އަޅުގަނޑުގެ ވެރިކަމެއްގައި ފައިނުގައި އެއަރޕޯޓެއް އަޅާނަން: ޑރ. މުއިއްޒު

ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ގެ ވެރިކަމެއްގައި ރ.ފައިނުގައި އެއަރޕޯޓެއް އަޅައިދެއްވާނެ ކަމަށް ވިދާޅުވެއްޖެ އެވެ.

ރިޔާސީ ކެމްޕޭނަށް ރ އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން އިނގުރައިދޫއަށް ވަޑައިގެން ބޭއްވި ބައްދަލުވުމުގައި ވާހަކަދައްކަވަމުން މުއިއްޒު ވިދާޅުވީ، މީގެ ކުރިން، ފައިނުގައި އެއްޕޯޓެއް އެޅުމަކީ ޚަރަދުގެ ގޮތުން ބަލާއިރު ކުޑަ ޚަރަދެއް ދާނެ ކަމެއް ކަމަށެވެ. އަދި ކުރީގެ ރައީސް، ޔާމީން އަބްދުލްގައްޔޫމް ގެ ވެރިކަމުގައި ފައިނުގައި އެއާޕޯޓެއް އެޅުމަށް ނިންމި ނިންމުމާއި އެއްގޮތަށް، މުއިއްޒުގެ ވެރިކަމުގައޮ އެ އެއާޕޯޓް އަޅުއްވާނެ ކަމަށެވެ.

"އަލިފުށީގެ އެއާޕޯޓުގެ އިތުރުން، އިތުރު އެއާޕޯޓެއް އެބަ ބޭނުންވޭ. ރައީސް ޔާމީނުގެ ދުރުވިސްނޭ ސިޔާސަތުގެ ދަށުން ނިންމެވި ފައިނުގައި އެއާޕޯޓެއް އަޅަން، މަސައްކަތްތަކެއްވެސް ފެށި، އެ އެއާޕޯޓަކީ ހަރަދުގެ ގޮތުން ބަލާއިރު ބިން ހިއްކުން އޭގަ ވަރަށް ކުޑަ މަޝްރޫއެއް. އެހެންކަމުން އަޅުގަނޑު މިތަނުގަ ދަންނަވާލާނަން އިރާދަކުރެއްވިއްޔާ ފައިނުގަ އެއާޕޯޓު އެޅުމަކީ އަޅުގަނޑުމެން ކުރިއަށް ގެންދާނެ މަޝްރޫއެއް"

ޑރ. މުހައްމަދު މުޢިއްޒު

މިއާއެކު ޑރ މުހައްމަދު މުއިއްޒު ވިދާޅުވީ ފައިނު އެއާޕޯޓަކީ މުޅި ރ. އަތޮޅުގެ ދެކުނުބިތުގެ ރަށްތަކަށާއި ރިސޯޓްތަކަށް ފައިދާކުރާނެ ދެކޮޅުޖެހޭ އިންވެސްޓްމެންޓެއް ކަމަށް ވާނެ ކަމަށެވެ.

ފައިނުގައި އެއާޕޯޓު އެޅުމަކީ ރައީސް ޔާމީންގެ ވެރިކަމުގައި ވެސް އިއުލާންކުރި މަޝްރޫއެކެވެ. އެކަމަކު ތިމާވެއްޓައް ބޮޑެތި ގެއްލުންތަކެއް ލިބޭތީ ކަމަށް ބުނެ އެ މަޝްރޫއު ކުރިއަށް ނުގެންދަން މި ސަރުކާރު އައިސް ނިންމީ އެވެ.

މީގެ އިތުރުން މިއަދުގެ ބައްދަލުވުމުގައި މުޢިއްޒު ވަނީ އިނގުރައިދޫ އަށް އެމަނިކުފާނުގެ ވެރިކަމެއްގައި ކޮށްދެއްވާނެ ބައެއް ކަންކަން ހާމަކުރައްވާފައެވެ.

އިނގުރައިދޫއަށް މުއިއްޒުގެ ވައުދުތައް:

* މަގު ހެދުމުގެ މަޝްރޫއު

* ސިއްހީ މަރުކަޒުގެ މަޝްރޫއު ކުރިއަށްގެންދިއުން

* ބިން ހިއްކުމުގެ މަޝްރޫއު

* ރޯހައުސް އަދި ފްލެޓު އެޅުން

* ނެރު ފައިކަށި ރަނގަޅުކުރުން