ޣައްޒާއަށް ދިން 36 ޙަމަލާއެއްގައި މުޅީންވެސް ޝަހީދު ކޮށްލާފައި ވަނީ އަންހެނުންނާއި ކުޑަކުދިން

މާރިޗު މަހުގެ 18 ވަނަ ދުވަހުން ފެށިގެން ހައްދުފަހަނައަޅާފައިވާ އިސްރާއިލުން ޣައްޒާއަށް ދެމުންދާ ހަމަލާތަކުގެ ތެރެއިން، 36 ހަމަލާއެއްގައި މުޅިންވެސް ޝަހީދުކޮށްލާފައުވަނީ އަންހެނުންނާއި ކުޑަކުދިންކަމަށް އދ. އިން ބުނެފިއެވެ.

މިދިޔަ ހުކުރު ދުވަހު، އދ. ގެ އިންސާނީ ހައްގުތަކާބެހޭ އޮފީހުން ތަރުޖަމާނު ރަވީނާ ޝަމްދަސާނީ ވިދާޅުވީ ގާޒާގެ އެކި ކަންކޮޅުތަކަށް ދެމުމުންދާ ހަމަލާތަކުގެ ސަބަބުން "އެއްވެސް ރައްކާތެރި ތަނެއް ނެތް" ކަމަށެވެ.

"2025 ވަނަ އަހަރުގެ މާރޗް 18 އިން އޭޕްރިލް 9 އަށް، ގާޒާގެ ރިހާބިލިޓޭޝަން އިމާރާތްތަކާއި ޓެންޓުތަކަށް އިސްރާއީލުން 224 ހަމަލާ ދީފައިވޭ،" ޝަމްދަސާނީ ޖެނީވާގައި ނޫސްވެރިންނާ ވާހަކަ ދައްކަވަމުން ވިދާޅުވިއެވެ.

"އދ. ގެ އިންސާނީ ހައްގުތަކާބެހޭ އޮފީހުން ކަށަވަރުކޮށްފައިވާ މަޢުލޫމާތުގެ އެނގޭ ގޮތުން 36 ހަމަލާއެއްގައި މިހާތަނަށް ރެކޯޑުކުރެވިފައިވާ މަރުތަކުގައި ހިމެނެނީ ހަމައެކަނި އަންހެނުންނާއި ކުޑަކުދިން. އަދި ޖުމްލަ ގޮތެއްގައި، އަޅުގަނޑުމެންގެ އޮފީހުން ރެކޯޑުކޮށްފައިވާ މަޢުލޫމާތުތަކަށް ބަލާއިރު، މަރުވެފައިވާ މީހުންގެ ތެރެއިން ބޮޑު އިންސައްތައެއް އަކީ ކުޑަކުދިންނާއި އަންހެނުން،" އޭނާ ވިދާޅުވިއެވެ.

ޝަމްދަސާނީ ފާހަގަކުރެއްވި ގޮތުގައި، އޭޕްރިލް 6 ގައި ދެއިރު އަލް ބަލަހުގައި ހުރި އަބޫ އީސާ ޢާއިލާގެ ރިހާބިލިޓޭޝަން އިމާރާތަކަށް ދިން ހަމަލާއެއްގައި އެއް އަންހެން ކުއްޖަކާއި، ހަތަރު އަންހެނުންނާއި، ހަތަރު އަހަރުގެ ފިރިހެން ކުއްޖަކު ޝަހީދުވެފައިވެއެވެ.

އޭނާ ފާހަގަކުރެއްވި ގޮތުގައި، ހަމަލާ ނުދޭނެ ކަމަށް ބުނެ، ފަލަސްތީނުގެ މީހުންނަށް ދިއުމަށް އަންގާފައިވާ ސަރަހައްދުތަކަށްވެސް އިސްރާއީލުން ހަމަލާ ދެމުންދެއެވެ. މިގޮތުން، އިސްރާއީލުން "ހުސްކުރުމުގެ އަމުރު" ނެރެފައިވާ ސަރަހައްދުތައް އިތުރުވަމުންދާއިރު، އެ ސަރަހައްދުތަކަށްވެސް ހަމަލާ ދެމުންދާކަމަށް އޭނާ ވިދާޅުވިއެވެ.

"އިސްރާއީލުގެ ސިފައިންގެ އަމުރަކާ އެއްގޮތަށް މީހުން ޚާން ޔޫނިސްގެ އަލް މަވާސީ ސަރަހައްދަށް ބަދަލުވުމަށް އެންގި ނަމަވެސް، އެ ސަރަހައްދުގައި ހުރި ޓެންޓުތަކަށް ހަމަލާ ދިނުން ކުރިއަށް ގެންދިޔަ. މާރޗް 18 އިން ފެށިގެން މިފަދަ މަދުވެގެން 23 ހާދިސާ އަޅުގަނޑުމެންގެ އޮފީހުން ރެކޯޑުކޮށްފައިވޭ،" ޝަމްދަސާނީ ވިދާޅުވިއެވެ.

ޝަމްދަސާނީ ފާހަގަކުރެއްވި ގޮތުގައި، މާރޗް 31 ގައި އިސްރާއީލުގެ ސިފައިން ގާޒާގެ އެންމެ ދެކުނުގައިވާ ރަފާ ގަވަރނޯރޭޓް އެއްކޮށް ހުސްކުރުމަށް އަމުރުކުރިއެވެ. އަދި އޭގެ ފަހުން ބޮޑު އެއްގަމު އޮޕަރޭޝަނެއް ފެށިއެވެ.

އިސްރާއީލުން ބުނެފައިވަނީ އެ ގައުމުގެ ސިފައިން ގާޒާގެ "ބޮޑެތި ސަރަހައްދުތައް" ހިފަމުންދާ ކަމަށާއި، އެ ސަރަހައްދުތަކުގައި ދިރިއުޅޭ މީހުން ނެރެ، ބަފަރ ޒޯންތަކުގެ ގޮތުގައި ބޭނުންކުރަމުންދާ ކަމަށެވެ.

"ބޮޑެތި ސަރަހައްދުތައް ހިފައި، އިސްރާއީލުގެ ސެކިއުރިޓީ ޒޯންތަކަށް އިތުރުކުރަމުން ގެންދަނީ. އޭގެ ސަބަބުން ގާޒާ އިތުރަށް ކުޑަވެ، އެކަހެރިވަމުންދަނީ،"

"ސާފުކޮށް ދަންނަވަންޏާ، މި ކިޔާ ހުސްކުރުމުގެ އަމުރުތަކަކީ އަސްލު ބަދަލުކުރުމުގެ އަމުރުތަކެއް. އޭގެ ސަބަބުން ގާޒާގެ އާބާދީ ކުޑަވަމުންދާ ސަރަހައްދުތަކަށް ބަދަލުވަމުންދަނީ،" ޝަމްދަސާނީ ވިދާޅުވިއެވެ.

އޭނާ ވިދާޅުވި ގޮތުގައި މިފަދައިން މީހުން ބަދަލު ކުރުމަކީ ހަތަރުވަނަ ޖެނީވާ ކޮންވެންޝަނާވެސް ޚިލާފު ކަމެއް ކަމަށާ އަދި އެއީ އިންސާނިއްޔަތާވެސް ދެކޮޅު ކުށެއް ކަމަށެވެ.