ޖަލުގައި ލާއިންސާނީ ޢަމަލު ހިންގާނަމަ މިއަދު ހޯމްމިނިސްޓްރީ އިން ފިޔަވަޅު އަޅާނެ: ރައީސް ޞާލިޙް
ޖަލުގައި ކިރިޔާވެސް ލާއިންސާނީ ޢަމަލެއް ހިންގާކަމުގެ މަޢުލޫމާތު ލިބިއްޖެނަމަ މިއަދު ހޯމް މިނިސްޓްރީއިން އެކަމާއި ދެކޮޅަށް ފިޔަވަޅު އަޅާނެކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ލއަތޮޅަށް ކުރެއްވެވި ކެމްޕޭނު ދަތުރުފުޅުގައި ލ.ހިތަދުއަށް ވަޑައިގެން އެރަށު ރައްޔިތުންނާއި ވާހަކަފުޅު ދައްކަވަމުންނެވެ.
ރައީސް ވިދާޅުވީ މީގެ އަހަރުތަކެއް ކުރިން ފެށި އިސްލާޙީ މަސައްކަތްތައް އަދި ނުނިމޭ ކަމަށާއި އޭރު ބޭނުންވީ ޖަލުގައި ކުރަމުން ދިޔަ އަނިޔާތަކުން ސަލާމަތްވާން ކަމަށެވެ. އިރާދަކުރެއްވީތީ މިއަދު އެކަންތައް މުޅިންހެން ރަނގަޅު ކުރެވިއްޖެ ކަމަށް ރައީސް ވިދާޅުވިއެވެ.
"މިއަދަކު ޖަލަކު އޭރު އެއަނިޔާކުރި ގޮތައް އެއްވެސްމީހަކަށް އިންސާނީ ކަރާމަތް ގެއްލޭގޮތައް ކަމެއް ކުރާ އަޑެއް ކުރި އަޑެއް ނާހަން، އަދި ކިރިޔާވެސް އެކަހަލަ ޢަމަލެއް ހިންގާ ފަރަތެއްގެ ޝަކުވާ އަތުވެއްޖެނަމަ މިނިސްޓްރީއޮފް ހޯމް އެފެއަރޒުން ކަރެކްޝަންސް މެދުވެރިކޮށް މިހާރު ބަރާބަރަށް ފިޔަވަޅު އަޅަމުންގެންދާނެ" ރައީސް ޞާލިޙް ވިދާޅުވިއެވެ.
ރައީސް ވިދާޅުވީ އަނިޔާވެރިވާކަށް ޖާގައެއް ނުދެއްވާ ކަމަށެވެ.
ރައީސް ވިދާޅުވީ އިސްލާޙުގެ މަސައްކަތް ފެށިއިރު ދެން ރައްޔިތުން ބޭނުންވެފައި އޮތް އަނެއް ކަމަކީ ރައްޔިތުންނަށް ބޭނުންވެފައި ހުރި އަސާސީ ޚިދްމަތްތައް ރަށްރަށުން ލިބޭނެ ގޮތް ހެދުންކަމަށެވެ. ރައީސް ވިދާޅުވީ މިއަދު ލިބޭ ހިތްހަމަ ޖެހުމަކީ ވެވަޑައިގެން ވަޢުދުތަކާއި އެއްގޮތަށް ރަށްރަށުގައި ކަންތައްތައް ކޮށްދެވެމުންދާ ކަމުގެ ހިތް ހަމަޖެހުން ކަމަށެވެ.
"ރަށްތައް ތަރައްޤީކުރާއިރުގައި އެއްފަޅެއްގެ ތެރޭގައި ހުރި ރަށްތައް ގުޅާލުމަކީ އަޅުގަނޑުމެންގެ ތަޞައްވަރެއް، އޭގެ ދަށުން ހިތަދުއާއި ކުނަހަންދޫ ގުޅާލުމަކީ އަޅުގަނޑުމެން ވީވަޢުދެއް، އެކަން އަޅުގަނޑު ހަނދާން އެބަހުރި" ރައީސް ވިދާޅުވިއެވެ.
އެކަން ނުފެށި ލަސްވުމުން ހިތަދޫ ރައްޔިތުންގެ ކަންބޮޑުވުންތަކެއް ހުންނާނެ ކަމަށް ޤަބޫލުފުޅު ކުރައްވަވާ ކަމަށާއި، ކުރިމަތިވެގެން ދިޔަ ބައެއް ސަބަބު ތަކާއި ހުރެ ބައެއް މަޝަރޫޢުތައް ވަނީ ފެށުން ލަސްވެފައި ކަމަށާއި، ހިތަދޫ އާއި ކުނަހަންދޫ ގުޅުވައިދޭ ކޯޒްވޭގެ މަސައްކަތް މިހާރު ވަނީ ކޮންޓްރެކްޓް ކުރެވިފައި ކަމަށް ރައީސް ޞާލިޙް ވިދާޅުވިއެވެ.
އަދި ލަސްތަކެއް ނުވެ އެކޯޒްވޭގެ މަސައްކަތް ފެށިގެން ދާނެ ކަމަށް ރައީސް ވިދާޅުވިއެވެ.
ރައީސް ޞާލިޙް ހިތަދުއަށް ވަޑައިގަތުމުން އެރަށުގެ ގިނަ ބަޔަކު އެމަނިކުފާނާއި އެމަނިކުފާނުގެ ޓީމަށް މަރުޙަބާ ކިޔުމަށް ވަނީ ނުކުމެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
