އަޅުގަނޑުމެން އަނިޔާވެރިކަން ބަދަލުކުރަން ބޭނުންކުރީ ވޯޓު: ރައީސް ޞާލިޙް

މެދު ނުކެނޑި 6 އަހަރު އަނިޔާވެރިކަމާއި ދެކޮޅަށް މަގުމަތީގައި އަޑުއުފުލުމަށް ފަހު 2018 ވަނަ އަހަރު އަނިޔާވެރިކަން ބަދަލުކުރަން ބޭނުންކުރީ ރައްޔިތުންނަށް ލިބިފައިވާ އެންމެ ބޮޑު ހައްޤު ވޯޓު ކަމަށް ރައީސް އިބަރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ޅ.އަތޮޅަށް ކުރައްވަމުން ގެންދަވާ ދަތުރުފުޅުގައި ކުރެންދުއަށް ވަޑައިގެން ދެއްކެވި ވާހަކަފުޅުގައެވެ.

ރައީސްގެ ވާހަކަ ފުޅުގައި ވަނީ ރާއްޖެގެ ސިޔާސީ މަސްރަޙަށް ގެނެވުނު ބަދަލުގައި ކުރެންދޫގެ ރައްޔިތުން ބައިވެރިވެފައިވާ ގޮތުގަ ވާހަކަ ދައްކަވައި އެރަށުގެ ރައްޔިތުންނަށް ތަޢުރީފު ކުރައްވައިފައެވެ. އަދި އިސްލަޙީ މަސައްކަތް ތަކުގެ ފެށުން އައިގޮތާއި އެކަންކަން ކުރެވެމުން ދިޔަ ގޮތުގެ ހަނދާންތައް އާކުރައްވައިފައިވެއެވެ.

އެންމެ ފުރަތަމަ ރާއްޖޭގައި އިސްލާޙީ މަސައްކަތްތައް ފެށި 2008 ގެ އިންތިޚާބު ކާމިޔާބު ކުރެވި އަނެއްކާ ވެރިކަން ވެއްޓިގެން ދިޔުމުންވެސް އެމްޑީޕީ ސާބިތު ކަމާއި އެކު އިސްލާޙީ މަސައްކަތުގައި ކުރިއަށް ދިޔަ ކަމަށް ރައީސް ވިދާޅުވިއެވެ.

އަދި އެއަށް ފަހު 2013ގެ އިންތިޚާބާއި ކުރިމަތިލީވެސް އަނިޔާވެރިކަން މަތީގައި ތިއްބައި ކަމަށާއި އެ އިންތިޚާބުގައި 3 ފަހަރަށް ވޯޓު ލާން ޖެހި ނާކާމިޔާބުވުމުން އަނިޔާވެރި ކަމާއި ދެކޮޅަށް ގާތްގަނޑަކަށް 6 އަހަރު މަގުމަތީގައި ހޭދަ ކުރެއްވި ކަމަށް ރައީސް ޞާލިޙް ވިދާޅުވިއެވެ.

"އެނުކުތް ގޮތައް މެދުނުކެނޑި ހަ އަހަރު މަގުމަތީގައި ތިބެ 2018 ވަނަ އަހަރު އަޅުގަނޑުމެން ވޯޓުން އަނިޔާވެރިކަން ބަދަލު ކުރީ، މިއަދުވެސް އަޅުގަނޑުމެން ކަންކުރާނީ އެހެން އިރާދަކުރެއްވިއްޔާ، އަޅުގަނޑުމެންނަކީ އަނިޔާވެރިކަން ނިމުމަކަށް ގެނައުމަށް ރައްޔިތުންނަށް ލިބިފައި އޮތް އެންމެ މުހިންމު ހައްޤު ބޭނުން ކުރާ މީހުން"

ރައީސް އިބްރާހިމް މުޙައްމަދު ޞާލިޙް

ރައީސް ޞާލިޙް ވިދާޅުވީ މިއަހަރު މިބޭއްވޭ އިންތިޚާބު އެމްޑީޕީ ކޯލިޝަނުން ކާމިޔަބު ކޮށް ދެވަނަ ދައުރަކަށް ދާނީ ބޮޑު ތަފާތަކުން ކާމިޔާބު ކޮށްގެން ކަމަށެވެ.

ރައީސްގެ ވާހަކަފުޅުގައި ވަނީ ކުރެންދޫ ރައްޔިތުން ދަތުރުދާނެ ރަށަކާއި އެކު ރަށުގެ ތަރައްޤީ އާއި ގުޅޭ ވަޢުދުތަކެއް ވެވަޑައިގެންފައެވެ.

ރައީސް ވިދާޅުވީ ކުރެންދޫއަށް ދިމާވެފައިވާ ބޯހިޔާވަހިކަމުގެ މައްސަލައަސް ހައްލެއް ގެނައުމަށް އެޅުމަށް ހަމަޖެހިފައިވާ 50 ހައުސިންގެ ޔުނިޓްގެ އިތުރަށް  ރައްޔިތުން އެދިފައިވާ ގޮތައް އިތުރު 50 ހައުސިންގޔުނިޓް އަޅުއްވައިދެއްވާނެ ކަމަށެވެ.

އަދި އެރަށުގައި ގާއިމް ކުރެވެމުންދާ ފެނާއި ނަރުދަމާ ނިޒާމްގެ މަސައްކަތް ނިމުމުން އެރަށުގެ މަގުތައް ޒަމާނީ ފެންވަރަށް ހަދައިދީ ފެން ހިންދާ ނިޒާމް ގާއިމް ކޮށްދެއްވާނެ ކަމަށްވެސް ރައީސް ވިދާޅުވިއެވެ.

އެރަށުގެ ގިރާ ސަރަހައްދު ހިމާޔަތް ކުރުމުގެ މަސައްކަތުގައި އަދި އިތުރަށް ކުރަންޖެހޭ ކަންކަން ހުރުމުން، އެކަންކަންވެސް ކޮށްދެއްވާނެ ކަމަށް ރައީސް ވިދާޅުވިއެވެ.

މީގެ އިތުރުން ސްކޫލަށް ބޭނުންވާ 12 ކްލާސް ރޫމް އަޅައިދިނުމާއި، ޒުވާނުންބޭނުންވާ ގޮތައް ކުޅިވަރުކުޅޭ އިންޑޯ ކޮމްޕްލެކްސްއެއް ފެސިލިޓީ ތަކާއި އެކު އަޅައި ދެއްވާނެ ކަމަށާއި، ރަށަށް ދިމާވެފައިވާ ކުނީގެ މައްސަލަ ހައްލުކުރުމަށް ވޭސްޓް މެނޭޖްމަންޓް އަޕްގްރޭޑްކޮށް ދެއްވާނެ ކަމަށް ރައީސް ޞާލިޙް ވިދާޅުވިއެވެ.