ތާއީދުކުރާތީ ވަޒީފާއިން ކަނޑާލާ މީހުންގެ ވަޒީފާ އިޔާދަކޮށްދޭނަން: ޑރ މުއިއްޒު
ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒަށް ތާއީދުކުރައްވާތީ، އަދި އެމަނިކުފާނަށް މަރުޙަބާ ދަންނަވަން ނިކުމެގެން ވަޒީފާއިން ކަނޑާލާ މީހުންގެ ވަޒީފާތައް އިޔާދަކޮށްދޭނެކަމަށް ޑރ މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައިވަނީ ބ ދަރަވަންދޫއަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.
ޑރ މުއިއްޒު ވިދާޅުވީ އެމަނިކުފާނު ރިޔާސީ ކެމްޕޭނުގެ ދަތުރުފުޅުތަކުގައި ރަށްތަކަށް ވަޑައިގަތުމުން މަރުހަބާ ދަންނަވަން ނިކުންނަން ބޭނުންވެފައި ތިބޭ އެތައް ބިރުން ނުނިކުމެ ތިބޭ ކަމަށެވެ.
އެގޮތުން ގިނައީ ސަރުކާރުގެ ވަޒީފާތަކާއި، ކުންފުނިތަކުގައި ތިބޭ ފަރާތްތައްކަން ފާހަގަކުރައްވާ ޑރ މުއިއްޒު ވިދާޅުވީ، އެމަނިކުފާނަށް މަރުހަބާ ދަންނަވަން ނިކުމެގެން، ނުވަތަ ރިޔާސީ ކެންޑިޑޭޓުންގެ ތެރެއިން ޑރ މުއިއްޒަށް ތާއީދުކުރައްވާތީ ވަޒީފާއިން އެއްވެސް މީހަކު ވަކިކޮށްފިނަމަ، އެ މީހެއްގެ ވަޒީފާ އިޔާދަކޮށްދެއްވާނެ ކަމަށެވެ.
"މިހާރު ވަޒީފާއިން ކަނޑާލިޔަސް، އަލުން އަނބުރާ އެ ވަޒީފާތައް ދޭނަން. މުސާރަތައް މިހާރަށްވުރެ ވެސް ރަނގަޅުކުރުން އަޅުގަނޑުމެންގެ ވިސްނުމަކަށް ވާނީ. ވަޒީފާގެ ޔަގީންކަމާއި މުސާރަ ބޮޑުވުމުގެ ޔަގީންކަމާއި އެކީގައި އަޅުގަނޑު މި ދަންނަވަނީ ތިބޭފުޅުން އަޅުގަނޑުމެންނާއި އެކީގައި ކެމްޕޭނުގެ މަސައްކަތްތައް ވަރުގަދައަށް އުޅެދެއްވާ މި އިންތިޚާބު ކާމިޔާބުކުރުމުގެ މަސައްކަތް ކުރައްވާށޭ"
ޑރ މުހައްމަދު މުއިއްޒު
ޑރ މުއިއްޒު ވިދާޅުވީ ވަޒީފާގެ ބިރުވެރިކަން ނައްތާލަން ޖެހޭ ކަމަށެވެ. އަދި ސިޔާސީ ގޮތުން ވަކި މީހަކަށް ތާއީދުކުރާތީ ވަޒީފާގެ ބިރުދައްކާ އެފަދަ މާހައުލެއްގައި ރައްޔިތުން ބައިތިއްބުމަކީ ނިމުމަކަށް ގެންނަން ޖެހޭ ކަމެއްކަމަށް ޑރ މުއިއްޒު ވިދާޅުވި އެވެ.
އެއާއެކު އެމަނިކުފާނު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި މި ސަރުކާރުން ވަޒީފާދިން އެއްވެސް މީހެއް ވަޒީފާއިން ވަކި ނުކުރާނެކަމުގެ ޔަގީންކަން ދެއްވާކަމަށެވެ. އަދި ރަށުގައި ތިބެގެން ވަޒީފާ އަދާކުރެވޭނެ މަހު ފަހިކޮށްދެއްވާނެ ކަމަށެވެ.
އޭގެ އިތުރުން އިޤްތިޞާދު ރަނގަޅުވަމުން އަންނަ ނިސްބަތަކުން މަސައްކަތްޕުޅު ކުރައްވާނީ ހުރިހާ ދާއިރާއެއްގައި މަސައްކަތްކުރައްވާ ފަރާތްތަކުގެ މުސާރަތައް ރަނގަޅުކުރުމަށް ކަމަށް ޑރ މުއިއްޒު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
