އަޅުގަނޑުމެން މިގެންދަނީ ވަރަށް 'ކޫލް' ކެމްޕޭނެއް: ރައީސް ޞާލިޙް

ލ.އަތޮޅުން ފެންނަނީ އުފާވެރި މަންޒަރެއް ކަމަށާއި ލ.އަތޮޅުއޮތީ އެއްބުރުން ކާމިޔަބުކުރަން ތައްޔާރަށް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ލ.އަތޮޅަށް ކުރައްވަމުން ގެންދެވި ކެމްޕޭނު ދަތުރުފުޅުގެ އެންމެ ފަހު މަންޒިލް ލ ފޮނަދުއަށް ވަޑައިގެން އެރަށު ރައްޔިތުންނާއި ބައްދަލުކުރައްވާ ވާހަކަފުޅުދައްކަވަމުންނެވެ.

"ލ.އަތޮޅުގެ ހުރިހާ ރަށަކަށް ގޮސް އެރަށްރަށުގެ ރައްޔިތުންނާއި އަޅުގަނޑަށް ބައްދަލުކުރެވިއްޖެ، އަޅުގަނޑަށް ފެންނަނީ ވަރަށް އުފާވެރި ހިތްހަމަޖެހޭ މަންޒަރެއް، މިއަތޮޅުވެސް އިރާދަކުރެއްވިއްޔާ އޮތީ އެއްބުރުން މިކަން ކާމިޔާބު ކުރަން ތައްޔާރަށް" ރައީސް ޞާލިޙް ވިދާޅުވިއެވެ.

ރައީސް ގެ ވާހަކަފުޅުގައި ވަނީ 2018ގެ ކެމްޕޭނުގައިނ ފޮނަދުއަށް ވަޑައިގަތުމުން އޭރުގެ ސަރުކާރުގެ ސަޕޯޓަރުން އެމަނިކުފާނުގެ ކެމްޕޭނަށް ހުރަސްއެޅި ދުވަހުގެ ހަނދާން އައު ކުރައްވައިފައެވެ.

ރައީސް ވިދާޅުވީ އެދުވަހު ހިތްޕުޅަށްއަރައި ވަޑައިގަތީ އެކަން ބަދަލުކުރަން ވާނެ ކަން ކަމަށެވެ. ރައީސް ވިދާޅުވީ އޭރާއި ޚިލާފަށް މިހާރުވަނީ ޚިޔާލުފާޅު ކުރުމުގެ މިނިވަންކަން ހުޅުވައިލެވިފައިކަމަށެވެ.

އަދި ސިޔާސީ ހަރަކާތް ހިންގޭނެ ކަމަށާއި ބަސް ބުނެވޭނެ ކަމަށާއި މުޒާހަރާވެސް ކުރެވޭނެ ކަމަށް ރައީސް ވިދާޅުވިއެވެ. އެންމެންނަށްވެސް އޮތީ އެފުރުސަތު ހުޅުވައިލެވިފައި ކަމަށްވެސް ރައީސް ވިދާޅުވިއެވެ.

"މިއިން ގިނަ ރަށްރަށުގަ ގިނަވާނީ އެމްޑީޕީ މެޖޯރިޓީ، ބޭނުންނަމަ އަޅުގަނޑުމެންނަށް ކުރެވޭނެ ކަންކަން ހުންނާނެ، އެކަމަކު އަޅުގަނޑުމެން މިގެންދަނީ ވަރަށް ކޫލް ކެމްޕޭނެއް، އިރާދަކުރެއްވިއްޔާ މިގެންގޮސް އަޅުގަނޑުމެން ނިންމާނީ އެގޮތައް" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ މިސަރުކާރުން ތަރައްޤީ ގެނައުމުގައި އިސްކަންދެނީ އެމްޑީޕީގެ ތަރުޙީބު އޮންނަ މިންވަރު ބަލާ ތަރުތީބުން ނޫން ކަމަށާއި، ކައުންސިލްތަކުން އެދޭ ތަރުތީބުން ކަމަށެވެ. އަދި ރަށްރަށަށް ތަރައްޤީ ގެންނަވަނީ ހަމަހަމަ ކަމާއި އެކު ކަމަށް ރައީސް ވިދާޅުވިއެވެ.

ލ.އަތޮޅަށް ކުރައްވަމުން ގެންދެވި ކެމްޕޭނު ދަތުރުފުޅުގައި ރައީސް އެންމެ ފަހުން ވަޑައިގަތީ ލާމުގެ ވެރިކަން ކުރަ ފޮނަދޫއަށެވެ. ލ.އަތޮޅުގެ ގިނަ ރަށްތަކުން ފެނިގެން ގޮސްފައިވަނީ ރައީސް ޞާލިޙަށް ތާއީދު އޮތް މަންޒަރެވެ.