"އިންސާފު ހޯދައިދޭން ބުނި މީހުންނަށް އިންސާފު ނުލިބި، ރިއެކްޓެއް ނުކޮށް ރައީސް ނަޝީދު ދިނީ އިސްތިއުފާ"

ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވެރިކަމަށް އައުމުގެ ކުރިން އިންސާފު ހޯދައިދެއްވާނެ ކަމަށް ބުނީި އެއްވެސް ފަރާތަކަށް އިންސާފު ނުލިބި އެއްވެސް "ރިއެކްޓެއް" ނުކޮށް އެމަނިކުފާނު ވެރިކަމުން އިސްތިއުފާ ދެއްވާފައިވާ ކަމަށް، ރައްޔިތުންގެ މަޖިލީހުގެ ކެލާ ދާއިރާގެ މެންބަރު އިބްރާހީމް ޝަރީފް (ކެލާ އިބުރޭ) ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ އެއްވެސް ކަމެއްވާ ބޭފުޅެއް ނޫން ކަމަށާ، އަދި އެއްވެސް ކަމަކަށް ރިއެކްޓް ވެސް ކުރައްވާ ބޭފުޅެއް ނޫން ކަމަށް ވިދާޅުވެ، އެމަނިކުފާނަށް ރައީސް ނަޝީދު ފާޑުވިދާޅުވުމާއި ގުޅިގެން، ކެލާ އިބުރޭ ކުރެއްވި ޓުވީޓެއްގައި ވިދާޅުވީ، ނަޝީދު ވެރިކަމަށް ވަޑައިގެންނެވީ އިވާން ނަސީމާއި އަދި ސޮލާހުގެ މަރުތަަކާއި އަދި ޖަލުގަ ހިންގި ލާއިންސާނީ ޖަރީމާތަކަށް އިންސާފު ހޯދައިދޭނެ ކަމަށް ވައުދުވެގެން ކަމަށެވެ.

"މީގެ އެއްވެސް މަރަކަށް އަދި އެއްވެސް ފަރާތަކަށް އިންސާފުނުލިބި އެއްވެސް ރިއެކްޓެއް ނުކޮށް ނަޝީދު ދިނީ އިސްތިއުފާ!" ކެލާ އިބުރޭ ވިދާޅުވިއެވެ.

އެމްޑީޕީގެ ރިޔާސީ ޕްރައިމަރީ އަށް ނަޝީދުގެ ކެމްޕެއިން، "ފިކުރެއްގެ ދިރުން" ލޯންޗުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން، ސަރުކާރު ހިންގުމުގެ ތެރޭގަ އާއި އެމްޑީޕީގެ މެނިފެސްޓޯ ތަންފީޒު ކުރުމުގައި ރައީސް އިބްރާހިމް މުހައްމަދު ޞާލިހު، "ރިއެކްޓް" ނުކުރައްވާ ކަމަށް ވިދާޅުވެ ނަޝީދު ވަނީ އެމަނިކުފާނަށް ވަރަށް ބޮޑަށް ފާޑުވިދާޅުވެފައެވެ.

"ނުވި، ނުވި. ނުވި. ރިއެކްޓެއް ނުކުރެއްވި. ވެށިފަށި މާލެ ޕްރޮގްރާމަށް ވެސް އެއްވެސް ރިއެކްޝަނެއް ނެތް. އެއްދަންފަޅީގެ މަދަރުސާއަކަށް ވެސް ނެތޭ ރިއެކްޝަނެއް. އައްޑޫ ސިޓީއާ ބޮޑެތި ރަށްތަކުގެ އިގުތިސޯދު ވަށައިގެންވާ އެހެން ރަށްތަކާ އަދި ތިނަދޫގެ ބޮޑު އިގުތިސޯދު، ބޮޑު އިގުތިސޯދު. ހުވަދު އަތޮޅުގެ އެތައް ރަށެއްގެ، ކިތައްމެ ރަށެއް މިހާރު އެބަހުރި 4،000 މީހުންނަށް ދާ. މިއީ އެކަށީގެންވާ ރަނގަޅު ވިކުރާއެއް ނުކުންނާނެ ވިޔަފާރި ކުރެވޭނެ ރަށްރަށް،"

"ރައީސް ސޯލިހު އެތައް ތަގުރީރެއްގައި، ކިތައްމެ އިންޓަވިއުއެއްގައި ސާފު ސަރީހަ އިބާރާތުން ވިދާޅުވަމުން ގެންދެވި ވާހަކަ. ނަމަވެސް ވެރިކަމަށް ވަޑައިގެންފައި ރިއެކްޓެއް ނުކުރެއްވި." ރޭގެ ޖަލްސާގައި ވާހަކަ ދައްކަވަމުން ރައީސް ސާލިހަށް ފާޑުވިދާޅުވެ ނަޝީދު ވިދާޅުވި އެވެ.

ރައީސް ނަޝީދުގެ މިވާހަކަ އާއި ގުޅިގެން އެމްޑީޕީގެ ރައީސް ޞާލިހުގެ ފެކްޝަނުގެ މެންބަރުން އަންނަނީ އެމަނިކުފާނަށް ވަރަށް ބޮޑަށް ފާޑުވިދާޅުވަމުންނެވެ.