ރައީސް ޞާލިހު އެދިލެއްވީ މުޢިއްޒު ހުވާކުރުމުގެ ރަސްމިއްޔާތަށް ހުރަސް ނާޅަން؛ އެމްޑީޕީން ބޭނުންވަނީ ބޯއިކޮޓް ކުރަން!

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިރުޝާދު ދެއްވާފައިވަނީ އިންތިޚާބީ ރައީސް ޑރ.މުހައްމަދު މުއިއްޒު ހުވާކުރެއްވުމުގެ ރަސްމިއްޔާތަށް ހުރަސް އެޅޭ ކަމެއް ނުކުރުމަށް ކަަމަށް އެމްޑީޕީގެ ޕީޖީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެއެވެ.

އަސްލަމް އެފަދައިން ވިދާޅުވީ އަންގާރަ ދުވަހު މަޖިލީހުގެ އިދާރާގައި ނޫސްވެރިންނަށް މައުލޫމާތުދެއްވަމުންނެވެ. އަސްލަމް ވިދާޅުވީ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައާ މެދު ސީދާގޮތެއްގައި ރައީސާއެކު މަޝްވަރާކުރެވިފައިނުވާ ކަމަށެވެ. ނަމަވެސް ރައީސް ވަނީ މީގެ ކުރިން ވެސް އިންތިޚާބީ ރައީސްގެ ހުވާކުރުމުގެ ރަސްމިއްޔާތަށް ހުރަސް އެޅޭ ކަމެއް ނުކުރުމަށް އިރުޝާދު ދެއްވާފައި ކަމަށް ވިދާޅުވިއެވެ.

"(ރައީސް ޞާލިހު) ވިދާޅުވި ވަރަށް ދެރަ ކަމެކޭ. އެކަން (ހުވާކުރުމުގެ ރަސްމިއްޔާތަށް ހުރަސްއަޅަން) އެއްގޮތަކަށް ވެސް އެހެން ކުރާކަށް ފެނިވަޑައެއް ނުގަންނަވައޭ. އަޅުގަނޑު އެ ވާހަކަ ޕާލިމެންޓަރީ ގުރޫޕު މެންބަރުންނަށް ވެސް ދެންނެވިން،" އަސްލަމް ވިދާޅުވި އެވެ.

އެހެންނަމަވެސް މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ހުށަހަޅާފައި ވަނިކޮށް އެ މައްސަލަ އެޖެންޑާ ނުކުރައްވާ ނަޝީދު ރިޔާސަތުގައި އިންނަވައިގެން މުއިއްޒު ހުވާކުރައްވާނަމަ އެކަމާ މެދު ޤާނޫނީ ގޮތުން ސުވާލު އުފައްދަވާނެ ކަަމަށް އަސްލަމް ވިދާޅުވިއެވެ.

"މިފަދަ ޖަލްސާއަކީ ގާނޫނީ ގޮތުން ސައްހަ ޖަލްސާއެއް ކަމަށް އަޅުގަނޑުމެން ގަބޫލެއް ނުކުރާނަން. ދެން އަޅުގަނޑުމެން ކޮންމެހެން އެ ތަނަށް ގޮސްފައި ހަޅޭއް ނުލެވިޔަސް އަޅުގަނޑުމެން ހަމަ ބޮއިކޮޓު ވެސް ކޮށްފާނެތާ ދެއްތޯ،" އަސްލަމް ވިދާޅުވި އެވެ.

ހުވާކުރުމުގެ ރަސްމިއްޔާތާމެދު ޢަމަލު ކުރާނެ ވަކި ގޮތެއް އަދި އެމްޑީޕީން އަދި ނިންމާފައި ނުވާ ކަމަށް އަސްލަމް ވިދާޅުވިއެވެ.

"އަޅުގަނޑުމެންގެ ތެރޭގައި އަދިވެސް ރޫހު އެބަހުރި އެ ޖަލްސާގައި ކުޑަ މިންވަރަކަށް ނަމަވެސް ބައެއް ކަންކަން ކުރުމަށް، އެހެންނަމަވެސް ސީދާ ވަކި ގޮތެއް ނުނިންމަން، ޕާލިމެންޓަރީ ގުރޫޕުން ވަކި ގޮތެއް ނިންމާފައިނުވާނެ."

އެ ޖަލްސާގެ ރިޔާސަތުގައި ނަޝީދު އިންނަވާ ނަމަ އަމަލުކުރާނެ ގޮތާ މެދު މެންބަރުންގެ މެދުގައި ތަފާތު ޚިޔާލުތައް ހުރިކަން ފާހަގަކުރައްވައި އަސްލަމް ވިދާޅުވީ ހަމަހިމޭން އިހުތިޖާޖެއް ކުރެއްވުމަށް ނުވަތަ ޖަލްސާ ދޫކުރައްވާ ވަޑައިގެންނެވުމަށް ޚިޔާލު ހުށަހަޅުއްވާފައިވާ ކަމަށެވެ.

އެމްޑީޕީގެ 55 މެންބަރުން ހާޒިރު ނުވިޔަސް ހުވާކުރުމުގެ ރަސްމިއްޔާތު ކުރިއަށް ގެންދެވޭނެކަން އަސްލަމް ފާހަގަކުރެއްވިއެވެ. އަދި މުއިއްޒު ހުވާކުރެއްވުމަށް ހުރަސް އެޅުމުގެ އެއްވެސް ނިޔަތެއް އެމްޑީޕީގެ ނެތްކަމަށް އަސްލަމް ވަނީ ވިދާޅުވެފަ އެވެ.