މި ގައުމަށް ލިބޭ ހުރިހާ ފައިސާއެއްވެސް ލިބެނީ ހަމައެކަނި ފަތުރުވެރިކަމުގެ ތެރެއިން: ސިޔާމް
ލިޔުންތެރިޔާ
ޚަދީޖާ އަރުފާ
މި ގައުމަށް ލިބޭ ހުރިހާ ފައިސާއެއްވެސް ލިބެނީ ފަތުރުވެރިކަމުގެ ސިނާޢަތުގެ ތެރެއިން ކަމަށް ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަޙްމަދު ސިޔާމް ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ބަޖެޓަށް ބަހުސް ކުރައްވަމުން ސިޔާމް ވަނީ، އެ ބަޖެޓް އެކުލަވާލާފައިވާ ގޮތާމެދު ވަރަށް ބޮޑަށް ނުރުހުން ފާޅުކުރައްވާފައެވެ. އެގޮތުން ވިދާޅުވީ، ރާއްޖެއަށް ލިބޭ އާމްދަނީ ގިނަ ކަމަށާ އަދި އެއީ އެންމެން ވެސް ދަންނާނެ ކަމެއް ކަމަށެވެ. އަދި މި ގައުމަށް ލިބޭ ހުރިހާ ފައިސާއެއް ލިބެނީ ހަމައެކަނި ފަތުރުވެރިކަމުގެ ތެރެއިންކަމަށް ސިޔާމް ވިދާޅުވިއެވެ. އެހެންނަމަވެސް އޭގެ ބޭނުން ރަނގަޅުގޮތުގައި ކުރަން ބަޖެޓްގައި ހިމަނާފައި ނުވާ ކަމަށް އޭނާ ވިދާޅުވިއެވެ.
މި ގައުމަށް ލިބޭ ހުރިހާ ފައިސާއެއްވެސް ލިބެނީ ހަމައެކަނި ފަތުރުވެރިކަމުގެ ތެރެއިންކަން ތިބޭފުޅުންނަށްވެސް ހުރިހާ ދިވެހި ރައްޔިތުންނަށްވެސް އެނގޭ. އަޅުގަނޑުމެން ވިސްނަންވީ ކަަމަކީ، އަޅުގަނޑުމެންނަށް ލިބޭ ފައިސާ ޚަރަދު ކުރަންވީ، އިންސާފު ވެރިކަމާއެކުކަން. ވައްކަން ނުކުރަންވީ، ޚަރަދު ބޮޑު ނުކުރަންވީ އިސްރާފް ނުކުރަންވީ.
މީދޫ ދާއިރާގެ މެންބަރު އަޙްމަދު ސިޔާމް
“މިބަޖެޓްގައި ފޮރިން މިނިސްޓްރީއަށް މިދިޔަ އަހަރުގެ ބެޖެޓަށްވުރެ 40 ޕަސެންޓް މިއޮތީ ގިނަ ވެފައި. ސިންގަޕޫރުގަ ހުންނަ އެމްބަސީއަށް ޚަރަދުކުރަން އެތައް ސަތޭކަ މިލިއަން ރުފިޔާއެއް. މިހެން ގޮސް ބެންކޮކްގަ ހުންނަ އެމްބަސީއަށް ޚަރަދުކުރަން އެތައް ސަތޭކަ މިލިއަން ރުފިޔާއެއް. ދުބާއީ އެމްބަސީއަށް އެތައް މިލިއަން ރުފިޔާއެއް. އެކި ގައުމުތަކުގަ އެމްބަސީތައް ހުޅުވައިގެން ވާކަމެއް ނެތް ހަރާމް“ ބަޖެޓަށް ފާޑުވިދާޅުވެ ވާހަކަ ދައްކަވަމުން ސިޔާމް ވިދާޅުވިއެވެ.
މިއާއެކު ސިޔާމް ވަނީ، ދުނިޔޭގެ ހުރިހާ ގައުމެއްގައި އެމްބަސީތައް ހަދައި، ރާއްޖޭގެ ޓެކްސް ޕޭޔަރުން ދޭ ހުރިހާ ފައިސާތަކެއް ޚަރަދުކުރުމުގައި އެކ އެކަމާ ލަދުވެތިވެ، ބިރުވެތިވާން ޖެހިއްޖެ ކަމަށް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
