ބާސެލޯނާގައި "ގްލޯބަލް ސުމޫދު ފްލޮޓިއްލާ" ގެ އައު މަރުހަލާ ފަށަނީ

އިސްރާއީލުން ބައިނަލްއަގުވާމީ ގާނޫނުތަކާ ހިލާފަށް ފަލަސްތީނުގެ ޣައްޒާ ހިސާރުކޮށްފައި އޮތް އޮތުން ނިމުމަކަށް ގެނައުމަށްޓަކައި މަދަނީ ފަރާތްތަކުން އިސްނަގައިގެން ކުރިއަށްގެންދާ ތާރީހީ ކަނޑުގެ މިޝަން "ގްލޯބަލް ސުމޫދު ފްލޮޓިއްލާ" ގެ އައު މަރުހަލާއެއް ބާސެލޯނާގައި ފެށުމަށް ނިންމައިފިއެވެ.

މި ހަރަކާތަކީ ދުނިޔޭގެ އެކި ކަންކޮޅުތަކުން 80 އަށްވުރެ ގިނަ ބޯޓާއި 3،000 އަށްވުރެ ގިނަ ބައިވެރިން ގުޅިގެން ހިންގާ ބޮޑު ހަރަކާތެކެވެ.

މި ހަރަކާތުގެ ތަފްސީލުތައް ހާމަކުރުމަށް މިއަދު ހެނދުނު ބާސެލޯނާ ގަޑިން 10:00 ގައި ހާއްސަ ނޫސްވެރިންގެ ބައްދަލުވުމެއް ބޭއްވުމަށް ވަނީ ތާވަލުކުރެވިފައެވެ. މި ބައްދަލުވުމުގައި ގްލޯބަލް ސުމޫދު ފްލޮޓިއްލާގެ ސްޓިއަރިންގ ކޮމިޓީގެ މެންބަރުންނާއެކު ގްރީންޕީސް އަދި އޯޕަން އާމްސްގެ ލީޑަރުން ބައިވެރިވާނެއެވެ.

ނޫސްވެރިންގެ ބައްދަލުވުމުގައި މައުލޫމާތު ދެއްވާ ބޭފުޅުންގެ ތެރޭގައި ސޫޒަން އަބްދުﷲ، މުހައްމަދު ނާދިރު އައްނޫރު، ސުމައްޔާ އަކްޑެނިޒް އޯޑޫ، ޑރ. މައިމޫން ހޭރަވަތީ، ސައިފް އަބޫކޭޝެކް، ތިއާގޯ އާވިލާ، ޑރ. އަޒީޒް ރާލީގެ އިތުރުން ގްރީންޕީސްގެ އީވާ ސަލްޑާނާ އާއި އޯޕަން އާމްސްގެ އޮސްކާ ކޭމްޕްސް ހިމެނެއެވެ. މި ބައްދަލުވުން ޔޫޓިއުބް މެދުވެރިކޮށް ވަގުތުން ދައްކާއިރު، ކެޓަލޫނިޔާ ބަހުންނާއި އިނގިރޭސި ބަހުން މައުލޫމާތު ދިނުމަށް ވަނީ ހަމަޖެހިފައެވެ.

މި ބައްދަލުވުމުގައި ފްލޮޓިއްލާގެ ސިޔާސީ އަދި އިންސާނީ މުހިންމުކަމާއި، ބައިނަލްއަގުވާމީ ނިޒާމުތައް ފެއިލްވެފައި އޮތް އޮތުމާއި، ލުބުނާނާއި ހުޅަނގު އައްސޭރީގެ މިހާރުގެ ހާލަތުގެ އިތުރުން މިޝަންގެ ގާނޫނީ އޮނިގަނޑާއި އޮޕަރޭޝަނަލް ޕްލޭންގެ ތަފްސީލު ހާމަކުރާނެ ކަމަށް ބެލެވެއެވެ.

ނޫސްވެރިންގެ ބައްދަލުވުމަށްފަހު، ބާސެލޯނާ ގަޑިން 1:00 ޖަހާއިރު މިޝަންގައި ބޭނުންކުރާ އުޅަނދުފަހަރު ބަލައިލުމުގެ ފުރުސަތުވެސް ނޫސްވެރިންނަށް ލިބިގެންދާނެއެވެ.

2026 ވަނަ އަހަރުގެ މި ފްލޮޓިއްލާގައި ޑޮކްޓަރުންނާއި މުދައްރިސުން ފަދަ އެކި ދާއިރާތަކުގެ ފަންނީ ބޭފުޅުން ބައިވެރިވާއިރު، މި މަސައްކަތް ކުރިއަށްގެންދަނީ ސީދާ ފަލަސްތީނު ރައްޔިތުންނާ ގުޅިގެންކަން އެ ހަރަކާތުގެ ލީޑަރުން ބުނެއެވެ. ފްލޮޓިއްލާގެ މައިގަނޑު މެސެޖަކީ ފަލަސްތީނުގައި ހިންގަމުންދާ ގަތުލުއާންމާ މެދު އެއްވެސް ފިޔަވަޅެއް ނާޅައި ހަނު ތިބުމަކީ އޮތް އިހުތިޔާރެއް ނޫންކަން ދުނިޔެއަށް އަޑު އިއްވައިދިނުންކަން ފާހަގަކުރެވެއެވެ.