ދަސްވާރު ޕްރޮގްރާމުން ކުދިން ވީ ބާކީ، ދިން ސެޓްފިކެޓު ބަލައެއް ނުގަނޭ: މިނިސްޓަރު

ދިވެހި ޒުވާނުންނަކީ ހުނަރުވެރި މަސައްކަތްތެރި ބަޔަކަށް ހެދުމަށްޓަކައި ސްކޫލްތަކުގެ ދަރިވަރުންނަށް އަމާޒުކޮށްގެން ކުރީގެ ރައީސް އަބްދުالله ޔާމީން އަބްދުލްގައްޔޫމުގެ ޒައާމަތުގައި ކުރިއަށް ގެންދިޔަ ދަސްވާރު ޕްރޮގްރާމުން ދަރިވަރުން ވީ ބާކީ ކަމަށާއި، އެ ޕްރޮގްރާމު ފުރިހަމަކުރި ދަރިވަރުންނަށް ދިން ސެޓްފިކެޓު ހަޔާ އެޑިއުކޭޝަނުން ޤަބޫލުވެސް ނުކުރާކަމަށް އެޑިއުކޭޝަން މިނިސްޓަރު ޑރ އައިޝަތު އަލީ ވިދާޅުވެއްޖެ އެވެ.

މިނިސްޓަރު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާއަށް މިނިސްޓަރު ވަޑައިގަތުމުން، ފަސް މާއްދާއިން ފާސްވާ ދަރިވަރުންގެ ނިސްބަތް ދަށަށް ދިޔަ ސަބަބުތަކާއި ގުޅޭގޮތުންނާއި، މި ސަރުކާރުން އަންނަ އޯގަސްޓުމަހު ވޮކޭޝަނަލް ޓްރެއިނިން ޕްރޮގްރާމު ސުކޫލުތަކުގައި ފަށަން ނިންމާފައިވާއިރު، ކުރީ ސަރުކާރުން ފެށި ދަސްވާރު ޕްރޮގްރާމު ހުއްޓުވާލި ސަބަބާއި ގުޅޭގޮތުން ކުރި ސުވާލަށް ޖަވާބުދެއްވަމުން ނެވެ.

އެގޮތުން މިނިސްޓަރު ވިދާޅުވީ ދަސްވާރު ޕްރޮގްރާމުގެ ސަބަބުން ކުދިން ބާކީ ވާ ކަމަށެވެ. އެއީ އެ ޕްރޮގްރާމަށް ވައްދަނީ ވަކި ވަކި މާއްދާތަކުން ދަށުން މާކްސް ލިބޭ ކުދިންކަމަށާއި، އަދި އެ ޕްރޮގްރާމަކީ ވަކި މާއްދާއެއްގެ ގޮތުގައި ބަލައި، ފަސް މާއްދާއިން ފާސްވާ ކުދިންގެ ތަފާސް ހިސާތުތައް ހަދާއިރު، ދަސްވާރު ޕްރޮގްރާމުގައި ހިމެނޭ ކުދިން ވެސް މީގެކުރިން ހިމަނަމުން ގޮސްފައިވާކަން މިނިސްޓަރު ފާހަގަކުރެއްވި އެވެ.

""ކުދިން ބާކީ ކުރުމަށް އަޅުގަނޑުމެންނަށް ޕްރޮގްރާމެއް ނުގެންދެނޭވެނެ. ފަސް މާއްދާއިން ފާސްވާ ޕަސެންޓޭޖު އިތުރުކުރުމަށް، މި ވައްދަނީ މިކަހަލަ ކޯސްތައް ހަދާފައި ތިބި ކުދިން، އެއީ މިވެނި ވަރަކަށް މާއްދާއޭ ކިޔާފަ. އަޅުގަނޑުމެން ބޭނުންވަނީ ދަރިވަރުންނަށް އެއްޗެއް އެނގިގެން ސުކޫލުތަކުން ނިކުންނަން. އެގޮތުން އަޅުގަނޑުމެން ހަގީގީ ފަސް މާއްދާ ކިޔަފާވަ އިމްތިހާނުގައި ބައިވެރިވާނެ ގޮތަށް މަޖުބޫރު ކުރީ. އެގޭ ޕަސެންޓޭޖު ދަށްވާނެކަން، އަޅުގަނޑުމެން ބަލަނީ ޕަސެންޓޭޖަކަށް ނޫން.. ދަރިވަރަށް ފޯރުކޮށްދޭ ޚިދުމަތަށް"

މިނިސްޓަރު ޑރ އައިޝަތު އަލީ

އެކަން ފާހަގަކުރައްވާ މިނިސްޓަރު ވިދާޅުވީ މިހާރު ސަރުކާރުގެ ސިޔާސަތު ބަދަލުކޮށްފައިވާ ކަމަށެވެ. އެގޮތުން 5 މާއްދާ ހެދުމަށް ކޮންމެ ދަރިވަރަކަށް ވެސް މަޖުބޫރުކޮށްފައި އޮންނާނެ ކަމަށާއި، މިހާރުގެ ތަފާސް ހިސާބުތަކުން ފަސް މާއްދާއިން ފާސްވި ކުދިންގެ އަދަދު ދަށްވެފައިވަނީ އެގޮތަށް އެ އުސޫލު ބަދަލުކުރުމުންކަމަށް މިނިސްޓަރު ވިދާޅުވި އެވެ. އަދި މިހާރުގެ ތަފާސް ހިސާބުތަކުން ފެނިގެން އެދަނީ ހަގީގީ ފަސް މާއްދާއިން ފާސްވާ ކުދިންގެ އިންސައްތަކަމަށް މިނިސްޓަރު ވިދާޅުވި އެވެ.

