އެމްއެމްޕީއާރުސީގެ ހިޔާނާތާ ގުޅޭ 161 މައްސަލަ، 123 މިލިއަން ހޯދަން އަންގައިފި

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަންގެ ޚިޔާނާތާއި ގުޅިގެން 161 މައްސަލައެއްގެ ތަހުގީގު ނިންމާފައިވާ ކަމަށް އޭސީސީން ބުނެފި އެވެ.

އޭސީސީން މިރޭ ބުނީ އެ ކޮމިޝަނާއި ދިވެހި ފުލުހުންގެ ހިދުމަތާ ގުޅިގެން ތަހުގީގު ކުރަމުން އެމްއެމްޕީއާރުސީގެ ކޮރަޕްޝަންގެ މައްސަލަތަކުގައި މިވަގުތު 37 ތަހުގީގެއް ހިންގަމުންދާ ކަމަށެވެ. އަދި 161 މައްސަލަ އޮތީ ތަހުގީގުކޮށްނިންމައި ގޮތް ނިންމުމުގެ މަރުހަލާގައި ކަމަށެވެ.

ފަނަރަ މައްސަލައެއްގައި ޕްރޮސިކިއުޓާ ޖެނެރަލްގެ އޮފީހާއެކު ޑިއުޓީ ޕްރޮސިކިއުޝަން ކުރިޔަށްދާ ކަމަށް ވެސް ބުންޏެވެ.

އެމްއެމްފީއާރުސީގެ މައްސަލަތައް ތަހުގީގު ކުރުމަށްފަހު، އެ މައްސަލަތަކާ ގުޅިގެން، މިހާތަނަށް 123,732,662.00 މިިލިއަން ރުފިޔާ އަނބުރާ ހޯދުމަށް އެ ކޮމިޝަނުން ކަމާ ގުޅުންހުރި ފަރާތްތަކަށް އަންގާފައިވާ ކަމަށް ވެސް ބުންޏެވެ.

އެ ކޮމިޝަނުގެ ތަހުގީގުތަކުގައި އަމަލުކުރަނީ، ގާނޫނު އަސާސީ އާއި ކޮމިޝަނުގެ ގާނޫނާއި، ޖިނާއީ އަދުލުގެ ނިޒާމުގައި ކަނޑައަޅާފައިވާ އުސޫލުތަކާއި، މިންގަނޑުތަކާއި ހަމަތަކުގެ މަތިން ކަމަށްވެސް ބުންޏެވެ. އަދި ބުނީ އެ ކޮމިޝަނުގެ ގާނޫނީ މަސްއޫލިއްޔަތު އަދާކުރަނީ، އެއްވެސް ފަރާތެއްގެ ނުފޫޒަށް ލެނބުމެއްނެތި، މިނިވަންކަމާއި މުސްތަގިއްލުކަމާއެކު، ވަކި ފަރާތަކަށް ބުރަނުވެ ގާނޫނީ ހަމަތަކުގެ މަތީން، ކޮމިޝަނުގެ ފަންނީ ގާބިލުކަން ތަންދޭ އެންމެ ބޮޑަށް ކަން ފާހަގަކޮށް، އެކަމުގެ ޔަގީންކަން ރައްޔިތުންނަށް ދޭ ކަމަށެވެ. އަދި، ކޮމިޝަނުގެ ފަންނީ އަދި އެހެނިހެން ގާބިލުކަން ތަންދޭ އެންމެ މަތީ މިންވަރަކުން ތަހުގީގުތައް އަވަސްކޮށް ފިޔަވަޅު އަޅަމުންގެންދާނެކަމުގެ ޔަގީންކަން ދޭ ކަމަށެވެ.