މާފުށީ ބަނދަރު ތަރައްޤީކުރުމުގެ މަސައްކަތް ބާރު ސްޕީޑްގައި ކުރިއަށް

ކ. މާފުށީ ބަނދަރު ތަރައްޤީކުރުމުގެ މަސައްކަތް ބާރު ސްޕީޑްގައި ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމް.ޓީ.ސީ.ސީ އިން ބުނެފި އެވެ.

އެމް.ޓީ.ސީ.ސީ އިން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ، މި މަޝްރޫއުގެ %59 މިހާރު ނިމިފައިވާ ކަމަށާއި މިވަގުތު ކުރިއަށްދަނީ ކޮންކްރީޓް ބްރިޖް ހެދުމުގެ މަސައްކަތްކަމަށެވެ. މާފުށީ ބަނދަރު ތަރައްޤީކުރުމުގެ މަޝްރޫއުގެ ދަށުން 63،711 ކިއުބިކް މީޓަރުގެ ސަރަހައްދެއްގައި، އައު ހާބަރ ބޭސިން ފުންކުރުމާއި، 28,836 ކިއުބިކް މީޓަރުގެ ސަރަހައްދެއްގައި ކުރިން ފުންކޮށްފައިވާ ފަޅު އަލުން ފުންކުރުމުގެ އިތުރުން 4,414 ކިއުބިކް މީޓަރުގެ ސަރަހައްދެއްގެ ނެރު ފުންކުރުން ހިމެނެއެވެ.

އަދި 31 މީޓަރުގެ ސަރަހައްދެއްގައި ބޭރުތޮށި ލުމާއި، 680 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމެންޓް ޖެހުމާއި، 700 މީޓަރުގެ ސަރަހައްދެއްގައި ޖިއޯބޭގް ރިވެޓްމެންޓް ޖެހުމުގެ އިތުރުން، 374 މީޓަރުގެ ސަރަހައްދެއްގައި އެއްގަމުތޮށިލުން ހިމެނެއެވެ.

މީގެއިތުރުން، 160 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުމާއި، 19 މީޓަރު ދިގު 3 މީޓަރު ފުޅާ ބްރިޖެއް ހެދުމާއި، 1,869 އަކަ މީޓަރުގެ ސަރަހައްދެއްގައި ހާބަރ ޕޭވްމަންޓް ހެދުމާއި، ބަނދަރުގައި ބައްތި ހަރުކުރުމުގެ މަސައްކަތް ކުރުންވެސް މި މަޝްރޫޢުގެ ތެރޭގައި ހިމެނެއެވެ.

ސަރުކާރުން އެމް.ޓީ.ސީ.ސީ އާއި މި މަސައްކަތް ހަވާލުކޮށްފައި ވަނީ 2023 ވަނަ އަހަރު އެވެ. މި މަސައްކަތަށް ޖުމުލަ 76.48 މިލިޔަން ރުފިޔާ ޚަރަދު ވާނެކަމަށް އެކުންފުނިން ބުނެފައިވެ އެވެ. މާފުށީގައި ތަރައްޤީކުރާ އައު ބަދަރުގެ ސަބަބުން ލަފާ ފުރުމުގެ ދަތިތަކަށް ދާއިމި ހައްލެއް ލިބިގެން ދާނެކަމަށް އެމް.ޓީ.ސީ.ސީ އިން ވަނީ ބުނެފަ އެވެ.