އެމްޑީޕީގެ ރައީސްކަމުން އިސްތިއުފާ ދެއްވައި ރިޔާސީ ޕްރައިމަރީގައި ވާދަކުރައްވާނެކަން ޝާހިދު އިއުލާނުކުރައްވައިފި

އެމްޑީޕީގެ ރައީސްކަމުން އިސްތިއުފާ ދެއްވައި އެ ޕާޓީގެ ރިޔާސީ ޕްރައިމަރީގައި ވާދަކުރައްވާނެކަން އަބްދުﷲ ޝާހިދު އިއުލާނުކުރައްވައިފި އެވެ.

ނިމިދިޔަ ސަރުކާރުގައި ފޮރިން މިނިސްޓަރުކަން ކުރެއްވި ޝާހިދު އެކަން އިއުލާނު ކުރެއްވީ މިރޭ އައްޑޫ ސިޓީގައި އޮތް ހާއްސަ ޖަލްސާގަ އެވެ. މިއީ ރިޔާސީ ޕްރައިމަރީގެ ކެމްޕެއިން ފެށުމަށް ޝާހިދު ބޭއްވެވި ހާއްސަ ޖަލްސާ އެކެވެ.

އައްޑޫ ސިޓީގެ ސިޔާސީ ބައެއް އިސް ބޭފުޅުންނާއި ގިނަ އަދަދެއްގެ އާންމުން ބައިވެރިވި މި ޖަލްސާގައި ވާހަކަފުޅު ދައްކަވަމުން ޝާހިދު ވިދާޅުވީ އެމަނިކުފާނު ހުންނެވީ އެމްޑީޕީގެ އާންމު މެންބަރުންނާއެކު ވެވަޑައިގަންނަވަން ޖެހިވަޑައިގެން ކޮންމެ ގުރުބާނީއަކަށް ތައްޔާރަށް ކަމަށެވެ.

އަދި ރާއްޖެ މިހާރު އޮތް ހާލަތު ބަދަލު ކުރަން ޖެހޭ ކަމަށާ އެމަނިކުފާނު ހުންނެވީ އެކަމަށް ތައްޔާރަށް ކަމަށެވެ. އަދި 2028 އެމްޑީޕީއަށް ކާމިޔާބު ކޮށްދިނުމަށް ކުރައްވަން ޖެހިވަޑައިގެން ކޮންމެ މަސައްކަތްޕުޅެއް ކުރައްވާނެ ކަމަށް ވިދާޅުވި އެވެ.

އަދި ޔަގީންކަން ދެއްވީ އެމަނިކުފާނު އިސްވެ އުފައްދަވާ ސަރުކާރެއް ވާނީ އެމްޑީޕީގެ ކޮންމެ މެންބަރެއްގެ ބައިވެރިވުން އޮތް ސަރުކާރަކަށް ކަމަށެވެ. ހަމަ އެއްވެސް މެންބަރަކު ބާކީ ނުވާނެ ކަމުގެ ޔަގީންކަން ދެއްވި އެވެ.

މި ޖަލްސާގައި ޝާހިދު ވަނީ އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަން ރަސްމީކޮށް އިއުލާނު ކުރައްވާފަ އެވެ. އަދި އެ ނިންމެވުމާއެކު އެމްޑީޕީގެ ރައީސް ކަމުން އިސްތިއުފާ ދެއްވާ ކަމުގައި ވެސް އިއުލާނު ކުރެއްވި އެވެ.

މަގާމުން އިސްތިއުފާ ދެއްވީ ޕާޓީގެ އިސް މަގާމެއްގައި ހުންނަވާ ރިޔާސީ ރޭހަށް ނިކުންނެވުމަކީ އެންމެ ރަނގަޅު ގޮތް ކަމަށް ގަބޫލުނުކުރައްވާތީ ކަމަށްވެސް ވިދާޅުވި އެވެ.

މިރޭ އޮތް ޖަލްސާގައި ޝާހިދުގެ އަރިހުގައި އެމްޑީޕީގެ ޕީޖީ ގުރޫޕްގެ ލީޑަރު އިބްރާހިމް ނާޒިލް އާއި ނާޒިލްގެ އަނބިކަނބަލުން ކުރީގެ މެންބަރު ހިސާން ހުސައިން އާއި އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު ބައިވެރިވެވަޑައިގެންނެވި އެވެ.

އަދި މަޖިލީހުގެ މިހާރާއި ކުރީގެ އެމްޑީޕީގެ ބައެއް މެންބަރުންނާއި އައްޑޫ ސިޓީ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސާ ވެސް ބައިވެރިވެވަޑައިގެންނެވި އެވެ.