ޑްރަގްކެފޭ އިސްތިހާރުކުރީ ހޯމް މިނިސްޓްރީއާއި ފުލުހުން: ބޮންޑާ
ޑްރަގް ކެފޭތަކުގެ ގޮތުގައި މާލޭގައި ހިންގަމުންދާ ތަންތަން އިސްތިހާރުކުރީ ހޯމް މިނިސްޓްރީއާއި ފުލުހުންކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ބޮންޑެ ވިދާޅުވީ އެމްޑީޕީން ވެރިކަމަށް އައީ ޑްރަގާއި ދެކޮޅަށް މަސައްކަތް ކުރާނެކަމުގެ ވައުދުވެގެން ކަމަށެވެ. އެހެން ނަމަވެސް، މި ވެރިކަމުގައި ޑްރަގު އާންމުކޮށްފައިވާ ކަމަށާއި ޑްރަގު އާންމުވާ މައްސަލައަށް ސަރުކާރުން އަޅާވެސް ނުވާކަމަށް އޭނާ ވިދާޅުވި އެވެ.
ބޮންޑެ ވިދާޅުވީ މާލޭގައި ޑްރަގް ކެފޭތައް ހިންގާ ކަމަށާއި އެ ތަންތަނާއި ބެހޭ މައުލޫމާތުތައް ހޯމް މިނިސްޓްރީންނާއި ފުލުހުން ފޯރުކޮށްދީ އެ ތަންތަން އާންމުކޮށްފައިވާ ކަމަށެވެ. ކަންކަން މަތީގައި މަސްތުވާތަކެތި ވިއްކުމަށް ތުއްތު ކުދިން ތިބޭކަން އެ މުއައްސަސާތަކަށްވެސް އެނގޭ ކަމަށާއި، އެހެން ނަމަވެސް އެކަންކަން ހުއްޓުވުމަށް އެއްވެސް ފިޔަވަޅެއް އަޅަމުން ނުދާކަމަށް އޭނާ ވިދާޅުވި އެވެ.
"މާލޭގައި ޑްރަގު ކެފޭ ހަދާ އިސްތިހާރުކޮށްފި. މި ހޯމް މިނިސްޓްރީން އިސްތިހާރު ކުރީވެސް. ފުލުހުންވެސް އިސްތިހާރު ކުރަނީ. ޑްރަގު ކެފޭ އެއީ މާލޭގައި ހުންނަ އެއްޗެއް ކަމާއި.. އަޅުގަނޑު ތަކުރާރުކޮށް ފުލުސް އޮފީހަށް ކޮމިޝަނާ އޮފް ޕޮލިހަށްވެސް ހިސާބުގަނޑު ތަންތަނުން މަސްތުވާތަކެތީގެ މައްސަލައިގެ ޝަކުވާތައް އަންނާތީ ގޭގޭދޮށުގައި ބޯތީވެ ޝަކުވާކުރީމަ އަޅައެއް ނުލައޭ އިއްޒަތްތެރި ރައީސް، ސަރުކާރެއް އޮތް ހެން ހީވެސް ނުވޭ"
މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ)
ބޮންޑެ އިތުރަށް ވިދާޅުވީ މަސްތުވާތަކެތި ބޭނުން ކުރާ މީހުންނަށް ފަރުވާދީ އެމީހުން އަނބުރާ މުޖުތަމައަށް ގެނައުމަށް ފަރުވާ ދިނުމާއި ބެހޭ ގަވައިދުތައް ރައީސް މުހައްމަދު ނަޝީދުގެ ވެރިކަމުގައި އެކުލަވާލެވިފައިވާ ކަމަށެވެ.
އެހެން ނަމަވެސް އެ ގަވައިދުތަކާއި ގާނޫނު ތަކަކީ ރައީސް ނަޝީދުގެ ވެރިކަމުގައި ހެދިފައިވާ ގަވައިދުތަކަށް ވީތީ އެ ގަވައިދުތައް ތަންފީޒު ނުކުރާނެކަމަށް ހޯމް މިނިސްޓަރު އިމްރާނު ވިދާޅުވަމުންދާކަމަށް ބޮންޑެ ވިދާޅުވިއެވެ.
އޭގެ އިތުރުން ބޮންޑެ ވިދާޅުވީ މަސްތުވާތަކެތި ބޭނުންކުރާ ފަރާތްތަކާއި ދޭތެރޭ ފިޔަވަޅުވެސް އަޅަމުން ނުދާކަމަށެވެ. ރައީސް އޮފީހުގެ ސިޔާސީ މަގާމެއްގައި ހުންނެވި ބޭފުޅަކު މސްތުވާތަކެތި ބޭނުން ކުރި މައްސަލައިގައި ގެއަށް ފޮނުވާލާފައިވާކަން ފާހަގަކޮށް ބޮންޑާ ވިދާޅުވީ ސިޔާސީ މީހެއްވިޔަސް މަސްތުވާތަކެތި ބޭނުންކުރުމުން ފިޔަވަޅު އަޅަން ޖެހޭ ކަމަށެވެ.
އެހެން ނަމަވެސް ސަރުކާރަށް ތާއީދު ކުރާތީ ނުވަތަ ސިޔާސީ ފަރާތަކަށް ވީތީ ފިޔަވަޅު ނާޅާ ދޫކޮށްލާއިރު، ޑްރަގުގެ ވިޔަފާރި ކުރާ ފަރާތްތައްވެސް ސަރުކާރުން ދޫކުރަމުންދާކަމަށް އޭނާ ވިދާޅުވިއެވެ.
ރާއްޖޭގައި ޑްރަގު އާންމުވެފައި އޮތް މިންވަރަށް ބަލާއިރު މިތަނުގައި ދައުލަތެއް އޮތް ކަމުގެ އިހުސާސްވެސް ނުކުރެވޭކަމަށް ބޮންޑެ ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
