އިންޑިޔާ ސަފީރާއި ބައްދަލުކުރެއްވި ވާހަކައަކީ ދޮގެއް: އެމްޑީޕީ ޕީޖީ ގްރޫޕް

ރައްޔިތުންގެ މަޖިލިހުގެ ރައީސް މުހައްމަދު އަސްލަމް ހިމެނިވަޑައިގަންނަވާހެން އެމްޑީޕީގެ ޕީޖީ ގްރޫޕްގެ މެމްބަރުން އިންޑިޔާގެ ސަފީރާއި ބައްދަލުކުރެއްވިކަމަށް ދެކެވޭ ވާހަކައަކީ ދޮގުވާހަކައެއްކަމުގައި ހެންވޭރު ދެކުނު ދާއިރާގެ މެމްބަރު ހުސައިން ޝަހީމް ވިދާޅުވެއްޖެއެވެ.

ރައްޔިތުންގެ މަޖިލިހުގައި ކުރިއަށްދާ އެމްޑީޕީގެ ޕީޖީ ގްރޫޕްގެ ބައްދަލުވުމެއްގައި ވާހަކަދައްކަވަމުން ހުސައިން ޝަހީމް ވިދާޅުވީ،  ޕާޓީގެ ފަރާތުން އިންޑިޔާގެ ސަފީރާއި ބައްދަލު ކުރެއްވިކަމަށް ބުނެ ރައީސް ޑރ މުހައްމަދު މުއިއްޒު ޕީއެންސީގެ "ފެށުން" ޖަލްސާގައި ދެއްކެވި ވާހަކަފުޅަކީ އެއްވެސް ހަގީގަތެއް އެކުލެވޭ ވާހަކައެއް ނޫންކަމަށާއި އެއީ ދޮގު މަސްދަރަކުން އެ މަނިކުފާނަށް ލިބިވަޑައިގެން މައުލޫމާތެއްކަމަށެވެ.

ރައީސުލްޖުމްހޫރިއްޔާއަށް އެ މައުލޫމާތު ލިބިވަޑައިގެންފައި އޮތީ ގޯސްކޮށްކަމަށް، އެހެންވީމަ ރައީސުލްޖުމްހޫރިއްޔާއަށް އެ ވާހަކަ ވިދާޅުވެވުނީ ކުށް މައުލޫމާތެއްގެ މައްޗަށް

ހުސައިން ޝަހީމް

އެގޮތުން ރައީސް ވިދާޅުވި ދުވަހު އެމްޑީޕީގެ މެމްބަރުންނާއި ފޯނުން ވަރަށް ގިނަ މުއާމަލާތުތަކެއް ކުރެވިފައިވާނެކަމަށާއި އެއީ އެ ޕާޓީގެ އެތެރޭގެ މަސައްކަތްތައް ކުރުމަށްޓަކައި ކަމުގައި ވިދާޅުވެ ހުސައިން ޝަހީމް ވިދާޅުވީ، އެދުވަހު އެ ޕާޓީގެ ފަރާތުން އޮފީހުގައި ބައްދަލުވުމެއްވެސް ކުރިއަށް ގެންދެވިފައިވާނެކަމަށެވެ.

މިކަމާއި ގުޅިގެން އިތުރަށް ވާހަކަދައްކަވަމުން ރައްޔިތުންގެ މަޖިލިހުގެ ހުޅުމާލޭ ދާއިރާގެ މެމްބަރު އަލީ ނިޔާޒް ވިދާޅުވީ، ނުބައި މަސްދަރުތަކުގެ މައްޗަށް މައުލޫމާތު ދިނުމަކީ ހަގީގަތުގައި ސަރުކާރެއް ވަރަށް ބޮޑަށް ބަލިކަށިވެގެންދާނެކަމެއް ކަމުގައެވެ. އަދި އެމްޑީޕީއަކީ މި ސަރަހައްދުގެ އެއްވެސް ގައުމަކާއި ޒާތީވުމެއް އޮންނާނެ ޕާޓީއެއް ނޫންކަމުގައި ފާހަގަ ކުރައްވައި ނިޔާޒް ވިދާޅުވީ އިންޑިޔާ ސަފީރާވެސް ބައްދަލު ކުރަން ޖެހިއްޖެ ހާލަތެއްގައި އެކަންވެސް އެ ޕާޓީގެ ލީޑަރޝިޕުން ކުރާނެކަމަށެވެ.

އިންޑިޔާ ސަފީރާވެސް ބައްދަލުކުރަން ޖެހިއްޖިޔާ ޕާޓީގެ ލީޑަރޝިޕުންވެސް އަދި ރައްޔިތުންގެ މަޖިލިހުގެ ރައީް އެކަން ކުރައްވާނެ

އަލީ ނިޔާޒް

އެމްޑީޕީގައި އިސްކޮށް ހަރަކާތްތެރިވާ 12 މެމްބަރަކު ވަނީ މިދިޔަ ބުރާސްފަތި ދުވަހުގެ ރޭ އޮތް ޕީއެންސީގެ ފެށުން ޖަލްސާގައި ޕީއެމްސީއާއި ގުޅިވަޑައިގެންފައެވެ.