އަބްދުއްރަޙީމް، ރައީސް ނަޝީދަށް: ޕީއެންސީ ބައިބައި ކުރަން ފާޑުފާޑުގެ ވާހަކަ ދައްކާނެ ކަމެއް ނެތް
ލިޔުންތެރިޔާ
ޚަދީޖާ އަރުފާ
ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ބައިބައި ކުރުމުގެ މަގްސަދުގައި ފާޑުފާޑުގެ ވާހަކަ ދައްކާނެ ކަމެއް ނެތް ކަމަށް ވިދާޅުވެ، ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަޙީމް އަބްދުالله، ކުރީގެ ރައީސް މުޙައްމަދު ނަޝީދަށް ވަރުގަދަ ރައްދެއް ދެއްވައިފިއެވެ.
އަބްދުއްރަޙީމް މިފަދައިން ވިދާޅުވީ، ސަންގު ޓީވީގެ ޕްރޮގްރާމެއްގައި ވާހަކަދައްކަވަމުން ޕީއެންސީ މިހާރު އޮތީ ރޫޅުމުގެ މަގުމަތީގައި ކަމަށް ރައީސް ނަޝީދު ވިދާޅުވުމާ ގުޅިގެން، އެކްސްގައި ކުރެއްވި ޕޯސްޓެއްގައެވެ.
އަބްދުއްރަޙީމް ވިދާޅުވީ، ބަޔަކު ދައްކާހާ ވާހަކަޔަކަށް ޕީއެންސީ ނުގުޑާނެ ކަމަށެވެ. ޕީއެންސީއަކީ ރާއްޖޭގައި މިވަގުތު އޮތް އެންމެ ބޮޑު އަދި އެންމެ ބަދަހި ސިޔާސީ ޕާޓީކަން ފާހަގަކުރައްވަމުން އަދުރޭ ވިދާޅުވީ، އެ ޕާޓީއަކީ ބިނާކުރަނިވި ފިކުރުގެ ޕާޓީއެއް ކަމަށެވެ. އަދި ޕީއެންސީން އަބަދުވެސް އިސްކުރާނީ ދިވެހީންނާއި ދިވެހި ގައުމު ކަމަށްވެސް އޭނާ ވިދާޅުވިއެވެ.
”މުޅި މި ޕާޓީ އޮތީ ރައީސް ޑރ. މުޙައްމަދު މުޢިއްޒާއެކު ގަދަކޮށް.“ އަބްދުއްރަޙީމް ވިދާޅުވިއެވެ.
ރައީސް ނަޝީދު ސަންގު ޓީވީގައި ވާހަކަދައްކަވަމުން ވިދާޅުވެފައިވަނީ، ޕީއެންސީ މިހާރު "ހަމަ އެއްކޮށް ރޫޅެނީ" ކަމަށާއި، ކުރިއަށް އޮތް ތަނުގައި އެކަން ރައްޔިތުންނަށް މާ ސާފުކޮށް ފެންނާނެ ކަމަށެވެ. އަދި ރައީސް މުޢިއްޒުގެ މަގުބޫލުކަން ގެއްލިފައިވާ ކަމަށާ، ރައީސް ދައްކަވާ ވާހަކަފުޅުތައް ރައްޔިތުން މިހާރު އަޑުނާހާކަން އެމަނިކުފާނަށް އަމިއްލަފުޅަށްވެސް ގަބޫލުކުރެއްވޭނެ ކަމަށް ވިދާޅުވިއެވެ.
ނަޝީދު އިތުރަށް ވިދާޅުވީ، ޕީއެންސީގެ ކޮންގްރެސްއެއް ބާއްވަން ތައްޔާރުވަމުންދާއިރު، އެ ކޮންގްރެސްގައި ޕާޓީގެ ރައީސްކަމުން ޑރ. މުޢިއްޒު ދުރުކުރަން މަސައްކަތް ކުރާނެ ކަމަށެވެ.
ދުނިޔޭގެ އެހެން ގައުމުތަކުގައިވެސް ލީޑަރެއްގެ މަގުބޫލުކަން ގެއްލުމުން ޕާޓީގެ ލީޑާޝިޕުން އެ ބޭފުޅަކު ދުރުކުރާ ކަމަށާއި، އެހެންނޫނީ ޕާޓީ ސަލާމަތް ނުވާނެ ކަމަށްވެސް ނަޝީދު ވިދާޅުވިއެވެ.
ނަމަވެސް، ޕީއެންސީގެ ލީޑާޝިޕުން އަންނަނީ ނަޝީދުގެ މި ވާހަކަތައް ދޮގުކޮށް، ޕާޓީގެ ސަފުތައް އޮތީ ބަދަހިކޮށް ކަމަށް ބުނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
