ޖަލު ގައިދީންނަށް ވުރެ އަތޮޅު ތެރޭގެ ފުލުހުން ނިދައި ކައިބޮއި ހަދަން ޖެހޭ ތަނުގެ ހާލު ބޮޑު: ޢިމްރާން

ޖަލުގައި ހާލަތު ރަނގަޅުކޮށް ތިބޭ ގައިދީންނަށް ވުރެ އަތޮޅު ތެރޭގެ ފުލުހުން ނިދައި ކައިބޮއި ހަދަން ޖެހޭ ތަނުގެ ހާލު ބޮޑު ކަމަށް ހޯމް މިނިސްޓަރު އިމްރާން އަބްދުالله ވިދާޅުވެއްޖެއެވެ.

ފުލުހުންގެ 90 ވަނަ އަހަރީ ދުވަސް ފާހަގަކުރުމުގެ ގޮތުން ރޭ ބޭއްވި ޖަލްސާގައި ވާހަކަދައްކަވަމުން ޢިމްރާން ވިދާޅުވީ، ފުލުހަކަށް ވުމަކީ ވަރަށް ތަފާތު އިހުސާސްތަކަކާއެކު ހަޔާތުގެ ކޮންމެ ދުވަހެއް, ގަޑިއެއް, މިނިޓެއް, އަދި ސިކުންތެއް ހޭދަކުރަންޖެހޭކަމެއް ކަމަށެވެ. ފުރިހަމަ ފުލުހަކަށް ވުމަކީ އޭނާގެ ދިރިއުޅުމާއި, އުޅުމާއި ގުޅުންތައް އަދި ބަސްމޮށުންތެރިކަމާއި, މުއާމަލާތްކުރުން މުޅިން އެހެން ލެވެލްއަކަށް ގެންދަންޖެހޭ ޒިންމާއެއްކަންވެސް މިނިސްޓަރ ފާހަގަކުރެއްވިއެވެ. ޢިމްރާން ވިދާޅުވީ ބިންމައްޗަށް ނޭވާލާ އިންސާނިއްޔަތެއް ދިރިއުޅޭ ކޮންމެ މުޖުތަމައުއަކަށް ކަށަވަރުވާންޖެހޭ އެންމެ އަސާސީ ދެ ކަމުންކުރެ އެއް ކަމަކީ އިންސާނާގެ ފުރާނަޔާއި, ހަށިގަނޑާއި މުދަލަށް ލިބިދޭންޖެހޭ ރައްކާތެރިކަމާއި, ސަލާމަތާއި އަމާންކަން ކަށަވަރުވުންކަމަށެވެ. މިއަދުގެ ތަހުޒީބު މުޖުތަމައުތަކުގައި މިޒިންމާ ހަވާލުކުރެވިފައިވަނީ ޔުނީފޯމް އަޅުވާފައިތިބޭ ފުލުހުންނާކަންވެސް މިނިސްޓަރ ފާހަގަކުރެއްވިއެވެ.

ޢިމްރާން ވިދާޅުވީ، މި ވޭތުވެދިޔަ ދުވަސްތަކުގައި އެކި ރަށްރަށަށް ދަތުރުކޮށް ފުލުހުންނާއި ބައްދަލު ކުރެވޭއިރު، ފުލުހުންގެ ދިރިއުޅުމުގެ ހާލަތަށް ބަލައިލުމުން އަސަރު ކުރާ ކަމަށެވެ.

"ޖަލުގައި ހާލަތު ރަނގަޅުކޮށް ތިބޭ ގައިދީންނަށް ވުރެ އަތޮޅު ތެރޭގެ ފުލުހުން ނިދައި ކައިބޮއި ހަދަން ޖެހޭ ތަނުގެ ހާލު ބޮޑު. އެހެން ނަމަވެސް އެ ހިދުމަތް ދިނުމުގައި ފަރުވާ ކުޑަ ކުރުމެއް ނެތި ކޮންމެ ދުވަހަކުސް ކުރާ ބުރަ މަސައްކަތަކީ އަޅުގަނޑުމެން ބަލައިގަންނަން ޖެހޭ ކަމެއް".

