މަތީ ތަޢުލީމަކީ ހަމައެކަނި ފަންނީ ޢިލްމާއި ހުނަރު ލިބިގަތުން ނޫން، އެއީ އެ ޢިލްމުގެ ބޭނުންކޮށް ދިމާވާ ގޮންޖެހުންތައް ހައްލުކޮށްދިނުން: ޑރ.ޝެހެނާޒް

މަތީ ތަޢުލީމަކީ ހަމައެކަނި ފަންނީ ޢިލްމާއި ހުނަރު ލިބިގަތުން ނޫން، އެއީ އެ ޢިލްމުގެ ބޭނުން ހިފައިގެން މުޖުތަމަޢަށް ދިމާވާ ގޮންޖެހުންތައް ހައްލުކޮށް، ޤައުމީ ތަރައްޤީއަށް ހިއްސާވުމުގެ ޒިންމާއެއް ކަމަށް ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް ވިދާޅުވެއްޖެއެވެ.

އެމްއެންޔޫގެ ދެވަނަ ޓާމުގެ ދަސްވެނިވުމުގެ ރަސްމިއްޔާތުގައި، ފެންވަރު ރަނގަޅު ތަޢުލީމާއި އަޚުލާޤީ ލީޑަރޝިޕާއި މުޖުތަމަޢަށް ޚިދުމަތްކުރުމުގެ މުހިންމުކަމުގެ މައްޗަށް އަލިއަޅޫވާލައްވައި ވާހަކަފުޅު ދައްކަވަމުން ޑރ.ޝެހެނާޡް ވިދާޅުވީ، ލިބިފައިވާ ތަޢުލީމަކީ ހަމައެކަނި ޒާތީ ފައިދާއަށް ނޫން ކަމަށާއި، އެއީ މުޅި މުޖުތަމަޢަށް ޚިދުމަތްކުރުމަށް ވެވޭ ވަޢުދެއް ކަމަށެވެ. އަދި އެއީ ފާޑުކިޔުންތެރި ވިސްނުމާއި ހުޅުވާލެވިފައިވާ ސިކުނޑިއެއްގެ ބޭނުންތެރިކަމެއްކަން ފާހަގަކުރެއްވިއެވެ.

އެގޮތުން ޙަޤީޤީ ތަޢުލީމަކީ ހަމައެކަނި ތިމާގެ ޚިޔާލު ފާޅުކުރުމެއް ނޫން ކަމަށާއި، އެއީ އެހެން މީހުންގެ ވިސްނުންތައް ޤަބޫލުކުރެވޭ ހުޅުވާލެވިފައިވާ ސިކުނޑިއެއް ބައްޓަންކޮށް، އާ ކަންކަން ދަސްކުރުމުގެ ޤާބިލުކަން ހޯދުންކަމަށް ޑރ. ޝެހެނާޒް ވިދާޅުވިއެވެ.

ޔުނިވަރސިޓީގެ ކާމިޔާބީތަކުގައި ޔުނިވަރސިޓީ ކައުންސިލާއި އެކެޑެމިކް އަދި އިދާރީ މުވައްޒަފުންނާއި ދަރިވަރުން ކޮށްދެއްވާ މަސައްކަތް ފާހަގަކުރައްވައި ވައިސް ޗާންސެލަރ އެ ފަރާތްތަކަށް ޝުކުރު ދެންނެވިއެވެ. މީގެ އިތުރުން، އެލަމްނައި މާޝަލުންގެ ގޮތުގައި ހޮވުނު ވިލިނގިލީ ހޮސްޕިޓަލުގެ ނަރސިން-އިން-ޗާޖް ޔޫސުފް ރަޝީދާއި އެމްއެންޔޫގެ ސްކޫލް އޮފް ނަރސިންގެ ލެކްޗަރަރ ޢާއިޝަތު ޢަޤްލީމާގެ ޚިދުމަތްތައް ވެސް ފާހަގަކުރެއްވިއެވެ.

ވާހަކަފުޅު ނިންމަވާލައްވަމުން ޑރ. ޝެހެނާޒް ދަސްވެނިންނަށް އިލްތިމާސްކުރެއްވީ ތެދުވެރިކަމާއި ހަމްދަރުދީއާއި ޕްރޮފެޝަނަލިޒަމާ އެކު ޢާންމު ޚިދުމަތުގައި ދެމިތިބުމަށެވެ.

މި ރަސްމިއްޔާތުގައި ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގެންނެވީ މިނިސްޓަރ އޮފް ޔޫތު އެމްޕަވަރމެންޓް، ސްޕޯޓްސް އެންޑް ފިޓްނެސް ޢަބްދުﷲ ރާފިޢުއެވެ.