ހެދުން އެޅުމުގެ ގަވާއިދަށް ގެނައި އިސްލާހަކީ އިސްލާމީ މިންގަނޑުތަކާ ދިމާއަށް އެޅުނު މުހިންމު ފިޔަވަޅެއް: އަދާލަތު

ސިވިލް ސާވިސް މުވައްޒަފުންގެ ހެދުން އެޅުމުގެ ގަވާއިދަށް ގެނެވުނު ބަދަލުތަކަކީ ހެޔޮ ބަދަލުތަކެއް ކަމަށާ އެއީ އެކަމުގެ އެންމެ ފުރިހަމަ ކަމާ ހަމައަށް ނުދެވުނު ކަމުގައި ވިޔަސް، މުޖުތަމައުގެ ދީނީ އަދި އިޖުތިމާއީ ސަލާމަތްތެރިކަމަށްޓަކައި އެޅުނު ރަނގަޅު ފިޔަވަޅުތަކެއްގެ ގޮތުގައި ދެކޭ ކަަމަށް އަދާލަތު ޕާޓީން ބުނެފި އެވެ.

އެމްޑީޕީއާ އަންހެނުންގެ ހައްގުތަކަށް ވަކާލާތު ކުރާ ކަމަށް ބުނާ ބައެއް އަންހެނުން ވަރަށް ދެކޮޅު މި ބަދަލާއި ގުޅޭގޮތުންް އަދާލަތުން ވަނީ އެ ނިންމުމަށް ތާއީދުކޮށް ބަޔާނެއް ނެރެފަ އެވެ.

އެ ޕާޓީން ބުނީ މި ބަދަލުން އެންމެ ފުރިހަމަ ގޮތަށް އަމަލު ނުކުރެވުނު ނަމަވެސް ރަނގަޅުގޮތާއި ގާތްކުރާ ހެޔޮ ބަދަލުތަކަކީ އެކަމަށް ތަރުހީބުދީ ހިތްވަރުދޭންޖެހޭ ކަންކަން ކަމަށެވެ. އަދި އެކަމުގެ ދަލީލުތައްވެސް ބަޔާންކޮށްފައިވެ އެވެ. އެގޮތުން ކުޅަދާނަވީ މިންވަރަކުން ތަގުވާވެރިވުމަށް އަންގާފައިވާ އެންގެވުމާއި އެންމެ ފުރިހަމަ ގޮތަށް ނުކުރެވޭނެމަ އެއާއި ކައިރި ކުރާށެ އޮތް ބަސްފުޅު ހަނދާންކޮށް ދީފައިވެ އެވެ.

"އެހެންކަމުން، ހެޔޮ ބަދަލުތައް ގެނެސް، މާތްﷲ ރުހިވޮޑިގަންނަވާ މިންގަނޑަށް ވާޞިލުވުމަށް ގަދައަޅާ މަސައްކަތް ކުރުމަކީ ކޮންމެ މުސްލިމެއްގެ ވެސް ޒިންމާއެކެވެ," އަދާލަތުގެ ބަޔާނުގައިވެ އެވެ.

އިސްލާމްދީނަކީ އިންސާނާގެ ދިރިއުޅުމުގެ ހުރިހާ ކަމެއް އެންމެ ފުރިހަމަ ގޮތުގައި ތަރުތީބުކޮށްދޭ ދީންކަން ފާހަގަކޮށް އެ ބަޔާނުގައި ބުނީ މިގޮތުން، ހެދުން އެޅުމުގެ މިންގަނޑުތަކަކީ އިސްލާމީ ތަރުބިއްޔަތާއި، އަހްލާގުގެ ވަރަށް މުހިންމު ބައެއް ކަމަށެވެ. އަދި އިސްލާމްދީނުގައި ހެދުން އެޅުމުގެ މަގްސަދަކީ ހަމައެކަނި ފިނިހޫނުމިނުން ސަލާމަތްވުމާއި ޒީނަތްތެރިވުމެއް ނޫން ކަމަށާ އޭގެ އެންމެ ބޮޑު މަގްސަދަކީ އައުރަ ނިވާކުރުމާއި، އިންސާނާގެ އިއްފަތްތެރިކަމާއި ކަރާމާތް ރައްކާތެރިކުރުން ކަމަށެވެ.

އެކަމުގެ ދަލީލުތައްވެސް ކީރިތި ޤުރުއާނުން ގެނެސްދީފައިވެ އެވެ.

އިސްލާމްދީނުގައި އައުރަ ނިވާކުރުމަކީ ކޮންމެ މުސްލިމް ފިރިހެނަކާއި އަންހެނެއްގެ މައްޗަށްވާ ވާޖިބެއް ކަމަާާ އަދި މިއީ މިއީ މާތްﷲގެ އަމުރުފުޅަށް ކިޔަމަންތެރިވުމުގެ ގޮތުން ކުރަންޖެހޭ ކަމެއް ކަމަށްވެސް އަދާލަތުގެ ބަޔާނުގައިވެ އެވެ.

އިސްލާމީ މިންގަނޑުތަކާ އެއްގޮތަށް ހެދުން އެޅުމުގައި ބަލަން ޖެހޭ މުހިންމު އަސާސްތަކުގެ ތެރޭގައި، އެ ހެދުމަކީ ހަށިގަނޑުގެ ބައްޓަން އެނގޭ ފަދަ ބާރު ހެދުމަކަށް ނުވުމާއި، އެތެރެ ފެންނަ ފަދަ ތުނި ހެދުމަކަށް ނުވުން ހިމެނޭ ކަމެއް ކަމަށް ބުނެފައިވެ އެވެ.

އައުރަ ނިވާކުރުމަކީ ﷲ ތަޢާލާގެ އަމުރުފުޅެއް ކަމަށާ އެ އަމުރުފުޅާ ދެކޮޅު ހެދުމަކީ އެކަލާނގެ ބާވައިލެއްވި ޙުކުމްފުޅަކާ ދެކޮޅު ހެދުން ކަމުން އެއީ އެއްވެސް މުއުމިނު ފިރިހެނަކަށް ވެސް ނުވަތަ އަންހެނަކަށް ވެސް އިހްތިޔާރު ލިބިގެންވާ ކަމެއް ނޫން ކަމުގައި އަލްއަޙްޒާބް ސޫރަތުގެ 36 ވަނަ އާޔަތުން އެނގޭ ކަމުގައި އެ ބަޔާނުގައިވެ އެވެ.

"ކަންމިހެން އޮތުމުގެ ސަބަބުން، އަންހެނުންނާއި ފިރިހެނުން ވެސް ހިލޭ މީހުންގެ ކުރިމަތީގައި އުޅޭ އިރު ފުރިހަމަގޮތުގައި އެބައިމީހުންގެ އައުރަ ނިވާކޮށްގެން އުޅުމަކީ އެބައިމީހުންނަށްވާ ރައްކާތެރި ކަމެއްކަމުގައި މެނުވީ ނުވެ އެވެ. އެފަދައިން އުޅޭ އުޅުމަށާއި ހެޔޮ ރަނގަޅު ކަންކަމާ ދެކޮޅު ހަދާ ފަރާތްތަކުން ﷲ އަށް ބިރުވެތިވެ، ތައުބާވުމަށް ގޮވާލަމެވެ," އަދާލަތުގެ ބަޔާނުގައިވެ އެވެ.