ގައުމުގެ މިސްރާބު ރަނގަޅެއް ނޫން؛ ލޯ މަރާލައިގެން ބަލަން ހުރެވޭކަށްނެތް: ރައީސް ޞާލިހު

ގައުމު ކުރިއަށްދާ މިސްރާބު ރަނގަޅު ނޫން ކަމަށާއި، ފުން އަދަވަޅަކަށް ވެއްޓެމުންދާއިރު ވެރިކަން ކުރެއްވި ބޭފުޅެއްގެ ހައިސިއްޔަތުން އެކަމަށް ލޯ މަރާލައިގެން ހުންނެވެން ނެތް ކަމަށް ކުރީގެ ރައީސް އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ރައީސް ޞާލިހު މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ އިންތިޚާބަށް، ހިންނަވަރު ދާއިރާއަށް ވާދަކުރައްވާ، މިހާރުވެސް އެ ދާއިރާ ތަމްސީލް ކުރައްވަމުންދާ މެންބަރު ޖީހާން މަހްމޫދަށް ތާއީދު ހޯދުމަށް ހިންނަވަރުގައި ރޭ ބޭއްވި ޖަލްސާގައި ވާހަކަފުޅުދައްކަވަމުންނެވެ.

އެހޮތުން ޞާލިހު ވިދާޅުވީ، ގައުމުގެ މިސްރާބު ނުބައި މިސްރަބަކަށް ހުރިއިރު، މީގެ ކުރިން ވެރިކަން ކުރެއްވި ބޭފުޅެއްގެ ހައިސިއްޔަތުން އެ ކަމާ ލޯ މަރާލައިގެން ހުންނެވެން ނެތް ކަމަށެވެ.

"ރާއްޖޭގެ ވެރިކަން ކުރެވިއްޖެ ފަސް އަހަރު ދުވަހު. ވެރިކަން ކުރެވުނު މީހެއްގެ ހައިސިއްޔަތުން އަޅުގަނޑަކަށެއް މިއަދަކު ނެތް ލޯ މަރާލައިގެން، ބަލަހައްޓައިގެން ހުރެވޭކަށް. ގައުމު މިދާ މިސްރާބު ރަނގަޅެއް ނޫން.. އަޅުގަނޑުމެން އެކީގައި އެތައް މަސައްކަތެއް ނުކޮށްފި ނަމަ މި ރާއްޖޭ ވެއްޓޭނެ ފުން އަނދަވަޅު ވަރަށް ސާފުކޮށް އަޅުގަނޑުމެންނަށް މިއަދު އެބަ ފެނޭ. އޭރުވެސް [ޕީޕީއެމް/ޕީއެންސީގެ ވެރިން] ހަދަމުން ދިޔައީ ދޮގު. މިއަދު ވެސް ހަދަމުން ދަނީ ދޮގު،"

ކުރީގެ ރައީސް ޞާލިހު

މިއާއެކު ޞާލިހު ވިދާޅުވީ ޕީޕީއެމް/ ޕީއެންސީން ވެރިކަމަށް އަންނަންވެގެން ހެދި ދޮގުތައް މިހާރު ރައްޔިތުންނަށް އެނގި ވިސްނެމުންދާ ކަމަށެވެ. އަދި އެކަމާއި މެދު މިހާރު އެ ރައްޔިތުން ހިތާމަ ކުރާ ކަމަށްވެސް އެމަނިކުފާނު ވިދާޅުވި އެވެ.

"މިއަދު ރާއްޖޭގެ އެކި ރަށްރަށުން، އެކި ކަންކޮޅުތަކުން އެކަމާ ދޭތެރޭގައި ވަރަށް ފުންކޮށް ވިސްނާ، ދެރަވެ ކަންބޮޑުވޭ. މި ކުރެވުނީ ކީއްކަން މިއަދު ރާއްޖޭގެ އެކި ރަށްރަށުގައި ދިރިއުޅޭ، މާލޭގައި ދިރިއުޅޭ މީހުންނަށް އިހްސާސްވާން ފަށައިފި،"

ކުރީގެ ރައީސް ޞާލިހު

މީގެ އިތުރުން، ރައީސް ޞާލިހު ވަނީ، އެ މަނިކުފާނުގެ ވެރިކަމުގައި ރަށްރަށުގައި ތަރައްގީގެ ގިނަ މަސައްކަތްތަކެއް ކުރެއްވި ކަމަށް ވިދާޅުވެފައެވެ. އެހެންނަމަވެސް ސަރުކާރު ބަދަލުވުމާ އެކު އެ ހުރިހާ މަޝްރޫއެއްހެން ހުއްޓިފައިވާ ކަމަށް އެމާނިކުފާނު ވިދާޅުވި އެވެ.