"ރައީސް ނަޝީދުގެ ވެރިކަން ހަލާކުކޮށް، ރައީސް ޞާލިހު ގެ ވެރިކަންވެސް ޚަރާބު ކުރަނީ މާރިޔާ"

ކުރީގެ ރައީސް މުހައްމަދު ނަޝީދުގެ ވެރިކަން ހަލާކުކޮށްލީ އަދުގެ ޑިފެންސް މިނިސްޓަރު މާރިޔާ އަހުމަދު ދީދީ ކަމަށާ އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ވެރިކަންވެސް ޚަރާބު ކުރީ ހަމަ އޭނާ ކަމަށް ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ރިޔާސީ ކެންޕެއިނަށް ޖުމްހޫރީ ޕާޓީން ރ އަތޮޅަށް ކުރި ދަތުރުގެ ތެރެއިން، ދުވާފަރަށް ވަޑައިގެން އެ ރަށު ބޭއްވި ކެންޕޭން ބައްދަލުވުމައި ވާހަކަ ދައްކަވަމުން ޢަލީ ވަހީދު ވިދާޅުވީ، މިއަދު މިގައުމުން ފެންނަމުންދަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރު ނިމެމުންދާ ތަން ކަމަށެވެ.

"އަޅުގަނޑުމެންނަށް ދުވާފަރުން އަދި މުޅި ރާއްޖެއިން މި ފެނިގެންދާނީ މިރާއްޖެއިން އިންޑިޔާ ސިފައިން އަޅުގަނޑުމެން ފަހާލާނެކަން. އަޅުގަނޑު މެންގެ މި ރާއްޖޭގެ ވެރިކަމުގައި ތިބި މީހުން، ބިރިޔާނީ ގަނޑަކަށް މިރާއްޖެ، ދުވާފަރުން ބުނާނީ ކީކޭތޯ؟ ނޫނެކޭ. ނޫނެކޭ.

ޢަލީ ވަހީދު

".. ސެޕްޓެމްބަރު 9 ވަނަ ދުވަހު މުޅި ދިވެހިރާއްޖެ މިދަނީ ބޮޑު ސިންގާ ބަދަލަކަށް. މި ރާއްޖޭގެ ރައްޔިތުން މިއަދު މިރަށުން، މުޅި ރާއްޖެއިން މި ދެނީ ވަރަށް ވަރުގަދަ މެސެޖެއް ކަމަށެވެ. އޭގެ ސާފު ޖަވާބަކީ އިންޑިއާ ސިފައިންނަށް ދިވެހިރާއްޖޭގެ ސިފައިންގެއަކަށް ނުވަދެވޭނެ އޭ. ގޯސް ހެދީމާ، ނިންމަން ރައްޔިތުން ނުކުންނާނެކަން މި ފެނިގެން ދަނީ." ޢަލީ ވަހީދު ވިދާޅުވި އެވެ.

މިއާއެކު އޭނާ ވިދާޅުވީ، މިރާއްޖެއިން މިހާރު ފެނިގެންދާ މަންޒަރުން، ދެން ރާއްޖޭގައި ގާއިމް ކުރެވޭނީ ޖުމްހޫރީ ވެރިކަމެއް ކަން ހަމަވެގެން ދާ ކަމަށެވެ.

ޢަލީ ވަހީދު އިތުރަށް ވިދާޅުވީ ލ، ފާއިތުވެގެން މި ދިޔަ 15 އަހަރުގެ ތެރޭގައިވެސް ރާއްޖެ ގޮސްފައިވަނީ ފަހަތަށް ކަމަށެވެ. އެގޮތުން ރައްޔިތުން ބޭނުންވި ތަރައްގީ ނުލިބި ޒުވާނުން ދަރަނިވެރިވެފައިވާ ކަމަށްވެސް އޭނާ ވިދާޅުވި އެވެ.

އެހެން ކަމުން ރާއްޖޭގެ ރައްޔިތުން މިހާރު ބޭނުން ވަނީ ހެޔޮ ބަދަލެއް ކަމަށާ އެ ބަދަލަކީ ގާސިމް ކަމަށްވެސް އޭނާ ވިދާޅުވި އެވެ.

"ރާއްޖޭގެ ރައްޔިތުން ދެން ބޭނުންވަނީ ޔަގީން، 100 ޕަސެންޓު ޔަންމާ އިންޖީނު އަޅައިގެން ދެން މަސްވެރިކަމަށް ނުކުންނަން. އެއީ ޖުމްހޫރީ ޕާޓީ. އެއީ ގާސިމް އިބްރާހިމް. ރާއްޖޭގެ ރައްޔިތުން މިއަދު މި ސަރުކާރު ދެކެ ފޫހިވެއްޖެ."

ޢަލީ ވަހީދު

ޢަލީ ވަހީދު ވިދާޅުވީ ރާއްޖޭގައި ދެ އެމްޑީޕީ ސަރުކާރެއް އައިސްފައި ވާއިރުވެސް ހެދި 'މިސްޓޭކު' ތަކުގެ ސަބަބުން ކަމަށެވެ. އަދި ފުރަތަަމަ އެމްޑީޕީ ވެރިކަމާއި، މިހާރުގެ އެމްޑީޕީ ވެރިކަންވެސް ނިމިގެންދާނީ، އަދުގެ ޑިފެންސް މިނިސްޓަރު މާރިޔާ އަހުމަދު ދީދީ ގެ ސަބަބުން ކަމަށް ޢަލީ ވަހީދު ވިދާޅުވި އެވެ.

އެންމެ ފުރަތަމަ (އެމްޑީޕީ) ސަރުކާރު ހަލާކުވެގެން ދިޔައީ މިހާރުގެ ޑިފެންސް މިނިސްޓަރު، ހަމަ އެކަމަނާ ހުންނަވައިގެން، ހިތާ ހިތުގެ ގުޅުމަކަށް، މުޅި ސަރުކާރު ޚަރާބުކޮށް، ސަރުކާރު އެގޮތް މިގޮތަށް ދޫކޮށްލެއްވީ. އަނެއްކާވެސް ހަމަ އެކަމަނާ ހުންނަވައިގެން ބިރިޔާނީ ތެއްޔަކަށް މުޅި ގައުމު ވިއްކާލީ. އެހެންވީމާ އަޅުގަނޑުމެން (ރައީސް ޞާލިހު) ބާލަން ޖެހުނީމާ މި ނުކުތީ ބަދަލު ކުރަން.

ޢަލީ ވަހީދު

އަލީ ވަހީދު ވިދާޅުވީ ސެޕްޓެމްބަރު 9 ވަނަ ދުވަހު މި ސަރުކާރު ނިމިގެންދާތަން މިހާރުވެސް ފެންނަމުންދާ ކަމަށެވެ.