އަނބިމީހާއަށް 15،000ރ ދީފައި، ކޮފީއަށް ދިޔައީމަ އަޅުގަނޑުމެން އަތުގައި ނޯވޭ އެއްވެސް އެއްޗެއް: އައްބާސް

އަނބިމީހާއަށް 15،000 ރުފިޔާ ދިނުމަށްފަހު، ކޮންމެ ދުވަހަކު ކޮފީއަށް 1000 ރުފިޔާ ހޭދަކޮށްފައި، އަތުގައި އެއްވެސް އެއްޗެއް ބާކީ ނޯންނަ ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެއެވެ.

އައްބާސް މިހެން ވިދާޅުވީ މަޖިލީހުގެ މިއަދުގެ ޖަލްސާގައި ކުރީގެ ރައީސުންގެ އިނާޔަތް ކުޑަކުރުމާއި ގުޅޭގޮތުން ސަރުކާރުގެ ފަރާތުން ހުށަހެޅި ބިލަށް ބަހުސް ކުރައްވަމުންނެވެ.

އެގޮތުން އެ ބިލަށް ތާއިދު ކުރައްވައި ވާހަކަދައްކަވަމުން އައްބާސް ވިދާޅުވީ، ރައީސްކަން ކުރައްވާފައިވާ ފަސް ބޭފުޅަކަށް ދައުލަތުގެ ބަޖެޓުން 20 މިލިއަނެއްހާ ރުފިޔާ އަހަރަކު ހޭދަކުރާ ކަމަށެވެ. އަދި އެ ރައީސުންނަކީ ރައްޔޮތުންގެ ޓެކްސް ފައިސާއިން އިނާޔަތްތައް ލިބިގެން ދިރިއުޅެމުންއަންނަ ބަޔަކަށް ވާއިރު، މަދު ރައީސަކު މެނުވީ ގައުމަށް ފައިދާވާ ކަމެއް ކުރައްވާތަން ނުފެންނަ ކަމަށް އައްބާސް ވިދާޅުވިއެވެ.

މިއާއެކު އައްބާސް ވަނީ ކުރީގެ ރައީސުންގެ އިނާޔަތް ކުޑަކުރަން ތާއީދު ކުރައްވާކަން ފާހަގަކުރައްވައި މަޖިލީހު މެންބަރުންގެ އިނާޔަތް ކުޑަކުރުމުގެ ވާހަކަ ފައްޓަވާފައެވެ.

މަޖިލީހު މެންބަރުންގެ މުސާރަވެސް ކިޑަ ކުރަންވީ. އިނާޔަތްތައްވެސް ކުޑަކުރަންވީ. އަޅުގަނޑަށްހެޔޮ އެއްވެސް އެއްޗެއް ނުދިނަސް

ވެލިދޫ ދާއިރާގެ މެންބަރު މުހައްމަދު އައްބާސް

އައްބާސް ވިދާޅުވީ އެއްވެސް އެއްޗެއް ނުދިން ނަމަވެސް ރައްޔިތުންނަށްޓަކައި މަޖިލީހުގެ މަސައްކަތް ކުރައްވާނެ ކަމަށެވެ. އަދި މިހާރު ލިބޭ މުސާރައިންވެސް ދެކޮޅު ނުޖެހޭ ކަމަށް އޭނާ ވިދާޅުވިއެވެ.

"އަޅުގަނޑުމެން ރައްޔިތުންގެ މަޖިލީހުގެ މެންބަރުންނަށް ވެސް ލިބެނީ 79،700 ވަރަކަށް ރުފިޔާ… 82،500ރ. ޓެކްސްއަށް ކަނޑާފައި. އަޅުގަނޑުމެން ގޭގެ ރެންޓު 25،000ރ. ދައްކާފައި، އެއް އަނބި ހުރިއްޔާ އެ އަނބިމީހާއަށް 15،000ރ. ދީފައި ދެން ކޮންމެ ދުވަހަކު ކޮފީއަށް 500… 1،000ރ. ދިޔައިމަ އަތަކު ނޯވޭ އެއްވެސް އެއްޗެއް،" އައްބާސް ވިދާޅުވި އެވެ.

ވެލިދޫ ދާއިރާގެ މެންބަރު މުހައްމަދު އައްބާސް

މިއާއެކު އޭނާވަނީ އޭނާ ކުރިން ވެސް އުޅުއްވީ މަޖިލީހުން ލިބޭ މުސާރައަކުން ނޫން ކަމަށް ވިދާޅުވެފައެވެ.

"އަޅުގަނޑަށް ހެޔޮ އިންޝުއަރެންސް ނުލިބުނަސް، އަޅުގަނޑަށް ހެޔޮ ހިމާޔަތާއި ރައްކާތެރިކަން ނުލިބުނަސް، އެންމެ ނިކަމެތި ހާލުގައި އުޅުނު ގޮތުގައި ދެން ވެސް އުޅެވޭނެ،" އައްބާސް ވިދާޅުވި އެވެ.

އެހެންކަމުން މަޖިލިސް މެންބަރުންނަށް ދޭ އިނާޔަތްތަކުން ކަނޑަންޖެހޭ އެއްޗެއް ހުރި ނަމަ ކަނޑާލަން ތާއިދުކުރައްވާ ކަމަށާ، ޚަރަދު ކުޑަކުރުމަށް އެކަން ކުރުމަށް އޭނާގެ %100 ތާއީދު އޮންނާނެ ކަމަށް ވިދާޅުވި އެވެ.