އެމްޑަބްލިޔުއެސްސީގެ ސްޓާފް އެވޯޑް ނައިޓްގައި 109 މުވައްޒަފަކަށް އެވޯޑް ދީފި

ޤައުމީ ފެންކުންފުނި މާލެ ވޯޓާ އެންޑް ސުވެރެޖް ކޮމްޕެނީގެ 2026 ވަނަ އަހަރުގެ އެވޯޑް ނައިޓްގައި 109 މުވައްޒަފަކަށް އެވޯޑްތައް ދީފިއެވެ.

ސްޓާފް އެވޯޑް ހަފްލާގައި 12 ކެޓަގަރީއަކުން 40 މުވައްޒަފަކަށް އެވޯޑް ދިނުމާއެކު ދިގު މުއްދަތުގެ ޚިދުމަތުގެ އަގު ވަޒަންކުރުމުގެ ގޮތުން 69 މުވައްޒަފަކަށް ވަނީ ރިކޮގްނިޝަން އެވޯޑް ދީފައެވެ.

މި ހަފްލާގައި އެވޯޑްތައް ހަވާލުކޮށްދެއްވީ ޝަރަފުވެރި މެހުމާނު، އެމްޑަބްލިޔުއެސްސީގެ ބޯޑުގެ އެކްޓިން ޗެއާޕަރސަން ޢައިޝަތު ރޫޙީ އާއި ބޯޑު ޑިރެކްޓަރުންނާއި މެނޭޖިން ޑިރެކްޓަރު ޙުސައިން ފަހުމީ އަދި ސީނިއާ މެނޭޖްމަންޓް ޓީމުގެ މެންބަރުންނެވެ. ހަފްލާ ބޭއްވީ ފާއިތުވި އަހަރު ފާހަގަކޮށްލެވޭ މަސައްކަތްތައް ކުރި މުވައްޒަފުންނާއި ކުންފުންޏަށް ދިގު ޒަމާނެއް ވަންދެން ޚިދުމަތް ކުރި މުވައްޒަފުންގެ ޚިދުމަތުގެ އަގު ވަޒަންކުރުމުގެ ގޮތުންނެވެ.

އެ ރޭގެ ރަސްމިއްޔާތުގައި އެންމެ ޚާއްޞަ އެވޯޑް ކަމުގައިވާ "ޗެއާޕަރސަންސް އެވޯޑް ފޯރ އެކްސެލެންސް" ހާސިލުކުރީ ކުންފުނީގެ ސީނިއާ އިލެކްޓްރިކަލް އިންޖިނިއަރު އާސިފް ޙަސަން ޖަނާހް މޫސާއެވެ.

ކުންފުނީގެ ކުރިއެރުމަށާއި ތަރައްޤީއަށް އިޚްލާޞްތެރި ޚިދުމަތްތަކެއް ކޮށް، ކުންފުނީގެ ތަސައްވުރު ކުރިއެރުވުމުގައި ކެނޑިނޭޅި މަސައްކަތްކޮށްދީފައިވާ ފަރާތަކަށް ދެވޭ މި އެވޯޑަކީ ކުންފުނީގެ އެންމެ ޝަރަފުވެރި ޝުކުރުގެ ރަމުޒެވެ.

ހަމައެއާއެކު މެނޭޖިން ޑިރެކްޓަރު ޙުސައިން ފަހުމީ ވަނީ "ވަންއެމްޑަބްލިޔުއެސްސީ" (OneMWSC) ގެ ނަމުގައި ސްޓްރެޓީޖިކް އޮނިގަނޑެއް ރަސްމީކޮށް އިފުތިތާޙުކޮށްދެއްވައިފައެވެ.

މި އިނީޝިއޭޓިވް ބިނާވެފައި ވަނީ މުޅި ރާއްޖޭގައި އެމްޑަބްލިޔުއެސްސީން ހިންގާ ބޮޑެތި އިންފްރާސްޓްރަކްޗާ މަޝްރޫޢުތަކާއި އިޖުތިމާޢީ ޒިންމާގެ ޙަރަކާތްތަކާއި ޑިޖިޓަލް ޚިދުމަތްތައް އެއް ފުރާޅެއްގެ ދަށުން ގެންދެވޭނެ ގޮތް ހެދުމުގެ މައްޗަށެވެ.