މެޓާނިޓީ ލީވްއަށްދާ ޓީޗަރުގެ ބަދަލުގައި ޓީޗަރެއް ނެގެނީ ޓީޗަރު ވިހެއިމުން: މިނިސްޓަރު

ޓީޗަރުން މެޓާނިޓީ ލީވް އަށް ދާ މުއްދަތުގައި، ބަދަލު ޓީޗަރެއް ނެގެނީ އޭނާ ވިހެއުމުންކަމަށް އެޑިއުކޭޝަން މިނިސްޓަރު ޑރ އައިޝަތު އަލީ ވިދާޅުވެއްޖެ އެވެ.

ރައްޔިތުންގެ މަޖިލީހުގެ  މި އަހަރުގެ ދެވަނަ ދައުރުގެ 6 ވަނަ ޖަލްސާއަށް އެޑިއުކޭޝަން މިނިސްޓަރު ހާޒިރުވެވަޑައިގަތުމުން، މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދު ވަނީ މެޓާނިޓީ ލީވް އަށް ޓީޗަރަކު ވަޑައިގަތުމުން އެ މުއްދަތުގައި ޓީޗަރަކު ނެގުމަށް ކިހާ ދުވަހެއް ނަގާ ތޯ އައްސަވާ ސުވާލުކުރައްވާފަ އެވެ.

"ޓީޗަރު މެޓާނިޓީ ލީވް ނެގުމުން ދެން ބަދަލުގައި އެހެން ޓީޗަރަކު ނެގުމަށް ކިހާ މުއްދަތެއް މިނިސްޓްރީގައި އޮންނަ މުއްދަތުގެ ތެރެއިން ހޭދަވޭތޯ؟ "

ވައިކަރަދޫ ދާއިރާގެ މެމްބަރު ހުސެއިން ޒިޔާދު

މެމްބަރުގެ އެ ސުވާލަށް ޖަވާބުދެއްވަމުން ވަޒީރު ވިދާޅުވީ ޓީޗަރަކު މެޓާނިޓީ ލީވްއަށް ވަޑައިގަތުމުގެ ކުރިން، އެ ޓީޗަރުގެ ބަދަލުގައި ޓީޗަރެއް ނެގުމަށް އިއުލާނުކުރުމުގެ ފުރުސަތު މިނިސްޓްރީއަށް އޮންނަ ކަމަށެވެ.

އެހެން ނަމަވެސް ބަދަލު ޓީޗަރު ވަޒީފާއަށް ނެގެނީ މެޓާނިޓީއަށް ވަޑައިގަންނަވާ ޓީޗަރު ވިހެއުމުންކަމަށް މިނިސްޓަރު ވިދާޅުވި އެވެ. އަދި އެއީ ބަދަލު ޓީޗަރުން ހަމަޖައްސަން އެޑިއުކޭޝަން މިނިސްޓްރީއަށް ކުރިމަތިވާ ދައްޗެއްކަން މިނިސްޓަރު ފާހަގަކުރެއްވި އެވެ.

މެޓާނިޓީއަށް ވަޑައިގަތުމުގެ ކުރިން ވެސް އިއުލާނުކުރުމުގެ ފުރުސަތު މިހާރު އޮންނަނީ ފަހިކޮށްދީފަ. އެހެންވީމަ ގާތްގަނޑަކަށް 3 ހަފްތާ ތެރޭގައި އަޅުގަނޑުމެންނަށް ބޭފުޅެއް ހޯދޭނެ. އެކަމަކު އަޅުގަނޑުމެންނަށް އާ ބޭފުޅެއް ގެނެވޭނީ އެބޭފުޅާ ވިހެއީމަ. އެއީ އަޅުގަނޑުމެންނަށް ދިމާވާ އުނދަގުލަކީ"

މިނިސްޓަރު ޑރ އައިޝަތު އަލީ

މި ސަރުކާރުން ވަނީ ވިހެއުމާއި ގުޅިގެން ދޭ މެޓާނިޓީ ލީވް 6 މަސް ދުވަހުގެ މުއްދަތަކަށް އިތުރުކޮށްދީފަ އެވެ. އަދި ޕެޓާނިޓީ ލީވްއަށް 1 މަސް ދުވަހުގެ މުއްދަތެއް ދީފައެވެ.

ސަރުކާރުން މިފަދައިން ނިންމާފައިވަނީ މަންމައާއި ބައްޕަ އަދި ތުއްތު ދަރިފުޅަށްވެސް އެންމެ ފައިދާ ބޮޑުގޮތްކަމަށް ގަބޫލުކުރެވޭތީ އެވެ. އަދި ވަޒީފާ އަދާކުރަމުން ތުއްތު ދަރިފުޅުގެ ކަންކަން ބެލެހެއްޓުމަށް އުފުލަންޖެހޭ ތަކުލީފުތައް ކުޑަކޮށްދިނުމުގެ ބޭނުމަށެވެ.

އެހެން ނަމަވެސް ޓީޗަރުން މެޓާނިޓީއަށް ދާ މުއްދަތުގައި، ބަދަލު ޓީޗަރުން ހަމަޖެއްސުން ދިގުލައިގެން ދިއުމަކީ ދަރިވަރުންގެ ކިޔެވުމަށް ހުރަސްއެޅިގެންދާ ކަމެއްކަން ފާހަގަކޮށް، ބެލެނިވެރިންގެ ޝަކުވާ އަންނަކަމަށް މެންބަރުން ވަނީ ފާހަގަކުރައްވާފަ އެވެ.