ޗެއާޕާސަން ކަމަށް އިންތިޚާބު ކުރަންވާނީ ޕާޓީ ލީޑަރުންނަށް ހަމަހަމަ ފުރުސަތުދޭނެ ބޭފުޅެއް: ޞާލިޙް

އެމްޑީޕީގެ ޗެއާޕާސަން ކަމަށް އިންތިޚާބު ކުރަންވާނީ ޕާޓީ ލީޑަރުންނަށް ހަމަހަމަ ފުރުސަތު ދެވޭނެ ބޭފުޅެއް ކަމަށާ އެ ފުރުސަތު ދެއްވާނެކަން އެ މަގާމަށް ވާދަކުރައްވާ މީކާއިލް އަހުމަދު ނަސީމްގެ މެނިފެސްޓޯގައި ބަޔާންކޮށްފައިވާ ކަމަށް ކުރީގެ ރައީސް އިބްރާހީމް މުޙައްމަދު ޞާލިހް ވިދާޅުވެއްޖެއެވެ.

އިތުބާރު ކެންޕެއިން ޓީމުން ތިނަދޫގައި ބޭއްވި ޖަލްސާގައި ވާހަކަދައްކަވަމުން ރައީސް ޞާލިޙް ވިދާޅުވީ 2023 ވަނަ އަހަރުގެ ރިޔާސީ އިންތިޚާބު އެމްޑީޕީއަށް ގެއްލުނީ ޕާޓީ ބައިބައިވެ، ޕާޓީން އެއްބަޔަކު ވަކިވެގެން ދިޔުމުން ކަމަށެވެ. އަދި އެމްޑީޕީ ޗެއާޕާސަން ކަމަށް މީކާއިލް ހޮވިއްޖެ ނަމަ އެފަދަ ކަމަކަށް ފުރުސަތު ނުދެއްވާނެ ކަމަށާ، އޭނާގެ މެނިފެސްޓޯގައިވެސް ގިނަބަޔަކު ގުޅިގެން މަސައްކަތް ކުރުމަށް ލިޔެފައިވާ ކަމަށެވެ.

ރައީސް ޞާލިޙް ވިދާޅުވީ، ”ތިމަންނައާ ތިމަންނަ ވަށައިގެން ތިބި މީހުން އެކަނި ކައިރިކޮށްގެން“ ރިޔާސީ އިންތިޚާބެއް ކާމިޔާބު ނުކުރެވޭނެ ކަމަށާ، އެމްޑީޕީގައިވެސް އެ އިންތިޚާބަށް ވާދަކުރައްވަން ބޭނުންވާ އެތައް މެންބަރުން ތިބި ކަމަށެވެ.

އެ ހުރިހާ ބޭފުޅުންނަށް ހަމަހަމަ ފުރުސަތެއް، ޕްލެޓްފޯމެއް ދެއްވާނެ ކަމުގެ ވާހަކަ (މީކާއިލް) އެ ވިދާޅުވަނީ. ހަމަހަމަ ފުރުސަތެއް ދީގެން، އަޅުގަނޑު މިދެންނެވިހެން ރިޔާސީ އިންތިޚާބު ކާމިޔާބު ކުރެވޭނެ ސިޔާސަތު ތަކާއެކު އަންނަ ބޭފުޅަކަށް އެ ފުރުސަތު ދެއްވާނެ ކަމަށް މީކާއިލް އެ ވިދާޅުވަނީ… މިގައުމަށް އެންމެ ފައިދާ ހުރިގޮތަކީ އެމްޑީޕީގެ ޗެއާޕާސަން ކަމަށް ވަކި ފަރާތަކަށް ނުޖެހި އެންމެންނަށް ހަމަހަމަ ފުރުސަތު ދީ، މި ޕާޓީ މި ރާއްޖޭގައި ހިންގޭނެ ގޮތަކަށާ، އަޅުގަނޑުމެންގެ ސިޔާސީ ލީޑަރުންނަށް ހަމަހަމަ ފުރުސަތު ޗެއާޕާސަން ކަމަށް މިވަގުތު އިންތިޚާބު ކޮށްގެން.

ރައީސް ޞާލިޙް

ރައީސް ޞާލިޙް އިތުރަށް ވިދާޅުވީ، މިހާތަނަށް ބޭއްވުނު ހުރިހާ ރިޔާސީ އިންތިޚާބުތަކެއްވެސް ކާމިޔާބު ކުރެވުނީ ކޯލިޝަންއެއްގެ ތެރެއިންކަން ފާހަގަކުރައްވަމުން ރައީސް ޞާލިޙް ވިދާޅުވީ، ރިޔާސީ އިންތިޚާބެއް ކާމިޔާބު ކުރުމަށް ގިނަ ޕާޓީތަކެއް ގުޅިގެން މަސައްކަތްކުރުން މުހިންމު ކަމަށެވެ.

އަދި އެމަނިކުފާނަށް 2018 ވަނަ އަހަރުގެ ރިޔާސީ އިންތިޚާބު ކާމިޔާބު ކުރެވުމުން ކޯލިޝަންގައި ހިމެނޭ ޕާޓީތަކުގެ މެންބަރުންނަށް ސަރުކާރުގެ މަގާމުތަކަށް އައްޔަނު ކުރެއްވި ކަމަށާ، އެފަދައިން ކަން ކުރެއްވުމުން، ކުރެއްވީ އެމްޑީޕީގެ ވެރިކަމެއް ނޫން ކަމަށް ވިދާޅުވެ ފާޑުކިޔާފައިވާކަން ފާހަގަކުރެއްވިއެވެ.

ނަމަވެސް އެފަހަރުވެސް ވެރިކަމަށް އައީ ކޯލިޝަނެއްގެ ތެރެއިން ކަމަށް ވުމުން، އެ ކޯލިޝަންގެ ވެރިންގެ މެދުގައި ވެވުނު އެއްބަސްވުމެއް އޮތް ކަމަށާ، އޭގައި ސަރުކާރު ހިންގާނެ ގޮތް ލިޔެވިފައި އޮތް ކަމަށް އެމަނިކުފާނު ވިދާޅުވިއެވެ.

އެހެންކަމުން އެމަނިކުފާނު ވެރިކަން ކުރެއްވީ އެ އެގްރީމަންޓާއި އެއްގޮތަށް ކަމަށްވެސް ވިދާޅުވިއެވެ.