185 މިލިއަން ރުފިޔާ ހޭދަވާއިރު އެއްބަސްވެވިފައިވަނީ ދެ އަހަރު ދުވަހުގެ ތެރޭގައި މި ދެ ހޮސްޕިޓަލް އަޅާ ނިންމުމަށެވެ. މި ދެ ރަށުގައި ހޮސްޕިޓަލް އެޅުމަށް ސިއްހީ ވުޒާރާއިން ނިންމަވާފައިވަނީ އެ ދެ ރަށުގައި މިހާރު ހުރި ހޮސްޕިޓަލްތައް ގިނަދުވަސްވެ ޢިމާރާތްތައް ވީރާނާވާން ފަށާފައިވާތީއެވެ.

ރ.އަލިފުށީގައި އަޅަން ހަމަޖެހިފައިވަނީ 30 އެނދުގެ ހޮސްޕިޓަލެކެވެ. މި ހޮސްޕިޓަލް އެޅުމަށް ޖުމުލަ 128 މިލިއަން ރުފިޔާ ހޭދަވާނެކަމަށް ސިއްޙީވުޒާރާއިން ވަނީ ހާމަކުރައްވާފައެވެ. މި ހޮސްޕިޓަލް އެޅުމަށް ދީފައިވާ މުއްދަތަކީ 730 ދުވަހެވެ. އަލިފުށީގައި ހޮސްޕިޓަލެއް އެޅުމަށް ސަރުކާރުން ނިންމަވާފައިވަނީ އެއަތޮޅުގަިއ ރީޖަނަލް ހޮސްޕިޓަލް ހުންނަ އުނގޫފާރާ އަލިފުށްޓާ ދުރުވުމުގެ ސަބަބުން ރައްޔިތުންނަށް ވާ އުނދަގޫ ލުއި ކޮށްދިނުމަށެވެ.

މި ތިން ހޮސްޕިޓަލްވެސް އަޅަން ހަމަޖެހިފައިވަނީ ކޮވިޑް ފަދަ ބަލިތަށް ފެތުރޭ ޙާލަތް ތަކުގައި ހޮސްޕިޓަލުގެ އޮޕަރޭޝަން ނުހުއްޓި ކުރިޔަށް ގެންދިޔުމަށް ފްލޫ ކްލިނިކާއި، އައިސޮލޭޝަން ފެސިލިޓީ ހިމެނޭހެންނެވެ. މީގެ އިތުރުން ހޮސްޕިޓަލުގައި ބޭނުންކުރާ ހަކަތައިގެ ޚަރަދު ކުޑަ ކުރުމުގެ ގޮތުން ކޮންމެ ހޮސްޕިޓަލެއްގައި ސޯލާ ޕީވީ ސިސްޓަމް ހަރުކުރުމަށް ވަނީ ހަމަޖެހިފައެވެ. މީގެ އިތުރުން ހޮސްޕިޓަލުގެ ހުރިހާ އެނދަކަށް ޕައިޕްޑް އޮކްސިޖަން، މެޑިކަލް އެއާ އަދި ސަކްޝަން އަޅަންވެސް ވަނީ ހަމަޖެހިފައެވެ.

ސިއްހީ ވުޒާރާއިން ހާމަކުރެއްވި ގޮތުގައި މި ހޮސްޕިޓަލްތަކަކީ ސަރުކާރުން އަތޮޅުތަކުގައި ދޭ ސިއްހީ ޚިދުމަތް ފުޅާކުރުމަށް ކުރާ މަސައްކަތުގެ ދަށުން އަޅާ ހޮސްޕިޓަލްތަކެކެވެ.