6 މަސް ތެރޭގައި އިހުމާލުގެ 158 މައްސަލަ ހުށަހަޅާފައިވޭ: ސީއެފްޕީއެސް

މިދިޔަ އަހަރުގެ ފަހު ހަ މަސްދުވަހުގެ ތެރޭގައި ޗައިލްޑް އެންޑް ފެމެލީ ޕްރޮޓެކްޝަން ސަރވިސްއަށް އިހުމާލުގެ 158 މައްސަލައެއް ހުށަހަޅާފައިވާ ކަމަށް އެ އޭޖެންސީން ބުނެފިއެވެ.

އެ އޭޖެންސީއަސް ހުށަހަޅާފައިވާ މައްސަލަތަކުގެ ތެރޭގައި ހިމެނެނީ އަންހެން ކުދިންނަށް އިހުމާލުވި 77 މައްސަލައާއި، ފިރިހެން ކުދިންނަށް އިހުމާލުވި 81 މައްސަލައެވެ.

އެ އޭޖެންސީގެ ޗައިލްޑް ޕްރޮޓެކްޝަން އޮފިސަރ ފާތިމަތު ވަރުދާ  ވަލީދު ވިދާޅުވީ، އިހުމާލުގެ މައްސަތަކުގައި ޗައިލްޑް އެންޑް ފެމެލީ ޕްރޮޓެކްޝަން އޭޖެންސީން އަމަލު ކުރާ ގޮތަކީ، ހުށަހެޅޭ އިހުމާލުގެ ކުޑަ ބޮޑުމިނަށް ބެލުމަށްފަހު ހާލަތު ވަޒަން ކުރާ ކަމަށެވެ.

އެގޮތުން ހާލަތު ވަޒަން ކުރުމަށްޓަކައި، އިހުމާލުގެ މައްސަލަތަކުގައްޔާއި އެހެނިހެން މައްސަލަތަކުގައި އަމަލު ކުރާ ގޮތަކީ، ކުއްޖާ ދިރިއުޅޭ މާހައުލަށް ޒިޔާރަތް ކުރުމަށްފަހު ކުއްޖާގެ ވަށައިގެން ކަންކަމަށް ރިޢާޔަތްކޮށް، ކުއްޖާއާއެއްކޮށް ވޭދަނައިގެ މަސައްކަތް ކުރަނީ ކަމަށް އެ އޭޖެންސީން ބުންޏެވެ.

"މިގޮތަށް މަސައްކަތް ކުރާއިރުގަ އިހުމާލުގެ މައްސަލަތަކުގެ ކުޑަބޮޑުމިނަށް ބަލާފަ އަޅުގަނޑުމެން ކުއްޖާގެ އާއިލާ އިތުރަށް ހޭލުންތެރި ކުރުވުމަށްޓަކާ ކުއްޖާގެ އާއިލާއާ އެއްކޮށް ސެޝަންތައް ނަގަން،" އެ އޭޖެންސީން ބުންޏެވެ.

އެ އޭޖެންސީއަށް ހުށަހަޅާ މައްސަލަތަކުގެ ތެރޭގައި، ކުއްޖާއަށް ސިއްހީ ހިދުމަތް ފޯރުކޮށްދިނުމުގައި އިހުމާލު ވުމުގެ މައްސަަލަތަކާއި ތައުލީމު ފޯރުކޮށްދިނުމާއި ރައްކާތެރިކަމާ ގުޅުންހުރި މައްސަލަތައް ސިއްރު ކުރުމުގައި ވެވޭ އިހުމާލުތައްވެސް ހިމެނޭކަމަށް އެ އޭޖެންސީން ބުންޏެވެ.