އެފްއެސްއެމްގެ ޝެޑެއް ދ.މީދޫގައި ހުޅުވައިފި

ފިއުލް ސަޕްލައި މޯލްޑިވްސް (އެފްއެސްއެމް) ގެ ޝެޑެއް ދ.މީދޫގައި ހުޅުވައި ހިދުމަތްދޭން ފަށައިފިއެވެ.

މިކަމާ ގުޅޭގޮތުން އެފްއެސްއެމުން މިއަދު ބުނީ، ދ.މީދޫގައި އެކުންފުނިން ގާއިމްކުރި ޝެޑްގެ ހިދުމަތް ރަސްމީކޮށް ދޭން ފަށާފައިވާކަމަށެވެ. މިއީ މުޅި ރާއްޖެއަށް އަމާޒުކޮށްގެން ރާއްޖޭގެ ހުރިހާ ސަރަހައްދަކުން އެސްޓީއޯ ރޭޓްގައި ތެއޮ ލިބޭނޭމަގު ފަހިކޮށްދިނުމަށް ސަރުކާރުން ގެންގުޅޭ ސިޔާސަތުގެ ދަށުން ކުރިއަށްގެންދިޔަ މަޝްރޫޢުއެއްކަމަށް އެފްއެސްއެމުން ބުންޏެވެ.

މިއީ ރާއްޖޭގެ ހުރިހާ ސަރަޙައްދަކަށް ފެންވަރު ރަނގަޅު ތެލުގެ ޚިދުމަތް ފޯރުކޮށްދިނުމަށް ކުރަމުންގެންދާ މަސައްކަތްތަކުގެ ދަށުން އެޅުނު މުހިންމު ފިޔަވަޅެއްކަމަށްވެސް އެފްއެސްއެމުން ބުންޏެވެ.

މުޅި ރާއްޖޭގައި ތެއޮ ލިބޭނެ އިންތިޒާމު ފަސޭހަކުރުމަށް ސަރުކާރުން ފަށާފައިވާ މަސައްކަތުގެ ދަށުން، ރާއްޖޭގެ އެކި ކަންކޮޅުތަކުގައި ފިއުލް ސްޓޭޝަންތައް ތަރައްޤީކުރުމުގެ މަސައްކަތް ދަނީ ކުރިއަށެވެ. މި މަޝްރޫޢުގެ މައިގަނޑު ސިޔާސަތަކީ ރާއްޖޭގެ ކޮންމެ އަތޮޅެއްގައި މަދުވެގެން އެއް ފިއުލް ސްޓޭޝަން ޤާއިމުކުރުމެވެ.

މި މަޝްރޫޢުގެ ދަށުން މިހާތަނަށް 7 ސަރަޙައްދެއްގައި ސްޓޭޝަންތައް ހުޅުވައި ޚިދުމަތް ދޭން ފަށާފައިވާއިރު، ބާކީ ހުރި ސްޓޭޝަންތަކުގެ މަސައްކަތްތައް ވެސް ރާއްޖޭގެ އެކި އަތޮޅުތަކުގައި މިހާރު ދަނީ ކުރިއަށެވެ. އެފްއެސްއެމުން މިހާތަނަށް ޝެޑް ގާއިމްކުރި ރަށްތަކުގެ ތެރޭގައި ހިމެނެނީ، ދ. މީދޫގެ އިތުރުން ހއ.އިހަވަންދޫ، ހދ.ހަނިމާދޫ، ށ.މިލަންދޫ، ރ.ދުވާފަރު، ބ.ޭދަފުށި އަދި ފ.ނިލަންދޫއެވެ.