އިންތިޚާބަށް ނުފޫޒު ފޯރުވަން ކުރަމުންދާ މަސައްކަތްތައް އީސީން ހުއްޓުވަން ޖެހޭ: ޠަލާލު

ރިޔާސީ އިންތިޚާބަށް ނުފޫޒު ފޯރުވުމަށް ސަރުކާރުން ކުރަމުންދާ މަސައްކަތްތައް އިލެކްޝަންސް ކޮމިޝަނުން އިސް ނަގައިގެން ބަލެމަށްފަހު ހުއްޓުވަން ޖެހޭކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑޮޑޭޓު ޑރ މުޙައްމަދު މުއިއްޒުގެ ތަރުޖަމާނު މުހައްމަދު ޠަލާލު ވިދާޅުވެއްޖެ އެވެ.

ޠަލާލު މިފަދައިން ވިދާޅުވެފައި ރިޔާސީ އިންތިޚާބާއި ގުޅޭގޮތުން އިދިކޮޅުން ފާހަގަކުރަން ހުރި މުހިންމު ކަންކަން ހިއްސާކުރެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.

ޠަލާލު ވިދާޅުވީ ރިޔާސީ އިންތިޚާބަށް ނުފޫޒު ފޯރުވުމަށްޓަކައި ސަރުކާރުން މިހާރު ވެސް ވަރަށް ގިނަ ކަންކަން ކުރަމުންދާ ކަމަށެވެ.

އެގޮތުން ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ކެމްޕޭނަށް ދައުލަތުގެ ވަސީލަތްތައް ބޭނުން ކުރުމާއި، ސަރުކާރުގެ ކުންފުނިތަކުގެ މުވައްޒަފުންނަށް ވަޒީފާގެ ބިރުދައްކާ އެމީހުން ލައްވާ ކެމްޕޭނު މަސައްކަތްތައް ކުރުވުން ފަދަ އެތައް ކަމެއް ކުރަމުންދާ ކަމަށެވެ.

އޭގެ އިތުރުން ޑރ މުއިއްޒު ވެވަޑައިގަންނަވާ ބައެއް ވައުދުތައް ޤާނޫނީ ހަމަތަކާއި ޚިލާފަށް ފުއްދުމަށް ރައީސް ޞާލިހު މަސައްކަތްޕުޅު ކުރައްވަމުން ގެންދަވާކަން ޠަލާލު ފާހަގަކުރެއްވި އެވެ. ޠަތާލު އެފަދައިން ވިދާޅުވީ ތިނަދޫއަކީ ސިޓީއަކަށް ހައްދަވާނެކަމަށް ޑރ މުއިއްޒު ވައުދުވެޑައިގެންފައި ވަނިކޮށް، ރައީސް ޞާލިހު އެ ރަށަށް ސިޓީއެއްގެ ދަރަޖަދޭން ނިންމެވުމާއި ގުޅިގެންނެވެ.

ޠަލާލު ވިދާޅުވީ ސިޓީއެއްގެ ދަރަޖަ ދެވޭނީ ސިޓީއެއްގެ ފެންވަރަކަށް ވަސީލަތްތައް ފުރިހަމަކޮށް ޤާނޫނީ ގޮތުން އެކަން ކުރަން އޮންނަ ހަމަތަކާއި އެއްގޮތަށް ކަމަށެވެ. ވޯޓު ހޯދުމުގެ ބޭނުމުގައި ޤާނޫނާއި ޚިލާފަށް އެކަން ކުރައްވާނަމަ އެއީ މަޤާމުގެ ބޭނުން ނާޖާއިޒް ގޮތުގައި ހިފުންކަމަށް ޠަލާލު ވިދާޅުވި އެވެ.

އެކަންކަން ފާހަގަކުރައްވާ ޠަލާލު ވިދާޅުވީ މިފަދަ މައްސަލަތައް އިލެކްޝަންސް ކޮމިޝަނަށް ރަސްމީ ސިފައެއްގައި ހުށަނޭޅި ނަމަވެސް މިއީ އެ ކޮމިޝަނުން އަމިއްލަ އިސްނެގުމުގެ ފަށުން ބަލާ ފިޔަވަޅު އަޅަން ޖެހޭ ކަންކަން ކަމަށެވެ. ރިޔާސީ އިންތިޚާބަށް ސީދާ ގޮތުންނާއި ނުސީދާގޮތުން ނުފޫޒު ފޯރުވުމަށް ކުރާ ހުރިހާކަމެއް ހުއްޓުވުމަކީ މިނިވަން އިންސާފުވެރި އިންތިޚާބެއް ރައްޔިތުންނަށް ހޯދައިދިނުމަށް އިލެކްޝަންސް ކޮމިޝަނުން ކުރަން ޖެހޭ ކަމެއްކަމަށް ޠަލާލު ވިދާޅުވި އެވެ.

"އެމްޑިޕީގެ ކެންޑިޑޭޓު އިބްރާހިމް މުޙައްމަދު ޞާލިހު އަދި އޭނާގެ ކައިރީގައި ތިބި މީހުން މި ކުރަމުންދާ ކަންތައްތައް އިލެކްޝަން ކޮމިޝަނުން އެބަ ޖެހޭ ހުއްޓުވަން އެ މައްސަލަ އެ ކޮމިޝަނަށް ހުށައެޅުނަސް ނޭޅުނަސް، އިލެކްޝަން ކޮމިޝަން އެބަޖެހޭ ޕްރޯ އެކްޓިވް ވާން"

ޑރ މުއިއްޒުގެ ތަރުޖަމާނު ޠަލާލު

ޠަލާލު ވިދާޅުވީ ރިޔާސީ އިންތިޚާބަށް ނުފޫޒު ފޯރުވުމަށް ކުރަމުން ގެންދާ ކަންކަން ނުހުއްޓުވިއްޖެ ނަމަ މި އަހަރުގެ ރިޔާސީ އިންތިޚާބަކީ މިނިވަން އިންސާފުވެރި އިންތިޚާބަކަށް ނުވާނެ ކަމަށެވެ. އަދި އެކަމުގެ ސަބަބުން ރާއްޖޭގެ މުސްތަގުބަލަށް ނުރަނގަޅު އަަސަރުތަކެއް ކުރާނެކަން އޭނާގެ ވާހަކައިގައި ފާހަގަކުރެއްވި އެވެ.