ހަތަރު އަހަރުފަހުން އަނެއްކާވެސް މާލެ "ފެނަށް"

މާލެއަށް މިއަދު ކުރަމުންދާ ވިއްސާރާގައި މާލެގެ ބޮޑުބައެއްގައި ވަނީ ފެންބޮޑުވެ އާއްމު ހާލަތު ހުއްޓުމަކަށް އައިސްފައެވެ.

ރާއްޖޭގެ ދިފާއީބާރާއި ފުލުހުން އަދި ސަރުކާތުގެ މުއައްސަސާތަކުން ފެނުން އާންމުންރައްކާތެރިކުރުމަށް އަންނަނީ މަސައްކަތްކުރައްވަމުންނެވެ.

މާލެ މިއަދު ފެނުގެ ބޮޑު ކާރިސާއަކާކުރިމަތި ލައިގެން އުޅޭއިރު މީގެ ހަތަރުއަހަރު ކުރިން މިއަދު 05 ނޮވެންބަރު 2014 ވަނަ ދުވަހު މާލެ އޮތީ ފެނަށްޖެހިފައިކަން ފާހަގަކޮށްލަންޖެހެއެވެ.

މާލޭ ވޯޓާ އެންޑް ސުވަރޭޖް ކޮމްޕެނީގެ (އެމްޑަބްލިއުއެސްސީ) ހުންނަ އިމާރާތުގައި ހިނގި އަލިފާނުގެ ހާދިސާ އާއި ގުޅިގެން މާލޭގެ ރައްޔިތުންނަށް ފެން ލިބުމުގައި ދަތިތަކާއި ކުރިމަތިލާން ޖެހުމުގެ ސަބަބުން ސަރުކާރުން ދިޔައީ މާލޭގެ ރައްޔިތުންނަށް ފެން ފޯރުކޮށްދެއްވުމަށް ބޮޑެތި މަސައްކަތްތަކެއް ކުރައްވަމުނެނެވެ.

މިއާއެކު ސަރުކާރުން މާލޭގައި ކާރިސާގެ ހާލަތު އިއުލާންކޮށް ހާއްސަ ޓާސްކް ފޯހެއް އުފައްދަވާ ވަގުތުން ވަގުތައް މާލޭގެ އެކި ސަރަހައްދުތަކަށް ސަރުކާރުން ފެން ފޯރުކޮށްދޭން ފެށިގެންދިޔައެވެ.

މާލެ ރައްޔިތުން އެތަކެއް ޒަމާނަކަށް ފަހު ފެން ކިއުތަކަށް އަރަންޖެހުނު މި ހާދިސާއަށް ހަތަރު އަހަރުފަހުން މިވަނީ މިފަހުގެ ތާރީހުގައި ފެންބޮޑު ނުވާ މިންވަރަށް މާލޭގައި ފެންބޮޑުވެފައެވެ.

ރައީސް ޔާމީންގެ ސަރުކާރުގައި މާލެގެ މަގުތަކުން ފެންހިންދުމުގެ ނިޒާމެއްވަނީ ޤާއިމްކުރެވިފައެވެ. ނަމަވެސް އެނިޒާމަށް ބަޔަކު ގެއްލުންދިނުމުގެ ސަބަބުން ވިއްސާރަ މޫސުމުގައި ވެހޭ ވާރޭއާއެކު މާލޭގައި މިފަހަރުން އަންނަނީ ފެންބޮޑުވުމުގެ މައްސަލަ އިތުރުވަމުންނެވެ.

ސޯޝަލް މީޑިއާގައި އާއްމު ފަރާތަކުން ލިޔެފައިވާގޮތުގައި "މީގެ 4 އަހަރުކުރިން އެދުވަހު ފެނަށް އެދި އާދޭހުގެ ކިއުތަކެއްގައި، މިއަދު ފެންބޮޑުވެ މުސީބާތެއްގައިވާކަމެވެ.