އަމިއްލަ ދިފާއުގައި ވާހަކަދައްކަން މަޖިލީހަށް ނާދެވުނު މީހަކަށް ޤައުމު ދިފާއުނުކުރެވޭނެ: ނަޝީދު
އަމިއްލަ ދިފާއުގައި ވާހަކަދައްކަން ރައްޔިތުންގެ މަޖިލީހަށް ހާޒިރުވާން ނުކުރުނު މީހަކަށް ޤައުމުގެ ދިފާއުގައި ވަކާލާތުނުކުރެވޭނެކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުޙައްމަދު ނަޝީދު އަބްދުالله (މޮސްޓާ) ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ބަންޑާރަ ނައިބުގެ އިތުބާރު ނެތްކަމުގެ މައްސަލައާއި ގުޅިގެން އެމަނިކުފާނު ޖަވާބުދާރީވެ ވަޑައިގަތުމަށް ތާވަލުކޮށްފަ އެވެ. އެހެން ނަމަވެސް ހާޒިރުވެވަޑައިނުގެން ބަންޑާރަނައިބުވަނީ ލިޔުމެއް މަޖިލީހަށް ފޮނުއްވާފައެވެ.
އެއާއެކު ބަންޑާރަނައިބު މަޖިލީހަށް ޖަވާބުދާރީވެލައްވަން ޖެހިވަޑައިގަންނަވާ ގޮތާއި ގުޅިގެން މެމްބަރުންގެ މެދުގައި ޚިޔާލުތަފާތުވެ ޙައްލު ނުކުރެވުމުން ރިޔާސަތުން ވަނީ އެ މައްސަލަ މަޑުޖައްސާ ސުޕްރިމް ކޯޓުގެ ލަފާ ހޯދައިގެން ކުރިއަށް ގެންދިއުމަށް ނިންމާފައެވެ.
އެ މައްސަލައަށް އިޝާރާތްކުރައްވައި މޮސްޓާ ވިދާޅުވީ، ޤާނޫނު އަސާސީގައި އޮތީ ރިފްއަތު ގެންނާކަށް ނޫން ކަމަށާއި، އޮތީ ބަންޑާރަނައިބު ގެންނަން ކަމަށެވެ.
ގާނޫނު އަސާސީގައި އޮތީ އިބްރާހީމް ރިފްޢަތު ގެންނާކަށެއް ނޫން. ގާނޫނު އަސާސީގައި އޮތީ ބަންޑާރަ ނައިބު ގެންނަން. ރައްޔިތުންގެ މަޖިލީހުގައި ރައްޔިތުން ހޮވާފައިތިބި 87 މެންބަރުންގެ ކުރިމައްޗަށް އަންނަން ނުކެރޭ މީހެއް، ކިހިނެއްތޯ ގައުމު ދިފާއު ކުރަން އެހެން ތަނެއްގައި ވާހަކަ ދައްކަން ކެރޭނީ. މިތަނަށް އައިސްފައި އަމިއްލަ ދިފާއުގައި ވާހަކަދައްކަން ނުކެރުނު މީހަކަށް ގައުމުގެ ދިފާއުގައި ކުރެވޭނެ ކަމެއް ނޯންނާނެ.
މެންބަރު މުހައްމަދު ނަޝީދު
މޮސްޓާ ވިދާޅުވީ ގާނޫނު އަސާސީގައި އޮންނަނީ އަނގަބަހުން ނުވަތަ ލިޔުމުން ޖަވާބުދާރީވުމަށް ނޫން ކަމަށް، އޭގައި އޮންނަނީ "އަނގަބަހުންނާއި، ލިޔުމުން" ކަމަށެވެ. އަދި ދެ ގޮތުން ކުރެ ވަކި ގޮތެއް އިޚުތިޔާރުކުރާނަމަ "ނުވަތަ" ޤާނޫނީ ނައްސުގައި އޮންނަކަންވެސް މޮސްޓާ ފާހަގަކުރެއްވިއެވެ.
މޮސްޓާ އިތުރަށް ވިދާޅުވީ، މަޖިލީހަކީ އެމްޑީޕީގެ މެޖޯރިޓީ އޮތް ތަނެއް ކަމަށާ، އަދި އެމްޑީޕީން ބޭނުން ގޮތަށް މީގެ ކުރިންވެސް މަޖިލީހުގެ މެންބަރުން ވަކިކޮށްފައިވާ ކަމަށެވެ. އެހެންކަމުން، "ބޮޑު ތަނެއް ވިއްކާލުމަށްފަހު" އެކަމާއި ދެކޮޅަށް ރައްޔިތުން ބޮޑު ހިނގާލުމަކަށް ނުކުންނަން ތައްޔާރުވެފައިވަނިކޮށް އަމިއްލަ ދިފާއުގައި ޖަވާބުދާރީ ވުމަށް ރިފްއަތު އަށް މަޖިލީހަށް ނާދެވެންވީ ކީއްވެތޯ އޭނާ ސުވާލު ކުރެއްވިއެވެ.
މިއާއެކު މޮސްޓާ ވިދާޅުވީ، ބަންޑާރަނައިބުގެ މަޤާމުގައި ހުންނަވާކަމަށްވާނަމަ މަޖިލީހަށް ވަޑައިގެން ޖަވާބުދާރީވެވަޑައިގަންނަވަންޖެހޭނެ ކަމަށެވެ. އެފަދައިން ކަން ނުކުރެވޭނަމަ އިސްތިއުފާ ދެއްވުމަށްވެސް މޮސްޓާ ވަނީ ގޮވާލާފައެވެ.
މީގެ ކުރިންވެސް އަމިއްލަ ޖީބަށް ފައިދާވާ ގޮތަށް ރިފްއަތު ލަފާދެއްވާފައިވާ ކަން ފާހަގަކުރައްވައި މޮސްޓާ ވިދާޅުވީ ސިނގެރެޓު ކޮންޓެއިނަރެއްގެ ކަންތަކުގައިވެސް އަމިއްލައަށް ފައިދާ ލިބޭ ގޮތަށް އަމަލުކުރައްވާފައިވާ ކަމަށެވެ.
މޮސްޓާވަނީ ރިފްއަތަކީ ޤާނޫނަކީ ކޯއްޗެއްކަން އެނގިވަޑައިގަންނަވާ ބޭފުޅެއްނޫންކަމަށް ވިދާޅުވެ އޭނާ އެ މަޤާމުގައި ބަހައްޓަން ފެނިވަޑައިނުގަންނަވާ ކަމަށާއި، އެހެންކަމުން އޭނާ މިއަދުން މިއަދަށް އިސްތިއުފާދެއްވަންޖެހޭނެ ކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
