ޢަރަބިއްޔާގެ އައު އިމާރާތް ނޮވެންބަރު މަހު ނިންމާލެވޭނެ؛ އަންނަ އަހަރު ކިޔަވައިދޭނީ އެ އިމާރާތުގައި: ޑރ.ޝަފީއު

ޢަރަބިއްޔާ ސުކޫލުގެ އައު އިމާރާތުގެ މަސައްކަތް އަންނަ ނޮވެންބަރު މަހުގައި ނިންމާލެވޭނެ ކަމަށާ، އަންނަ ދިރާސީ އަހަރުގައި ކިޔަވަން ފަށާއި އެ ސުކޫލުދަރިވަރުން ކިޔަވާނީ އައު އިމާރާތުގައި ކަމަށް ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

މިއަދު ރައްޔިތުންގެ މަޖިލީހުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން ޝަފީއު ވިދާޅުވީ، އަރަބިއްޔާ ސްކޫލުގެ މަސައްކަތް ތާވަލާ އެއްގޮތަށް ކުރިއަށްދާ ކަމަށެވެ.

”އުއްމީދު ކުރެވެނީ ނޮވެމްބަރު މަހުގައި މަސައްކަތް ނިމި މިއަންނަ އަހަރު އިރާދަކުރެއްވިއްޔާ އަރަބިއްޔާގެ އައު އިމާރާތުގައި ކިޔަވައިދޭން ފެށޭނެ.“

ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު

މިއާއެކު ވަޒީރު ވިދާޅުވީ، ނިމިދިޔަ ސަރުކާރުން އެންމެ ހިތްދަތި ގޮތަކަށް ކަންކުރި ސުކޫލަކީ ޢަރަބިއްޔާ ސުކޫލު ކަމަށެވެ.

”އެމްޑީޕީގެ ފުރަތަމަ ދައުރުގައި ސުކޫލުހުރި ބިން ނަގައި، ރެފިޔުޖީން ތަކެއްގެ ގޮތުގައި ކުދިން ގެނގުޅުނީ. ދެވަނައަށް އެމްޑީޕީއަށް ވެރިކަން ލިބުނުއިރުގައިވެސް ކުދިން އެކި ތަންތަނަށް ބަހަމުން ދިޔައީ. މިހާރު ސައުދީ އެމްބަސީ ހުރި ބިލްޑިންގްގައި. އަދި އޭގެ ފަހުން ކުރީގައި ދަރުމަވަންތަ ހިންގި އިމާރާތުގައި. އެކި ތަންތަނަށް ބަހަމުން ގޮސް ވަރަށް ނޭދެވޭ އަސަރު ސުކޫލަށް ކުރި.“

ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު

ވަޒީރު ވިދާޅުވީ މި ސަރުކާރުން އައު އިމާރާތް އަޅަމުންދަނީ ސުކޫލުގެ ބެލެނިވެރިންނާއި މަސްލަޙަތުވެރިންގެ މަޝްވަރާއާ އެއްގޮތަށް ކަމަށާ އެ މަސައްކަތް މިއަހަރު ނިންމާލެވޭނެ ކަމަށެވެ.

އަރަބިއްޔާ ހިންގަމުންދިޔަ އިމާރާތް ބާވެ، އެތަނުގައި ކިޔަވައިދިނުން ދަރިވަރުންނަށް ރައްކާތެރި ނުވާ ހިސާބަށް ދިޔުމުން ދަރިވަރުން ވަގުތީ އިމާރާތްތަކުގައި ކިޔަވަމުންދާތާ އެތައް އަހަރުތަކެއް ވެއްޖެ އެވެ. އެހެންކަމުން އެ ސުކޫލަށް އައު އިމާރާތެއް އަޅައިދެއްވާނެ ކަމަށް ކުރީގެ ރައީސް އިބްރާހިމް މުހައްމަދު ޞާލިޙްވެސް ވަޢުދުވެވަޑައިގެންނެވިއެވެ. ނަމަވެސް ދައުރު ނިމުނުއިރު ވެސް މަސައްކަތް ނުފެށެއެވެ.

ރައީސް މުޢިއްޒު ވެރިކަމަށް ވަޑައިގެން، އަރަބިއްޔާ ސްކޫލުގެ އާ އިމާރާތް އަޅަން ކުރިން ހަމަޖެއްސި ބާ ޖަމާލުއްދީން ހުރި ބިމުގެ ބަދަލުގައި އެ ސްކޫލް އަޅަން އެއަށް ވުރެ ޖާގަ ތަނަވަސް، 386 ނަންބަރު ކޮށި ވަނީ ހަމަޖައްސައިދެއްވާފަ އެވެ.