އެމްޑީޕީގެ ޗެއާޕާސަން އިންތިޚާބުގެ ޓައިމްލައިން އަސާސީ ގަވާއިދާ ޚިލާފު ކަމަށްބުނެ އިއުލާން ބާތިލްކުރަން އެދިއްޖެ

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަން ހޮވުމަށް ބާއްވާ އިންތިޚާބާ ގުޅޭގޮތުން ކޮށްފައިވާ އިއުލާނާއި އިންތިޚާބުގެ ޓައިމްލައިނަކީ ޕާޓީގެ އަސާސީ ގަވާއިދާ ޚިލާފު ނިންމުންތަކެއް ކަމަށް ބުނެ އެ އިއުލާން ބާތިލްކުރަން އެދިއްޖެއެވެ.

މިކަން ހާމަކޮށްފައިވަނީ އެމްޑީޕީގެ އިސްތިއުނާފް ފަނޑިޔާރު މަޖިލީހުގެ ރައީސް އަހުމަދު އަބްދުالله އަފީފް، ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާއަށް ފޮނުއްވި ސިޓީއެއްގައެވެ.

އަހުމަދު އަބްދުالله އަފީފް ފޮނުއްވި ސިޓީގައި ވިދާޅުވެފައިވަނީ، 12 ޖޫން 2026 ގައި ޗެއާޕާސަންގެ އިންތިޚާބު ބޭއްވުމަށް ނިންމައި އިއްޔެވކޮށްފައިވާ އިއުލާނަކީ އޭނާ އިރުޝާދު ދެއްވާފައިވާ ގޮތާ ޚިލާފަށް ނިންމާފައިވާ ނިންމުމެއް ކަމަށެވެ.

އަދި ޕާޓީގެ އަސާސީ ގަވާއިދުގެ 46 ވަނަ މާއްދާގެ ދަށުން ޗެއާޕާސަންގެ އިންތިޚާބުގެ ކަންކަން ރާވައި ހިންގުމުގެ މަސްއޫލިއްޔަތު މަތިކޮށްފައިވަނީ އިސްތިއުނާފް ފަނޑިޔާރު މަޖިލީހުގެ ރައީސާ ކަމަށްވާއިރު، އޭނާއަށް ނާންގައި ޕާޓީގެ އެއްވެސް ގުނަވަނަކުން މިފަދަ ނިންމުމެއް ނިންމުމަކީ އަސާސީ ގަވާއިދާ ޚިލާފު ކަމެއް ކަމަށް ސިޓީގައި ފާހަގަކޮށްފައިވެއެވެ.

މި ސިޓީގައި އިތުރަށް ބަޔާންކޮށްފައިވާ ގޮތުގައި، އިންތިޚާބާ ބެހޭ ކޮމިޓީން އެކުލަވާލި ޓައިމްލައިނަކީ ހަމައެކަނި ދިން ލަފައެއް ކަމަށާއި، އެކަމުގައި ގޮތެއް ނިންމަންވާނީ ޕާޓީގެ ލީޑަރުންނާއި ޗެއާޕާސަނާ މަޝްވަރާކުރުމަށްފަހު ކަމަށް އަފީފް ވަނީ ކުރިންވެސް އަންގަވާފައެވެ.

ޚާއްޞަކޮށް ޕާޓީގެ ތެރޭގައި ނުތަނަވަސްކަން އުފެދިފައިވާ މި ދަނޑިވަޅުގައި، މަޞްލަޙަތު ގެއްލިދާނެ ފަދަ ނިންމުމެއް ނިންމުމަކީ ރަނގަޅު ގޮތެއް ނޫން ކަމަށްވެސް އޭނާ ވިދާޅުވިއެވެ.

މީގެ އިތުރުން، ޕާޓީގެ ގިނަ އަދަދެއްގެ މެންބަރުން އެ މެންބަރުންނަށް ނޭނގި ޕީއެންސީއަށް ބަދަލުކޮށްފައިވާކަން ތުހުމަތު ކުރައްވައި، އޭނާ ވިދާޅުވީ ވަކިކޮށްފައިވާ މެންބަރުންނަށް އަލުން ޕާޓީއަށް ވަނުމުގެ ފުރުޞަތު ނުދީ އިންތިޚާބު ކުރިއަށް ގެންދިއުމަކީ ކެންޑިޑޭޓުންނާއި މެންބަރުންގެ އިންތިޚާބީ ޙައްޤުތަކަށް އުނިކަން އަންނާނެ ކަމެއް ކަމަށެވެ.

އެހެންކަމުން، މިހާރު އިޢުލާންކޮށްފައިވާ ޓައިމްލައިނަކީ އަސާސީ ގަވާއިދާ ޚިލާފަށް ބަޔަކު ނިންމާފައިވާ ނިންމުމަކަށްވާތީ، އެ ނިންމުންތަކަކީ ބާތިލް ނިންމުންތަކެއްކަން އިއުލާންކޮށްދިނުމަށް އިސްތިއުނާފް ފަނޑިޔާރު މަޖިލީހުގެ ރައީސް ވަނީ އެދިވަޑައިގެންފައެވެ.