މާލެ އަތޮޅުގައި ހިންގާ ފަޅު ފުންކުރުމާއި ހިއްކުމުގެ މަޝްރޫޢުތަކާ ގުޅިގެން އީޕީއޭއަށް ލިބޭ ޝަކުވާ އިތުރުވެއްޖެ

މާލެ އަތޮޅުގައި ހިންގާ ފަޅު ފުންކުރުމާއި ހިއްކުމުގެ މަޝްރޫޢުތަކާ ގުޅިގެން, އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީޕީއޭ) އަށް ލިބޭ ޝަކުވާ އިތުރުވެފައިވާކަމަށް އެ އޮތޯރިޓީން ބުނެފިއެވެ.

އީޕީއޭއިން އާއްމުކުރި ބަޔާނެއްގައި ބުނީ ދިވެހިރާއްޖޭގެ ރަށްރަށާއި ފަޅުގެ ސަރަހައްދު ހިއްކުމާއި ފުންކުރުމުގެ ގަވާއިދުގެ ދަށުން ހުއްދަ ދީގެން މާލެ އަތޮޅުގައި ކުރިއަށްގެންދާ ފަޅު ފުންކުރުމާއި ހިއްކުމުގެ މަޝްރޫޢުތަކާ ގުޅިގެން، ގިނަ އަދަދެއްގެ ޝަކުވާތައް އެ އޮތޯރިޓީއަށް ލިބެމުންދާކަމަށެވެ.

އީޕީއޭއިން ބުނީ  އެ އޮތޯރިޓިއަށް ލިބެމުންދާ ޝަކުވާތަކުގެ ތެރޭގައި، ތިމާވެށްޓަށް ކުރާ ނޭދެވޭ އަސަރުތައް ކުޑަކުރުމަށް އަޅަންޖެހޭ ފިޔަވަޅުތައް އެޅުމެއްނެތި މަސައްކަތް ކުރުމާއި، ވެލި ނެގުމަށް ހުއްދަ ދީފައިވާ ސަރަހައްދުތަކުން ބޭރުން ވެލި ނެގުން ހިމެނޭކަމަށެވެ. މީގެ އިތުރުން މޫސުން ގޯސްވެ މޫސުމާ ބެހޭ އިދާރާއިން ރިނދޫ ސަމާލް ނެރެފައި އޮންނައިރުވެސް މަސައްކަތް ކުރިއަށް ގެންދާކަމަށް އެ އޮތޯރިޓީން ވަނީ ބުނެފައެވެ.

އީޕީއޭއިން ބުނީ އެ އޮތޯރިޓީއަށް ހުށަހެޅިފައިވާ މައްސަލަތައް ބަލައި މޮނީޓަރ ކުރަމުންދާކަމަށެވެ. އެގޮތުން ހުއްދަތަކާ ހިލާފަށް މަސައްކަތްކުރާ ފަރާތްތަކާމެދު ގާނޫނީ ފިޔަވަޅު އަޅާނެކަމުގެ އިންޒާރުދެމުން އީޕީއޭއިން ވަނީ، މަޝްރޫޢުތައް ހިންގާ ފަރާތްތަކުން އޮތޯރިޓީއިން ފާސްކޮށްފައިވާ ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓުތަކާއި ދޫކޮށްފައިވާ ހުއްދަތަކާ އެއްގޮތަށް މަސައްކަތްކުރުމަށް އިލްތިމާސްކޮށްފައެވެ.