އަޅުގަނޑުގެ ފަލްސަފާއަކީ ލާމަރުކަޒީކޮށް ރައްޔިތުންނަށް ހިދުމަތް ދިނުން: ރައީސް
އެމަނިކުފާނުގެ ފަލްސަފާ އަކީ ގަބޫލު ކުރައްވާ ހަމައަކީ ވެސް ލާމަރުކަޒީކޮށް ރައްޔިތުންނަށް ހިދުމަތް ދިނުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ކެންދޫއަށް ވަޑައިގެން އެ ރަށުގެ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުންނެވެ. ލާމަރުކަޒީ ނިޒާމަށް މި ސަރުކާރުން ގެނެސްފައިވާ ބަދަލަށް އިދިކޮޅު ޕާޓީތަކާއި ވަރަށް ގިނަ ކައުންސިލްތަކުން ދެކޮޅު ހަދާ ކަންބޮޑުވުން ފާޅުކޮށްފައި ވަނިކޮށް ރައީސް ވަނީ ލާމަރުކަޒީ ނިޒާމާއިމެދު އެމަނިކުފާނުގެ ތަސައްވުރު ހާމަކުރައްވާފަ އެވެ.
ވިދާޅުވީ ލާމަރުކަޒީކޮށް ހިދުމަތް ދިނުން އެއީ ހިތުގެ އަޑީން ފުރިހަމައަށް ގަބޫލުކުރާ ކަމެއް ކަމަށެވެ.
"އަޅުގަނޑުގެ ފަލްސަފާ އަކީ އަދި ގަބޫލުކުރާ ހަމައަކީ ވެސް ލާމަރުކަޒީކޮށް ރައްޔިތުންނަށް ޚިދުމަތް ދިނުން. ލާމަރުކަޒީކޮށް ހިދުމަތް ދިނުން އެއީ އަޅުގަނޑު ހިތުގެ އަޑީން ފުރިހަމައަށް ގަބޫލުކުރާ ކަމެއް އަދި އެކަމުގައި ވަރަށް ފުޅާ ދާއިރާއެއްގައި އަޅުގަނޑު އުޅެފައި ހުރި ކަމެއް އެއީ މާލޭގައި," މާލެ ސިޓީގެ މޭޔަރުގެ މަގާމު އަދާކުރެެއްވި ކުރެއްވުމަށް އިޝާރާތް ކުރައްވާ ރައީސް ވިދާޅުވި އެވެ.
ރައީސް ވަނީ ލާމަރުކަޒީ ގާނޫނަށް ގެނައި އިސްލާހުތައް ދިފާއު ކުރައްވާ ވެސް ވާހަކަފުޅު ދައްކަވާފަ އެވެ. ވިދާޅުވީ އޭގެ ތެރެއިން އެއް އިސްލާހަކީ ރަށްރަށުގައި އާންމުން ކުރާ ކުދިކުދި ވިޔަފާރިތައް ހިމާޔަތް ކުރުން ކަމަށެވެ. އެފަދަ ވިޔަފާރިތަކަށް ކައުންސިލްތަކުން އުފައްދާ ކުންފުނިތަކުން ވަނުމަކީ ރަނގަޅު ކަމެއް ނޫން ކަމަށް ވިދާޅުވި އެވެ. އިސްލާހުގެ އެއް ބޭނުމަކީ އެއީ ކަމަށް ވިދާޅުވި އެވެ.
އަދި ވިދާޅުވީ ބްލޮކްގްރާންޓްގެ ގޮތުގައި ދޭ ފައިސާއިން ރަށަށާއި އަތޮޅަށް އެއްވެސް ފައިދާއެއް ނުކުރާ ކަންކަމަށް ކައުންސިލްތަކުން ހަރަދު ކުރަމުންދާ ކަމަށެވެ. އެ ގޮތުން "ތަޖުރިބާ" ހޯދުމުގެ ނަމުގައި މުޅި ކައުންސިލް އެއްކޮށް ބޭރު ގައުމުތަކަށް ދަތުރުކުރާ ކަން ފާހަގަ ކުރެއްވި އެވެ.
"އަޅުގަނޑަށް އެނގޭ ލާމަރުކަޒީ ނިޒާމުގެ މުހިންމު ކަމާއި އޭގެ ފައިދާއާ އެކަން ކުރެވޭނެ ގޮތާއި އެކަމުގައި ސަރުކާރުތަކުން ވިޔަސް އަދި އެކަމަށް އެކި ދިމަދިމާއިން ހުރަސްތައް ކުރިމަތިކުރާ ގޮތާއި ކުރާ ހުރަސްތައް ގިރާކުރަން ކުރާނެ ކަންކަމާއި މިހެން ގޮސް ލާމަރުކަޒީ ނިޒާމުގެ ހުރިހާ ދިމާއެއްގައި އުޅެވިފައި ހުރި މީހެއް އަޅުގަނޑަކީ," ރައީސް ވިދާޅުވި އެވެ.
ރައީސް ވަނީ ހުރިހާ ކައުންސިލްތަކުން ވެސް އިހްލާސްތެރިކޮށް ޒިންމާދާރުކަމާއެކު މަސައްކަތް ކުރަން ޖެހޭ ކަމަށް ވިދާޅުވެފަ އެވެ.
އަދި ވިދާޅުވީ ކައުންސިލްތައް މާލެއަށް ގެންގޮސް ރައީސް އޮފީހުގައި ބެއިތިއްބުވުމަކީ އެމަނިކުފާނުގެ ސިޔާސަތެއް ނޫން ކަމަށެވެ. އެމަނިކުފާނު އަތޮޅުތެރެއަށް ކުރައްވާ ދަތުރުފުޅުތަކުގެ ބޭނުމަކީ ރައްޔިތުންނާއެކު މަސައްކަތް ކުރުން ކަމުގައި ވިދާޅުވި އެވެ. އެ ދަތުރުފުޅުތަކުގައި ވަޒީރުންނާއި ކުންފުނިތަކުގެ ވެރީން ބައިވެރި ކުރައްވަނީ ރައްޔިތުން ބޭނުންވާ ގޮތަށް ތަރައްގީގެ ކަންކަން ކުރިއަށް ގެންދެވުމަށް ކަމަށް ވެސް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