އޭގެ އިތުރަށް މިނިސްޓަރު ވިދާޅުވީ ދަސްވާރު ޕްރޮގްރާމު ހުއްޓާލީ، އެ ޕްރޮގްރާމު ފުރިހަމަ ކުރާ ދަރިވަރުންނަށް ދޭ ސެޓްފިކެޓަކީ ހަޔާ އެޑިއުކޭޝަނުން ބަލައިގަންނަ ސެޓްފިކެޓަކަށް ނުވާތީ ކަމަށެވެ.

އެކުދިންގެ ސެޓްފިކެޓް ބަލައި ނުގަންނާތީ އެކުދިން އަނެއްކާވެސް ބާކީވެގެންދާކަމަށް މިނިސްޓަރު ވިދާޅުވި އެވެ.

"ދަސްވާރު އަޅުގަނޑުމެން ހުއްޓާލީ، އަޅުގަނޑުމެން ސަރުކާރާއި ހަވާލުވި އިރު އެ ސެޓްފިކެޓުތައް ހަދާ ނިންމާފައި ތިބި ކުދިންނަށް އެއްވެސް ގޮތަކަށް ސެޓްފިކެޓު ދޭން ހަޔާ އެޑިއުކޭޝަނުން އެއްބަހެއް ނުވި، އެއީ އުސޫލުތަކާއި ޚިލާފަށް އެކަން ގެންގޮސްފަ އޮތީމަ"

މިނިސްޓަރު ޑރ އައިޝަތު އަލީ

މިނިސްޓަރު އިތުރަށް ވިދާޅުވީ އަންނަ އޮގަސްޓު މަހުން ފެށިގެން ސުކޫލުތަކުގައި ވޮކޭޝަނަލް ޓްރެއިނިން ޕްރޮގްރާމުތަކެއް ހިންގުމަށް ނިންމާފައިވާކަމަށެވެ.

އެ ޕްރޮގްރާމަކީ ދަސްވާރު ޕްރޮގްރާމާއި ތަފާތުކޮށް ކުރިއަށް ގެންދަން ރާވާފައިވާ ޕްރޮގްރާމެއްކަމަށާއި، އެ ޕްރޮގަރާމުގެ ބޭނުމަކީ ފަސް މާއްދާ ދަރިވަރުލައްވާ ކިޔުވުމަށްފަހު، ކޮންމެ ދަރިވަރަކަށް ވެސް ހުނަރެއް ދަސްކޮށްދިނުން ކަމަށް މިނިސްޓަރު ވިދާޅުވި އެވެ.

"ދަސްވާރު ކަހަލަ ޕްރޮގްރާމެއް ނޫން މިހާރު މި ގެންދަނީ.. ކުދިން ބާކީކޮށްގެނެއް ނޫން.. ގްރޭޑް 8 ނިމޭއިރަކަށް މިހާރަކު ނުބުނަން މީނައަކަށް ނުކިޔެވޭނެއޭ.. ވޮކޭޝަނަލް ކޯހަކަށް ދާށެކޭ. މިހާރު މި ކަންތައް ކުރާ ގޮތަކީ ހުރިހާ ކުދިންނަށް ފައުންޑޭޝަން ސްޓޭޖުން ފެށިގެން އެ ކުއްޖާ 10 އަކާއި ހަމަޔަށް މަސައްކަތްތެރިކަމުގެ ކޯހެއް ކިޔަވާނީ. އެހެންވީމަ ސުކޫލުން ނިކުންނަ ކޮންމެ ކުއްޖަކީ އެކަޑަމިކް ކޮލިފިކޭޝަން އެޓްލީސްޓު 5 މާއްދާ ކޮންމެ ކުއްޖެއްގެ އަތުގައި އޮންނާނެ އަދި އެ ކުއްޖާގެ އަތުގައި ކޮންމެސް ކަހަލަ މަސައްކަތެއް ދަސްވެފައި އޮތްކަމުގެ ސަނަދު އޮންނާނެ"

މިނިސްޓަރު ޑރ އައިޝަތު އަލީ

މިނިސްޓަރު މިފަދައިން ވިދާޅުވެފައި ވާއިރު ކުރީ ސަރުކާރުން ފެށި ދަސްވާރު ޕްރޮގްރާމު 1000އަށް ވުރެ ގިނަ ދަރިވަރުން ފުރިހަމަކޮށްފައިވާއިރު، 56 އިންސައްތައަށްވުރެ ގިނަ ދަރިވަރުންނަށް ރަނގަޅު މުސާރައިގެ ވަޒީފާތައް ލިބިގެން ގޮސްފައިވާކަން އެޑިއުކޭޝަން މިނިސްޓްރީއިން އޭރު ހާމަކުރި ތަފާސް ހިސާބުތަކުން ވަނީ ހާމަކޮށްފަ އެވެ.

އޭގެ ތެރޭގައި 16000އަށް ވުރެ ބޮޑެތި މުސާރައިގެ ވަޒީފާތަކުގައި ތިބި ކުދިންވެސް ހިމެނޭކަން އެޑިއުކޭޝަން މިނިސްޓްރީން ހާމަކޮށްފައިވެއެވެ.