ޕާކިސްތާނުން އަލަށް މަކުނު ވިދުރި ފެނިއްޖެ

އަވަށްޓެރި ޕާކިސްތާނުން އިންސާނެއްގެ ގައިން އަލަށް މަކުނު ވިދުރި (މަންކީޕޮކްސް) ފެނިއްޖެ ކަމަށް އެޤައުމުގެ ކަމާއި ބެހޭ އިދާރާ އިން ހާމަކޮށްފިއެވެ.

ދާދި ފަހުން ސަޢުދީޢަރަބިއްޔާ އަށް ދަތުރުކޮށްފައި އައި 25 އަހަރުގެ ޕާކިސްތާނުގެ ފިރިހެނެއްގެ ގައިން މި ވައިރަސް ފެނިފައި ވާކަން ޕާކިސްތާނުގެ ކަމާއި ބެހޭ އިދާރާއިން ވަނީ ޔަޤީން ކޮށްދީފައެވެ.

ހެލްތް މިނިސްޓްރީގެ އޮފިޝަލް ސާޖިދް ޝާހް ބުނެފައިވަނީ ވައިރަހަށް ޕޮޒިޓިވް ވި މީހާ މިހާރު އިސްލާމް އާބާދުގެ ހޮސްޕިޓަލެއްގައި އެކަހެރި ކުރެވިފައި ވާކަމަށެވެ. އަދި އޭނާ އާއި އެއްތަންވެ ބައްދަލުވި މީހުން ދެނެގަނެ ޓެސްޓް ކުރުމުގެ މަސައްކަތްވެސް ކުރިއަށް ދާ ކަމަށް ސާޖިދް ވަނީ ބުނެފައެވެ.

"ޕާކިސްތާނުގެ އެތެރޭގައި މި ބަލި ފެތުރެމުންދާ ކަމުގެ ހެއްކެއް އަދި ފެނިފައެއް ނުވޭ، ޤައުމުން ބޭރުން އައި އެއްޗެެއް ކަމުން މިހާރު ދައްކާ ގޮތުން މި ކަމުގެ ރިސްކު އެހާ ބޮޑެއް ނޫން" ސާޖިދު ޝާހް ބުނެފައިވެއެވެ.

އަދި މިގެ އިތުރުން އޭނާ ބުނެފައިވަނީ މަންކީޕޮކްސްގެ މި ވޭދަނަ ފެނުމާއި އެކު އެއަރޕޯޓް ތަކާއި ޕްރޮވިންޝަލް ހެލްތް ޑިޕާޓްމެންޓް ތައްވެސް އެލާޓަށް ގެނެސްފައި ވާކަމަށެވެ. އަދި ޝައްކު ކުރެވޭ ފަދަ ވޭދަނައެއް ނަމަ ކޮންޓެކްޓް ޓްރޭސިން ހެދުމަށާއި ބަލި ދެމެގަތުމަށް ބޭނުންވާ މައުލޫމަލޫމާތު އެފަރާތް ތަކަށް ފޯރުކޮށްދީފައި ވާކަމަށެވެ.

ޕާކިސްތާން ހެލްތް މިނިސްޓްރިގެ އިސް އޮފިޝަލެއް ކަމަށްވާ މުޞްޠަފާ ޖަމާލް ކާޒީ ބުނެފައިވަނީ މަންކީޕޮކްސް އަށް ފައްސި ވި މީހާ އެކަހެރި ކޮށްފައިވަނީ މިމަހު 12 ވަނަ ދުވަހު ކަމަށެވެ.

"އޭނާ ފަރުވާ ހޯދުމަށް އައިރު ވަރަށް ބަލި، ވަރަށް ހާލު ދެރަ، އެހެންވެ ވަގުތުން އޭނާ އެކަހެރި ކުރުމަށް ހޮސްޕިޓަލަކަށް ގެންދެވުނީ، އެއަށް ފަހު ޓެސްޓް ތައް ހަދައި އޭނާގެ ބަލީގެ އަސްލު ސަބަބު ދެނެގަތީ" މުޞްޠަފާ ބުނެފައިވެއެވެ.

މުޞްޠަފާ ބުނެފައިވަނީ އެހެން ޤައުމު ތަކުގައި މަންކީޕޮކްސް ފެތުރެން ފެށުމާއި އެކު ޕާކިސްޠާނުގެ ހެލްތް ވޯކަރުންނަށް އެކަމާއި ގުޅުން ހުރި ތަމްރީނު ތައް ދެވިފައި ވާކަމަށެވެ. އަދި ބައިނަލް އަޤްވާމީ މިންގަނޑު ތަކާއި އެއް ގޮތް ވާގޮތުގެ މަތިން ރައްކާތެރި ކަމުގެ ފިޔަވަޅުތައް ވެސް އަޅަން ފަށައިފައި ވާކަމަށެވެ.

މަންކީޕޮކްސް އަކީ މަންކޯޕޮކްސަ ވައިރަސް ގެ ސަބަބުން ފެތުރޭ ބައްޔެކެވެ. މި ބަލި ފެތުރެނީ ބަލި ޖެހިފައިވާ އިންސާނުން ނުވަތަ ޖަނަވާރުގެ ޒަރީއައިންނެވެ. ގަައިގޯޅިވުމާއި  ވައިރަސް ޖެހިފައިވާ މިހާގެ ބޮޑީ ފްލަޑްގެ ސަބަބުންނެވެ. އަދި މިބަލީގެ ސަބަބުން ގައިގައި ރަތް ބިހިތަކެއް ނަގައެވެ. އަދި ގަދަޔަށް ހުން އައުމާއި ކަރުތެރެ ދުޅަވުމާއި ލިމްޕް ނޮޑްސް ދުޅަވުން ހިމެނެއެވެ.