ކޮންސްޓްރަކްޝަން އިންޑަސްޓްރީއަށް ޚާއްސަ ވުޒާރާއެއް ހަދާނަން: ޑރ މުއިއްޒު
ކޮންސްޓްރަކްޝަން އިންޑަސްޓްރީގެ މަސައްކަތްތަކަށް ޚާއްސަ ވުޒާރާއެއް ޤާއިމްކުރައްވާނެކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.
މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ފަރާތުން ބޭއްވި ޖަލްސާގައި ވާހަކަދައްކަވަމުން ޑރ މުއިއްޒު ވިދާޅުވީ ކޮންސްޓަރަކްޝަން އިންޑަސްޓްރީއަކީ ރާއްޖޭގައި ދެވަނަ އަށް އޮތް އެންމެ ބޮޑު އިންޑަސްޓްރީ ކަމަށެވެ.
އެ އިންޑަސްޓްރީއަށް އެކި ސަރުކާރުން އެކި މިންވަރަށް ސަޕޯޓު ލިބިފައިވާކަން ފާހަގަކުރައްވާ ޑރ މުއިއްޒު ވިދާޅުވީ ކޮންސްޓްރަކްޝަން އިންޑަސްޓްރީ މިހާރު އޮތް ހިސާބުން ކުރިއަށް ގެންދިއުމަށް ސަރުކާރަށް ކޮށްދެވޭނެ ވަރަށް ގިނަ ކަންކަން ހުންނާނެ ކަމަށް ގަބޫލުފުޅު ކުރައްވާ ކަމަށެވެ.
އެގޮތުން ޓުއަރިޒަމަށް ޚާއްސަ ވުޒާރާއެއް ހުންނަ ފަދައިން، އަދި އެގްރިކަލްޗާގެ ކަންކަން ބެލެހެއްޓުމަށް ޚާއްސަ ވުޒާރާއެއް އެލުވަލުން މުހިންމުވާ ފަދައިން ކޮންސްޓަރަކްޝަނަށް ޚާއްސަ ވުޒާރާއެއް ވެސް ހުންނަން ޖެހޭކަމަށް ޑރ މުއިއްޒު ވިދާޅުވި އެވެ. އަދި ވިދާޅުވީ އެމަނިކުފާނުގެ ވެރިކަމުގައި ނަމުގައި ކޮންސްޓްރަކްޝަން އިންޑަސްޓްރީ ޝާމިލުވާގޮތަށް ވުޒާރައެއް ގާއިމްކުރައްވާނެ ކަމަށެވެ.
"ކޮންސްޓްރަކްޝަން އިންޑަސްޓްރީ އަބަދުވެސް ކޮންމެސް ވުޒާރާއެއްގެ ތެރެއަށް ލެވިފައި ފޮރުވިފަ ކަހަލަ ގޮތަކަށް އޮވޭ. އެހެން ނަމަވެސް ބޭރަށް ނެރެ ކޮންސްޓްރަކްޝަން އިންޑަސްޓްރީ ވެސް ނަމުގައި ޝާމިލްވާގޮތަށް އިރާދަކުރެއްވިއްޔާ ވުޒާރާއެއް ޤާއިމްކުރާނަން"
އިންތިޚާބީ ރައީސް ޑރ މުހައްމަދު މުއިއްޒު
ޑރ މުއިއްޒު ވިދާޅުވީ އެފަދައިން ވުޒާރާއެއް އެކުލަވާލުމުގެ ބޭނުމަކީ މަސައްކަތްތައް ކުރުމުގައި އަދި އެ ސިނާއަތާއި ގުޅުންހުރި ކަންކަން ތަރުތީބުކުރުމުގައި ފަސޭހަތައް ހޯދުން ކަމަށެވެ. ވުޒާރާއެއްގެ ގޮތުގައި އެ އިންޑަސްޓްރީގެ މަސައްކަތްތައް ތަރުތީބުވެގެން ދިއުމަކީ ބޭރުގެ އެހީ ހޯދުމުގައި ވެސް ފަސޭހަތައް ލިބިގެންދާނެ ކަމެއްކަން ޑރ މުއިއްޒު ފާހަގަކުރެއްވި އެވެ.
އޭގެ އިތުރުން އެމަނިކުފާނު ވަނީ އެ އިންޑަސްޓްރީ އާ ހަރުފަތަކަށް ގެންދިއުމަށްޓަކައި ކުރެވޭ މަސައްކަތްތަކުގައި މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ފުރިހަމަ އެއްބާރުލުމާއި އެހީތެރިކަން ދެއްވުމަށް އެދިވަޑައިގަންނަވާ ކަމަށް ވެސް ވިދާޅުވެފަ އެވެ.
މަސީގެ ފަރާތުން އެ އެހީތެރިކަން ލިބޭނެކަމަށް އުންމީދުކުރައްވާ ކަމަށް ވެސް އިންތިޚާބީ ރައީސް ޑރ މުއިއްޒު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