މިނިސްޓަރު ޢިމްރާން އަބްދުالله

މިއާއެކު ޢިމްރާން ވިދާޅުވީ، 2018 ގެ ނޮވެންބަރާ ހަމައަށް އައިއިރު ފުލުހުންގެ ސަފުތައް ވަނީ ރޫޅި ހާވިޔާވެފައި ކަމަށާއި, ލީޑަރޝިޕްވަނީ ބަލިކަށިވެ ނިކަމެތިވެފައިކަމަށެވެ. އަދި ފުލުހުންގެ ރޭންކުތަކުގެ މެދުގައި އޮތީ ނާމާންކަމާ ބިރުވެރިކަން ފެތުރި ޢާންމުވެފައި ކަމަށެވެ.

"މިހަޤީޤަތްތައް ސާފްވާލެއް ބޮޑުކަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވެރިކަމަށް ވަޑައިގެންނެވީ ފުލުހުންގެ ހައިބަތާ ގަދަރާއި, ކަރާމާތް އަނބުރާ ހޯދައިދުނުމަށް. ފުލުހުންނަށް ރައްޔިތުންގެ އިތުބާރާއި އިހުތިރާމާއި ލޯބި ހޯދައިދިނުމުގެ އެޖެންޑާއަކައިގެން. ބައިބައިވެފައިވާ ސަފުތައް އެއްކޮށް, ބަލިކަށިވެފައިވާ ލީޑަރޝިޕް ވަރުގަދަކޮށް, މާޔޫސްވެ ނާއުއްމީދުވެފައިވާ އެތައް އޮފިސަރުންގެ އުއްމީދުތައް އުޖާލާ ކުރުވައިގެން. މިސަރުކާރުން ފުލުހުންނާއެކު ފެށީ ބިޔަކަނޑު ހުރަސްކޮށް އަމާން ބަނދަރަކަށް ދިއުމަށް. ވޭތުވެދިޔަ ހަތަރު އަހަރާއި ފަސްމަހުގެ ތެރޭގައި ފުލުހުން ގޮވައިގެން ބިޔަކަނޑު ހުރަސްކޮށް އަމާން އައްސޭރީގެ މަލަމަތި ފެންނަ ހިސާބަށް އަޅުގަނޑުމެން ދަތުރުކޮށްފިން." މިނިސްޓަރ ވިދާޅުވިއެވެ.

އިމްރާން ވިދާޅުވީ ރައީސް ސޯލިހްގެ އިސްނެންގުވުމާއެކު މި ހަތަރު އަހަރު ތެރޭގައި ކޮށްދެއްވި މަސައްކަތްތަކަކީ ބަލައިގަންނަ މަސައްކަތްތަކެއް ކަމަށެވެ.

އަދި އިމްރާންގެ ވާހަކަ ނިންމާވާލެއްވީ ތަކުރާކޮށް ކުރައްވާ އިލްތިމާސް އަނެއްކާވެސް ތަކުރާރުކުރައްވަމުންނެވެ. އެއީ ކުށްކުރި އެންމެން އަތުލައިނުގަނެވުނަސް ކުށެއް ނުކުރާ މީހަކަށް ފުލުހުންގެ ފަރާތުން އަނިޔާއެއް ލިބުނަ ނުދިނުމަށް ކުރައްވާ އިލްތިމާސްއާއި ފުލުހެއްގެ ނުވަތަ މަދު އޮފިސަރެއްގެ ފުށުން ދިމާވާ ކަމެއްގެ ސަބަބުން މުޅި ފުލުހުންގެ މުއައްސަސާ ބަދުނާމް ނުކުރުމަށް ރައްޔިތުންނަށް ކުރައްވާ އިލްތިމާސްއެވެ.