ތެލުގެ ދަތިކަމެއް ނެތް، ފަތުވެރިކަން ދަނީ ރަނގަޅުވަމުން: ކޮމެޓީ

މެދުއިރުމައްޗާއި ގަލްފުގެ ހަމަނުޖެހުންތަކާ ގުޅިގެން ފަތުރުވެރިކަމަށް ލިބެމުންދާ ހީނަރުކަމުން އަރައިގަތުމުގައި ކާމިޔާބީ ލިބެމުންދާ ކަމުގައި، އެ ހަމަނުޖެހުންތަކާ ގުޅިގެން ރައީސުލްޖުމްހޫރިއްޔާ އެކުލަވާލެއްވި ވަޒީރުންގެ ހާއްސަ ކޮމިޓީއިން ހާމަކުރައްވައިފި އެވެ.

ކޮމެޓީގެ މަސައްކަތްތައް ހާމަކުރުމަށް މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު، މުޙައްމަދު އަމީން ވަނީ، މިދިޔަ އަހަރާ އަޅައިބަލާއިރު، މާރިޗު މަހު ފަތުރުވެރިން ޒިޔާރަތްކުރި ނިސްބަތް 22.5 އިންސައްތަ ދަށަށް ގޮސްފައިވާ ކަމަށާ އެޕްރީލް މަހު މި ނިސްބަތް 26.5 އިންސައްތަ ދަށަށް ގޮސްފައިވާ ކަމަށް ވިދާޅުވެފަ އެވެ.

އެހެންނަމަވެސް، މި ހިނގާ މޭ މަހުގެ މިހާތަނަށް، މި ނިސްބަތް ހުރީ 8.9 ގައި ކަމަށް ވަޒީރު ވިދާޅުވި އެވެ.

މިހާލަތުގައި، ފަތުރުވެރިކަން ދަށަށް ދާ މިންވަރުގެ ފަރަގު، މިހާ ބޮޑަށް ކުޑަކުރެވުން އަމީން ސިފަކުރެއްވީ ކާމިޔާބީއެއްގެ ގޮތުގަ އެވެ. އަދި މި ކާމިޔާބީ ހާސިލުކުރެވިފައިވަނީ، ކަމާ ގުޅުންހުރި ހުރިހާ ވުޒާރާތަކާއި، މުއައްސަސާތަކާއި، ފަތުރުވެރިކަމާއި ދަތުރުފަތުރުގެ ސިނާޢަތުން އެކުގައި ކުރެވުނު މުހިންމު މަސައްކަތްތަކާއި، ރައީސުލްޖުމްހޫރިއްޔާގެ ދުރުވިސްނުންފުޅުން ކަމުގައި ވިދާޅުވިއެވެ.

އެގޮތުން މޯލްޑިވިއަން އިން އުދުހުންތަކުގައި ބޭނުންކުރުމަށް ވައިޑް ބޮޑީ އެއާކްރާފްޓް ގެނައުމަށް ނިންމެވި ނިންމެވުން މިހާރު ވެގެންގޮސްފައިވަނީ، ހައްސާސް ހާލަތެއްގައި އިގްތިސާދީ ގެއްލުން މިޓިގޭޓް ކުރުމަށް ރާއްޖޭގެ އަމިއްލަ ގާބިލިއްޔަތު އިތުރުވެގެންދިޔަ، ހިކުމަތްތެރި ނިންމެވުމަކަށްކަން ވަޒީރު ފާހަގަކުރެއްވި އެވެ.

ހުރިހާ އަތޮޅަކުން ހެޔޮ އަގުގައި ތެޔޮ ލިބޭ

މިއަދުގެ ނޫސްވެރީންގެ ބައްދަލްވުމުގައި މަސްވެރިކަމުގެ ސިނާއަތުގައި ހުރި ކަންބޮޑުވުންތަކަށް އިޝާރާތް ކުރައްވަމުން، މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު، އަހްމަދު ޝިޔާމް ވަނީ، މަސްވެރިންނަށް މަސްކަނޑަށް ނިކުމެވޭވަރު ކޮށްދެއްވަމުން ގެންދަވާކަން ފާހަގަކުރައްވައި، ތެލުގެ ދަތިކަން ހައްލުކޮށްދެއްވުމަށް ކުރައްވަމުންގެންދަވާ މަސައްކަތް ފާހަގަ ކުރެއްވި އެވެ.

އެގޮތުން، ރައީސުލްޖުމްހޫރިއްޔާގެ ވައުދުފުޅާ އެއްގޮތަށް، ހުރިހާ އަތޮޅަކުން ތެޔޮ ލިބޭނޭ ތަންތަން ގާއިމުކުރެވި، އޭގެ ފައިދާ ލިބެމުންދާކަން ފާހަގަކުރެއްވި އެވެ. އެހެންނަމަވެސް، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން އަތޮޅުތަކަށް ތެޔޮ ފޯރުކޮށްދިނުމުގައި ލޮޖިސްޓިކަލް ދަތިކަން ހުރިކަން ފާހަގަކުރައްވާ އެކަން ހައްލުކޮށްދެއްވުމަށް މަސައްކަތް ކުރައްވަމުން ގެންދަވާކަމުގެ ޔަގީންކަން ދެއްވިއެވެ.

އަދި މަސް ޕްރޮސެސް ކުރާ ކުންފުނިތަކުގެ އޮޕަރޭޝަނަލް ކޮސްޓު ކުޑަކޮށް، ދަނޑުވެރިކަމުގެ ސިނާއަތުގައި، ނާލަށް ދާ ހަރަދު ކުޑަކުރުމަށް ވެސް، ފަހި ގޮތްތަކެއް ހަމަޖެއްސަވައިދެއްވުމަށް މަސައްކަތް ކުރައްވަމުންގެންދަވާ ކަމުގައި ވަޒީރު ޝިޔާމް ވިދާޅުވިއެވެ.

މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު އަދި ކޮމިޓީގެ ޗެއާ، މޫސާ ޒަމީރު ވިދާޅުވީ، ތެލާއި، ކާޑާއި، އަސާސީ މުދާ، ދަތިކަމެއް ނެތި ފޯރުކޮށްދެއްވުމަށް މަސައްކަތްތައް ކުރައްވަމުން ގެންދަވާ ކަމުގައެވެ. އަދި މި ދަނޑިވަޅުގައިވެސް، ހަރަދުތައް ރޭޝަނަލައިޒް ކުރައްވައި، ދަރަނިތައް އަދާކުރައްވައި، މިހާރު ގައުމުގެ ދަރަނި ވަނީ ދެމެހެއްޓެނިވި މިންވަރެއްގައި ހިފެހެއްޓިފައިކަން ވަޒީރު ފާހަގަކުރެއްވި އެވެ.