އެމެރިކާއިން ޣައްޒާ "މިލްކުކޮށް" އެތަން ތަރައްޤީކުރާނެ: ޓްރަމްޕް

ޣައްޒާ ސަރަޙައްދު "މިލްކުކޮށް" އެ ސަރަޙައްދު ތަރައްޤީކުރުމުގެ މަސައްކަތް އެމެރިކާއިން ކުރިއަށް ގެންދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއްޔެ ބުނެފިއެވެ.

ނިރުބަވެރި އިސްރާއީލް ޖަމާއަތުގެ ބޮޑުވަޒީރު ނަތަންޔާހޫ އާއެކު ވައިޓް ހައުސްގައި ބޭއްވި ބައްދަލުވުމަކަށްފަހު ނޫސްވެރިންނާ ވާހަކަ ދައްކަމުން ޓްރަމްޕް ބުނީ، ޣައްޒާގެ ރައްޔިތުން އެހެން ތަނަކަށް ބަދަލުކުރުމަށްފަހު އެ ސަރަޙައްދު "މެޑިޓަރޭނިއަންގެ ރިވިއެރާ" އަކަށް ބަދަލުކުރެވިދާނެ ކަމަށެވެ. މި މަޝްރޫޢުގެ ދަށުން ޣައްޒާގައި ވަޒީފާގެ ފުރުސަތުތަކާއި ގެދޮރު އިތުރުކުރެވޭނެ ކަމަށްވެސް އޭނާ ބުންޏެވެ.

"އެމެރިކާއިން ޣައްޒާ ސަރަޙައްދު އެމެރިކާގެ ދަށަށް ގެނެސް، އެ ސަރަޙައްދުގައި މަސައްކަތްކުރާނަން. އަޅުގަނޑުމެން އެތަން މިލްކުކުރާނަން،" ޓްރަމްޕް ބުންޏެވެ.

އަދި ޣައްޒާގައި ހަލާކުވެފައިވާ އިމާރާތްތައް ތަޅާލުމާއި އެތަނުގައި ހުރި ހަތިޔާރުތައް ނައްތާލުމުގެ މަސައްކަތްވެސް އެމެރިކާއިން ކުރާނެ ކަމަށް އޭނާ ބުނެފައިވެއެވެ.

"މިއީ ފަސޭހައިން ނިންމި ނިންމުމެއް ނޫން. އަހަރެން ވާހަކަދެއްކި ކޮންމެ މީހަކުވެސް އެމެރިކާއިން ޣައްޒާ މިލްކުކޮށް، ތަރައްޤީކޮށް، އަދި އެތައް ހާސް ވަޒީފާތައް އުފައްދައި، އެތަން ތަރައްގީ ކުރުމުގެ ޚިޔާލަށް ލޯބިކުރޭ،" އޭނާ ބުންޏެވެ.

އޭނާގެ ޕްލޭން ތަންފީޒުކުރާނެ ގޮތުގެ މަދު ތަފްޞީލުތަކެއް ދެމުން، ޓްރަމްޕް އިތުރަށް ބުނި ގޮތުގައި ޣައްޒާގައި ތިބި ނިކަމެތިވެފައިވާ ފަލަސްޠީނުގެ މީހުން "އެހެން ޤައުމުތަކަށް ގެންދާނީ" ކަމަށެވެ. އަދި ފަލަސްޠީނުގެ މީހުން ބޭނުން ނަމަ އެތާނގައި ދިރިއުޅެވޭނެ ކަމަށްވެސް ބުންޏެވެ.

ޓްރަމްޕް ބުނީ ޣައްޒާއަކީ "ދުނިޔޭގެ އެންމެންގެ" ގެއަކަށް ވެދާނެ ކަމަށެވެ.

"އެތަން ބައިނަލްއަޤްވާމީ ތަނަކަށް ހަދައި، މީހުންހައިރާންވާފަދަ ތަނަކަށް ހަދާނެ. އަދި މުޅި ދުނިޔޭގެ ހުރިހާ ތަނަކުން މަންދޫބުން އެތަނުގައި ތިބޭނެ. އެތަނުގައި ދިރިއުޅޭނެ. ފަލަސްޠީނުގެ މީހުންވެސް އެތަނުގައި ދިރިއުޅޭނެ،" އޭނާ ބުންޏެވެ.

ޓްރަމްޕްގެ ވާހަކަ އާއި ގުޅިގެން، ގާޒާގެ ސަލާމަތާއި ރައްކާތެރިކަން ދެމެހެއްޓުމަށް އެމެރިކާގެ ސިފައިން ފޮނުވިދާނެތޯ ނޫސްވެރިއަކު އެހުމުން، ޓްރަމްޕް ބުނީ އެއީ ވެދާނެ ކަމެއް ކަމަށެވެ.

"ގާޒާއާ ބެހޭ ގޮތުން، އަހަރެމެން ކުރަންޖެހޭ ކަމެއް ކުރާނަން. ކުރަން ޖެހިއްޖެނަމަ، އަހަރެމެން އެކަން ކުރާނަން،" އެ ސުވާލަށް ޖަވާބު ދެމުން އޭނާ ބުންޏެވެ.

ޓްރަމްޕްގެ އެ ހުށަހެޅުމާއި ގުޅިގެން، ނިރުބަވެރި އިސްރާއީލް ޖަމާއަތުގެ ބޮޑުވަޒީރު ނެތަންޔާހޫ، ބުނީ، އެމެރިކާގެ ރައީސްގެ ޕްލޭނަކީ "ސަމާލުކަން ދޭންޖެހޭ" އަދި "ތާރީޚު ބަދަލުކޮށްފާނެ" އެއްޗެއް ކަމަށެވެ.

ނަމަވެސް، ޣައްޒާ ސަރަޙައްދު ހިންގާ ޙަމާސް ޖަމާޢަތުން ވަނީ މި ހުށަހެޅުން ކުށްވެރިކޮށްފައެވެ. އެ ޖަމާޢަތުން ނެރުނު ބަޔާނެއްގައި ބުނެފައިވަނީ މިއީ އެ "ސަރަޙައްދުގައި ހަމަނުޖެހުން އުފެދޭނެ ކަމެއް" ކަމަށެވެ.

އަދި ޣައްޒާގެ ރައްޔިތުން މި ރޭވުމަށް ފުރުސަތު ނުދޭނެ ކަމަށްވެސް ބުނެފައިވެއެވެ. ޓްރަމްޕް އޭނާގެ ވާހަކަތަކުގައި ހުށަހަޅުއްވާފައިވަނީ އެމެރިކާއިން އެ ސަރަޙައްދުގެ "ދިގު މުއްދަތެއްގެ މިލްކުވެރިކަމުގެ މަޤާމެއް" އަދާކުރާނެ ކަމަށެވެ.