ލަޒާނިއާ ރޯލް އަޕްސް މިއީ ނުހަދާ ދޫކޮށްލާވަރު އެއްޗެއް ނޫން!

މިއަދު "ވޮއިސް" ގެ ބަދިގެއިން މި ގެނެސްދެނީ ވަރަށް މީރު ކޮށް ލަޒާނިއާ ރޯލް އަޕްސް ހަދާނެ ގޮތެވެ. ކިޔުން ތެރިންނަށް ކަމުދާނެ ކަމަށް އުއްމީދު ކުރަމެވެ.

މީޓް ސޯސް އަށް ބޭނުންވާ ތަކެތި

1 މޭޒުމަތީ ސަމުސާ އޮލިވް އޮއިލް

1 ކިލޯ މިންސްޑް ބީފް ( ނުވަތަ މިކްސަރުން މުގުރާފައި ހުރި ބީފް)

1 ޖޯޑު ޕިއްޒާ ސޯސް

1 ދަޅު ޓޮމާޓޯ ޕޭސްޓް

2 ފިޔާ (ކުދިކޮށް ކިޔުބްކޮށް ކޮށާފަ)

4 ލޮނުމެދު ( ކުދިކޮށް ކިޔުބްކޮށް ކޮށާފައި)

1/2 ސައި ސަމުސާ މުގުރި އަސޭމިރުސް

1/2 ސައި ސަމުސާ އޮރެގާނޯ ޕައުޑަރ

ރަހަލާ ވަރަށް ލޮނު

1 ޖޯޑު ޕާމޭސަން ޗީޒް (ގާނާފައި، މައްޗަށް އެޅުމަށް)

12 ލަޒާނިއާ ޝީޓް (ލަޒާނިއާ ޝީޓް ޕެކެޓް ގައިވާ ގޮތައް ކައްކާފައި)

ވައިޓް ސޯސް އަށް ބޭނުންވާތަކެތި:

1/4 ޖޯޑު ޕާމޭސަން ޗީޒް (ގާނާފައި)

2 ދަޅު ނެސްލޭ ކްރިމް

1 ބިސް

1 ޖޯޑު މޮޒަރެއްލާ ޗީޒް ( ގާނާފައި)

ވައިޓް ސޯސް ހެދުމަށް މި ހުރިހާ ތަކެތި ތަށްޓެއްގެ ތެރޭގައި ރަނގަޅަށް އެކުލަވައިލާށެވެ.

މީޓް ސޯސް ހަދާނެގޮތް:

1) އޮލިވް އޮއިލް ފޮދެއްގައި، މުގުރާފައި ހުރި ބީފް ކޮޅު ރޯފިލުވާލާށެވެ.

2) ބީފްގެ ރަނގަޅަށް ރޯފިލުމުން ފިޔާ، ލޮނުމެދު، އަސޭމިރުސް، އަދި އޮރެގާނޯ މަސްގަނޑު ތެރެއަށް އަޅައިގެން 5 މިނިޓް ވަރު ވަންދެން ކައްކާލާށެވެ.

3) ދެން ޕިއްޒާ ސޯސް އަދި ޓޮމާޓޯ ޕޭސްޓު އަދި ލޮނު އެޅުމަށްފަހު ރަނގަޅަށް ކައްކާލާށެވެ.

4) މީޓް ސޯސް ތައްޔާރު ވުމުން ބޭކިންގ ޓްރޭ އެއްގެ ތެރޭގައި ލަޒާނިއާ ޝީޓްސް އަތުރާލާށެވެ.

5) އެއަށްފަހު އޭގެ މަތީގައި ވައިޓް ސޯސް ރަނގަޅަށް އަތުރާލާށެވެ.

6) ދެން ރަނގަޅަށް މީޓް ސޯސް އެޅުމަށްފަހު ކޮންމެ ޝީޓެއް ވަކިން އޮޅާލާފައި ޓްރޭގައި ރީތިކޮށް އަތުރާލާށެވެ.

7) ދެން ބާކީ ހުރި މީޓް ސޯސް އާއި ވައިޓް ސޯސް ހުރި ނަމަ އެ ވެސް ރޯލްސް މަތީގައި އަތުރާލާށެވެ.

8) އެއަށްފަހު އޭގެ މައްޗަށް ގާނާފައި ހުރި ޗީޒު އަޅާލުމަށްފަހު އަވަނަށް ލައިގެން ފިހެލާށެވެ.