މާވަށުގައި މީހަކު މަރާލުން: ހަމަލާދިން ވަޅި މޫދުން ހޯދައިފި
ލ. މާވަށުގައި މިއަދު ޒުވާނަކު މަރާލި ހާދިސާގައި އޭނާއަށް ހަމަލާ ދިން ކަމަށް ބެލެވޭ ވަޅި ފުލުހުންގެ ޓީމުން ހޯދައިފި އެވެ.
ވަޅިން ހަމަލާދީ މަރާލާފައިވަނީ އެރަށު ނަލަހިޔާގޭ އުމުރުން 29 އަހަރުގެ މޫސާ އިބްރާހީމެވެ. މި ހާދިސާ ހިނގާފައިވަނީ މިއަދުގެ ހެނދުނުގެ ވަގުތެއްގައި އެރަށު ވޮލީކޯޓް ކައިރީގައެވެ.
ދިވެހި ފުލުހުންގެ ޚިދުމަތުން ދެންމެ ބުނީ ހަމަލާ ދިނުމުގައި ބޭނުންކުރި ކަމަށް ބެލެވޭ ވަޅި ފުލުހުންގެ ޓީމުން ހޯދާފައިވާ ކަމަށެވެ. އެ ވަޅި ހޯދާފައި ވަނީ މޫދުންނެވެ.
މި މައްސަލާގައި ހައްޔަރު ކޮށްފައިވަނީ ހދ. ނޮޅިވަރަންފަރު، އަސަރީމަންޒިލް، އުމުރުން 29 އަހަރުގެ މުހައްމަދު އިބްރާހީމެވެ.
ފުލުހުން ބުނި ގޮތުގައި އޭނާ އަކީ މަސްތުވާތަކެތީގެ ރެކޯޑް އޮންނަ މީހެކެވެ.
މިއަދުގެ ހާދިސާގައި މަރާލި މޫސަގެ ހަށިގަނޑު އަދި އޮތީ އެ ރަށު ސިއްހީ މަރުަކަޒުގަ އެވެ. ތުހުމަތު އޮތް މުހައްމަދު ހުރީ ފުލުހުންގެ ބެލުމުގެ ދަށުގައި އެ ރަށުގަ އެވެ. މިއަދު ހަވީރު ވެސް ފުލުހުންގެ ޓީމެއް ވަނީ މާވަށަށް ގޮސްފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
